މިލާނާއި ޔުވެންޓަސްވެސް އެއްވަރު

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުތަކުން ތާވަލުގެ އެއްވަނައިގައި އޮތް އޭސީ މިލާނާއި ޔުވެންޓަސްވެސް އެއްވަރުވެއްޖެއެވެ.

ރަށުން ބޭރުގައި ކުޅުނު މެޗުން މިލާން އެއްވަރުވީ އުދިނޭޒީއާ ވާދަކޮށް 1-1 ގެ ނަތީޖާއަކުންނެވެ.

މި މެޗު ފަށައިގެން 17 ވަނަ މިނެޓުގައި އުދިނޭޒީން ވަނީ ލީޑު ނަގާފައެވެ. އޭރިއާ ތެރެއަށް ވަދެ ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ބޭޓޯއެވެ. އޭގެ ފަހުން ނަތީޖާ އެއްވަރުކުރުމަށް މިލާނުން ގިނަ ހަމަލާތަކެއް އުފެއްދިއިރު، މެޗުން އެ ޓީމު ބަލިނުވެ ސަލާމަތްވީ މެޗުގެ އިތުރު ވަގުތުގައި ތަޖުރިބާކާރު ފޯވާޑް ޒްލަޓާން އިބްރަހިމޮވިޗް ކާމިޔާބުކުރި ލަނޑުންނެވެ.

މިއީ އުމުރުން 40 އަހަރުގެ އިބްރަހިމޮވިޗް ޔޫރަޕުގެ ވަރުގަދަ ފަސް ލީގު ހިމެނޭ ގޮތަށް ކާމިޔާބުކުރި 300 ވަނަ ލަނޑެވެ. އިބްރަހިމޮވިޗުގެ ލަނޑުން މި މެޗުން މިލާން ސަލަމާތްވިއިރު، މެޗުގެ ފަހު ވަގުތު އުދިނޭޒީގެ އިސާކް ސަކްސެސްއަށް ވަނީ ސީދާ ރަތް ކާޑެއް ދައްކާފައެވެ. އޭނާއަށް ރަތް ކާޑެއް ދެއްކީ މިލާނުގެ ގޯލްކީޕަރު މައިކް މިންޔޯންއަށް ކުރި ނުރައްކާތެރި ފައުލާ ގުޅިގެންނެވެ.

މި ނަތީޖާއާއެކު ތާވަލުގެ އެއްވަނައިގައި މިލާން އޮތީ ކުޅުނު 17 މެޗުން ލިބުނު 39 ޕޮއިންޓާއެކުއެވެ. ދެވަނައިގައި އޮތް ނާޕޮލީއަށް 16 މެޗުން 37 ޕޮއިންޓް ލިބިފައިވާއިރު، އާދީއްތަ ދުވަހުގެރޭ އެމްޕޯލީ ބަލިކޮށްގެން އެ ޓީމަށް ތާވަލުގެ އެއްވަނައަށް އެރޭނެއެވެ.

މީގެ އިތުރުން ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް އެއްވަރުވީ ވެނެޒިއާއާ ވާދަކޮށް 1-1 ގެ ނަތީޖާއަކުންނެވެ.

ވެނެޒިއާ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ޔުވެންޓަސްއިންނެވެ. ލޫކާ ޕެލެގްރީނީ ނެގި ހުރަހަކުން މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އަލްވާރޯ މޮރާޓާއެވެ. އެކަމަކު ދެވަނަ ހާފު ފަށައިގެން 10 ވަނަ މިނެޓުގައި ވެނެޒިއާއިން ވަނީ ނަތީޖާ އެއްވަރުކޮށްފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮޑްދިނީ މަޓިއާ އަރަމޫއެވެ.

މި ނަތީޖާއާއެކު ޔުވެންޓަސް ވަނީ ތާވަލުގެ ހަވަނައަށް ވެއްޓިފައެވެ. އެގޮތުން ޔުވެންޓަސްއަށް 17 މެޗުން 28 ޕޮއިންޓް ލިބިފައިވާއިރު، ފަސްވަނައަށް ޖެހިލި ފިއޮރެންޓީނާއަށް ވަނީ 17 މެޗުން 30 ޕޮއިންޓް ލިބިފައެވެ. ލީގުގައި ހޮނިހިރު ދުވަހުގެރޭ ކުޅުނު މެޗުން ފިއޮރެންޓީނާ ވަނީ ފުލުގައި އޮތް ސަލެނިޓާނާ އަތުން 4-0 ގެ ނަތީޖާއަކުން މޮޅުވެފައެވެ.