އައިޑިއަލް މޫވްމެންޓުގެ މައްޗަށް ކޮކޫން ފުޓްބޯލް ޓީމުން ކުރިހޯދައިފި

ޕާމް ބީޗް ރިސޯޓް އެންޑް ސްޕާގައި މިހާރު ކުރިއަށްދާ ޕާމް ބީޗް ސޮކާ ކަޕްގައި އައިޑިއަލް މޫވްމެންޓް އާއި ކޮކޫން ފޯޓްބޯލް ޓީމް ކުޅުނު މެޗް އެންމެ ލަނދެއްގެ ތަފާތުން ކޮކޫން ފުޓްބޯލް ޓީމް ކާމިޔާބުކޮށްފިއެވެ.

ދެޓީމުގެ ފަރާތުންވެސް މޮޅު ކުޅުމެއް ފެނިގެންދިޔަ މި މެޗް ކޮކޫން ފުޓްބޯލް ޓީމުން ކާމިޔާބުކުރީ 5-4 ގެ ނަތީޖާއަކުންނެވެ.

މެޗުގައި އައިޑިއަލް މޫވްމެންޓްސްއަށް ލަނޑުތަށް ކާމިޔާބުކޮށްދިނީ މުހަންމަދު ނަދީމް އާއި ހުސައިން ފަލާހެވެ. ހުސައިން ފަލާހް އެއް ލަނޑު ކާމިޔާބުކުރިއިރު، މުހަންމަދު ނަދީމް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ.

ކޮކޫން ފުޓްބޯލް ޓީމަށް ލަނޑުތައް ކާމިޔާބުކޮށްދިނީ އަބްދުﷲ ޝަކީލް އާއި ހުސައިން ޒަރީރެވެ. ހުސައިން ޒަރީރްއެއް ލަނޑު ކާމިޔާބުކޮށްދިން އިރު، މެޗުގައި މޮޅު ކުޅުމެއް ދެއްކި އަބްދުﷲ ޝަކީލް ވަނީ ހަތަރު ލަނޑު ކާމިޔާބުކޮށްފައެވެ.

މި މުބާރާތުގައި ދެން މެޗެއް އޮންނާނީ މިމަހުގެ 27 ވާ ބުރާސްފަތި ދުވަހުއެވެ. މި މެޗުގައި ބައްދަލުކުރާނީ ކޭ ޔުނައިޓެޑާއި ހިންނަވަރު އެފްސީއެވެ.

މި މުބާރާތަކީ ޕާމް ބީޗް ރިސޯޓް އެންޑް ސްޕާއިން އިންތިޒާމުކޮށްގެން ކުރިއަށްގެންދާ މުބާރާތެކެވެ. ދެ ގުރޫޕަކަށް ބަހާލައިގެން ކުރައަށް ގެންދާ މި މުބާރާތުގައި ޖުމްލަ 7 ޓީމު ވާދަކުރެއެވެ. އެގޮތުން ގްރޫޕް "އޭ" ގައި ހިމެނެނީ ޕާމް ބީޗް ސޮކާ ކްލަބް އާއި، ހިންނަވަރު އެފްސީ އާއި، ސްޕޯޓިން ވެކެންޒާގެ އިތުރުން ކޭ ޔުނައިޓެޑެވެ. ގްރޫޕް "ބީ" ގައި ހިމެނެނީ ކޮކޫން ފޫޓްބޯލް ޓީމާއި، ކުރެއްދޫ އެފްސީ އާއި، އައިޑިއަލް މޫވްމެންޓްސް އެވެ.

ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހެޅިފައިވާ މި މުބާރާތުގައި ފެއާ ޕްލޭ ޓީމާއި، ޑްރީމް ޓީމާއި، އެންމެ ގިނަ ލަނޑު ޖަހާ ކުޅުންތެރިޔާ އާއި، މުޅި މުބާރާތުގެ އެންމެ މޮޅު ކުޅުންތެރިޔާވެސް ކުޅުމަށް ވަނީ ހަމަޖެހިފައެވެ.