މާލޭގައި ހުރި ސްޓޯމް ވޯޓަރ ޕަމްޕުތަކުގައި އެއްވެސް މައްސަލައެއް ނެތް ކަމަށް އެމްޑަބްލިއުއެސްސީން ބުނެފިއެވެ.

ވިއްސާރަވެ މާލޭގެ މަގުތަކުގައި ފެން ބޮޑުވުމާ ގުޅިގެން މާލެ ސިޓީގެ މޭޔަރު ޑރ.މުހައްމަދު މުއިއްޒު ވަނީ އެމްޑަބްލިއުއެސްސީއަށް އެ ޕަމްޕުތައް ނުބެލެހެއްޓޭކަމަށް ވިދާޅުވެފައެވެ. އަދި އެކަންވެސް ސިޓީ ކައުންސިލަށް ހަވާލު ކުރެއްވުމަށްވެސް މުއިއްޒު ވިދާޅުވިއެވެ.

މިކަމާ ގުޅިގެން އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހު ވިދާޅުވީ. މިހާރު މާލޭގައި ގާއިމް ކޮށްފައިވާ ޕަމްޕުތައް އެމްޑަބްލިއުސްސީން މަރާމާތުކޮށް ބަލަހައްޓާ ކަމަށާއި، އެ ޕަމްޕުތަކުގައި އެއްވެސް މައްސަލައެއް ނެތް ކަމަށެވެ. މިހާރު ދިމާވެގެން އުޅޭ ކަމަކީ، އެ ޕަމްޕުތަކަކީ، މާލޭގެ ފެން ހިންދުމަށް އެކަށީގެންވާ ގާބިލްކަން ހުރި ޕަމްޕުތަކަކަށް ނުވުމުން ފެން ހިންދުމުގައި ވަގުތު ނަގާކަން ކަމަށެވެ. ޝާހު ވިދާޅުވީ، އެ ޕަމްޕު ތަކަކީ، ޑރ.މުއިއްޒު މިނިސްޓަރު ކަމުގައި ހުންނަވާ އެޕްރޫވްކޮށް ގާއިމްކުރެވުނު ޕަމްޕުތަކެއް ކަމަށެވެ.

ތަޖުރިބާކާރުންގެ ވާހަކަތަކަށް ރިއާޔަތްކޮށް ޝާހު ވިދާޅުވީ، މާލޭގައި ބެހެއްޓުމަށް އެކަށީގެންވަނީ 13 ކިލޯވޮޓްގެ ޕަމްޕު ކަމަށެވެ. އެހެންނަމަވެސް މިހާރު ހުރި 4 ޕަމްޕަކީވެސް 9 ކިލޯވޮޓްގެ ޕަމްޕު ކަމަށެވެ. ޝާހު ވިދާޅުވީ، ބޮޑުތަކުރުފާނު މަގާއި، ބްރިޖުންވެސް ފެން ޖަމާވަނީ މާލެ ތެރެއަށް ކަމުން މިހާރު ހުރި ޕަމްޕުތަކަށް ނުކަތާ ކަމަށެވެ.

އެމްޑަބްލިއުއެސްސީން އެ ޕަމްޕުތައް ބެލެހެއްޓިނަމަވެސް އޭގެ ބެލެނިވެރި ފަރާތަކީ، ޕްލޭނިންގ މިނިސްޓްރީ ކަމުން ިހާރުވެސް އެކަމުގެ މަޝްވަރާތައް މިނިސްޓްރީއާއެކު ކުރިއަށްދާ ކަމަށް ޝާހު ވިދާޅުވިއެވެ.

މިހާރު މާލޭގައި ހުރި 4 ޕަމްޕު ހުރީ، އަމީނީ މަގުގެ އިސްކަންދަރު ކޮށި ހުރި ސަރަހައްދާއި، ސިނަމާލެ ސަރަހައްދާއި، އެމްޑަބްލިއުއެސްސީގެ ކަސްޓަމަރ ކެއަރ އިމާރާތް ހުރި ސަރަހައްދާއި، އައިޖީއެމްއެޗް ސަރަހައްދުގައެވެ.