މިހާރު ކުރަމުންދަނީ މޫސުމީ ވިއްސާރައެއް، މިހަފުތާތެރޭގައި ރާއްޖޭގެ އެކި ހިސާބަށް ވިއްސާރަކުރާނެ: މެޓް އޮފީސް
އާދިއްތަ ދުވަހު ހަވީރު 16:30ން ފެށިގެން ރޭގަނޑު 21:30އާ ހަމައަށް ވަނީ ލ އަތޮޅުން ފެށިގެން އައްޑޫ ސިޓީއަށް ވައިޓް އެލަރޓް ނެރެފައި
މާލެއަށް ބޯކޮށް ވާރޭވެހިފައި
ރާއްޖޭގެ އެކި ހިސާބަށް މިހާރު ކުރަމުންދާ ވިއްސާރައަކީ އާންމުކޮށް ކޮންމެ އަހަރަކުވެސް ޑިސެމްބަރ މަހު ރާއްޖެއަށް ކުރަމުންދާ ވިއްސާރަކަމަށް މޫސުމާއި ބެހޭ ގައުމީ އިދާރާއިން ބުނެފިއެވެ.
މިހާރު ކުރަމުންދާ ވިއްސާރައާ ގުޅިގެން "ރާއްޖެއެމްވީ"އަށް މައުލޫމާތު ދެމުން މެޓް އޮފީހުން ބުނީ މިއީ ކޮޅި ގަނޑެއްގެ އަސަރު ނޫންކަމަށެވެ. ނަމަވެސް ސްރީލަންކާގެ ދެކުނު ސަރަހައްދުގައި ލޯ ޕްރެޝަރ ކޮޅިގަނޑެއް އުފެދިފައިވާކަމަށެވެ. އޭގެ އަސަރު ކޮންމެވެސް ވަރަކަށް ރާއްޖެއަށް ކުރާނެކަމަށް މެޓް އޮފީހުން ބުނެއެވެ. ކުރިޔަށް އޮތް ހަފުތާތެރޭގައިވެސް ރާއްޖޭގެ އެކި ހިސާބަށް ވިއްސާރަ ކުރާނެކަމަށް މެޓް އޮފީހުން ބުނެއެވެ.
ބުރާސްފަތި ދުވަހުން ފެށިގެން ރާއްޖޭގެ އެކި ހިސާބަށް ވިއްސާރަ ކުރަމުންދާއިރު އާދިއްތަ ދުވަހު ހަވީރު 16:30ން ފެށިގެން ރޭގަނޑު 21:30އާ ހަމައަށް ވަނީ ލ އަތޮޅުން ފެށިގެން އައްޑޫ ސިޓީއަށް ވައިޓް އެލަރޓް ނެރެފައެވެ. މެޓް އޮފީހުން ބުނީ މިގަޑިތަކުގައި އެސަރަހައްދަށް ބޯކޮށް ވާރޭވެހުމާއެކު ގުގުރާނެކަމަށް ލަފާކުރެވޭކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކުރެވޭކަމަށް ވެސް ބުނެއެވެ.
މީގެއިތުރުން މެޓް އޮފީހުން ބުނީ ހޯމަ ދުވަހުގެ ހެނދުނު 10 ޖެހުމާ ހަމައަށް ރާއްޖޭގެ އެކިހިސާބަށް ވިއްސާރަކޮށް ގުގުރުނެކަމަށް ލަފާކުރެވޭކަމަށާއި ބައެއް ރަށްތަކަށް ބޯކޮށް ވާރޭވެހުން އެކަށީގެންވާކަމަށެވެ. ވައިޖެހޭނެކަމަށް ލަފާކުރެވެނީ އުތުރާއި އިރުއުތުރުން ގަޑިއަކު 07 މޭލާއި 17 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާކަމަށް ބުނެއެވެ.
ރާއްޖޭގެ ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެކަމަށާއި ރާޅުގެ އުސްމިން ހުންނާނެކަމަށް ބެލެވެނީ 2 ފޫޓާއި 5 ފޫޓާ ދެމެދުގައި ކަމަށް މެޓް އޮފީހުން ބުނެއެވެ. ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެވޭތީ، މޫސުމަށް ސަމާލުވުމަށް ވަނީ އިލްތިމާސްކޮށްފައެވެ.
