ކެމަރޫން ފުޓްބޯޅަ ފެޑެރޭޝަނުގެ ރައީސްގެ މަގާމަށް އެ ގައުމުގެ ފުޓްބޯޅަ ލެޖެންޑު ސެމުއެލް އެޓޫ އިންތިޚާބުވެއްޖެއެވެ.

ހޮނިހިރު ދުވަހު ކުރިއަށްދިޔަ އިންތިޚާބު އުމުރުން މިހާރު 40 އަހަރުގެ އެޓޫ ކާމިޔާބުކުރީ އެފްރިކާ ފުޓްބޯޅަ ފެޑެރޭޝަންގެ ހަތަރުވަނަ ނައިބު ރައީސް ސެއިޑޫ އެމްބޮމްބޯ އެންޖޯޔާ ބަލިކުރުމަށްފަހުއެވެ.

މި އިންތިޚާބުގައި އެންމެ ފުރަތަމަ ހަތް ކެންޑިޑޭޓުން ވާދަކުރަން ހަމަޖެހިފައި އޮތް ނަމަވެސް، އިންތިޚާބު ފެށެން ގާތްވެފައި ވަނިކޮށް ފަސް ކެންޑިޑޭޓަކު ވަނީ ނަން އަނބުރާ ގެންގޮސްފައެވެ. އެހެންކަމުން އިންތިޚާބުގައި އެޓޫ އާއި އެންޖޯޔާ ވާދަކުރިއިރު، އެޓޫ އިންތިޚާބު ކާމިޔާބުކޮށްފައިވަނީ 43 ވޯޓާއެކުއެވެ. އަދި އެންޖޯޔާއަށް ލިބުނީ 31 ވޯޓެވެ.

ހޮނިހިރު ދުވަހު ކެމަރޫން ފުޓްބޯޅަ ފެޑެރޭޝަނުގެ އިންތިޚާބު ބޭއްވިއިރު، މީގެ ކުރިން 2018 ވަނަ އަހަރު ބޭއްވި އެ އިދާރާގެ އިންތިޚާބުތައް ސައްހަ ނޫން ކަމަށް މި އަހަރުގެ ޖެނުއަރީ މަހު ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ވަނީ ނިންމާފައެވެ. އެ ފަހަރު އިންތިޚާބު ކާމިޔާބުކުރީ އެންޖޯޔާއެވެ. އެހެންކަމުން ހޮނިހިރު ދުވަހު ބޭއްވި އިންތިޚާބުގެ ކަންކަން ކުރިއަށްގެންގޮސްފައިވަނީ ފީފާގެ ޚާއްސަ ޓީމެއްގެ ބެލުމުގެ ދަށުންނެވެ.

ކެމަރޫން ފުޓްބޯލް ފެޑެރޭޝަނުގެ ރައީސަކަށް އެޓޫ އިންތިޚާބުވިއިރު، އޭނާއަކީ އެފްރިކާގެ މޮޅު ކުޅުންތެރިޔާގެ މަގާމު ހަތަރު ފަހަރު ހޯދާފައިވާ ކުޅުންތެރިއެކެވެ. އަދި ކެމަރޫންގެ ގައުމީ ފުޓްބޯޅަ ޓީމަށް 118 މެޗު ކުޅެދީ 56 ލަނޑު ޖަހާފައިވާއިރު، އެޓޫ ވަނީ ކެމަރޫންއާއެކު 2000 އަދި 2002 ވަނަ އަހަރު އެފްރިކާ ކަޕް އޮފް ނޭޝަންސް ކާމިޔާބުކޮށްފައެވެ. އަދި ވަނީ ކެމަރޫންގެ ޒުވާން ޓީމާއެކު 2000 ވަނަ އަހަރު ބޭއްވި އޮލިމްޕިކްސްގެ ފުޓްބޯޅަ އިވެންޓުން ރަން މެޑަލްވެސް ހޯދާފައެވެ.

ބާސެލޯނާ، އިންޓަ މިލާން އަދި ޗެލްސީގައިވެސް ވިދާލި އެޓޫ ވަނީ ކުލަބު ކެރިއަރުގައި ގިނަ ކާމިޔާބީތަކެއް ހޯދާފައެވެ. އޭގެ ތެރޭގައި ސްޕެނިޝް ލީގާއި، އިޓާލިއަން ލީގާއި ޔުއެފާ ޗެމްޕިއަންސް ލީގުގެ އިތުރު ފީފާ ކުލަބު ވޯލްޑް ކަޕުވެސް ހިމެނެއެވެ. ކާމިޔާބު ކެރިއަރެއް ހޯދަކުރުމަށްފަހު އެޓޫ ފުޓްބޯޅަ ކުޅުން ހުއްޓާލާފައިވަނީ 2019 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ.