ސުޕްރީމްކޯޓުން ޓިނު ނަގަން ޖެހުނު ސަބަބު ޔާމީނު ކިޔާދެއްވުމުން މާރިޔާގެ ސުވާލެއް
އޭރު ހިނގާދިޔަ ކަންކަން ދިފާއު ކުރައްވައި ރައީސް ޔާމީނު ވަނީ ވާހަކަ ދައްކަވާފައި
ޑިފެންސް މިނިސްޓަރ މާރިޔާ އަޙުމަދު ދީދީ- ސުޕްރީމް ކޯޓުން ކުރި ޙުކުމުގައި އެމަނިކުފާނު ކަންތައް ކުރެއްވީ ޤައުމެއްގެ ރައީސަކު ކަން ކުރައްވާނެ ގޮތަކަށް ނޫންކަމަށް ބަޔާން ކުރައްވާފައިވާ ކަމަށް މާރިޔާ ވިދާ
2018 ވަނަ އަހަރުގެ 1 ފެބްރުއަރީ އަމުރާއި ގުޅިގެން "ސުޕްރީމްކޯޓުގެ ފުރާޅު ނެންގެވި" ސަބަބު ކުރީގެ ރައީސް އަބްދުﷲ ޔާމީނު ކިޔާދެއްވުމާއި ގުޅިގެން ޑިފެންސް މިނިސްޓަރ މާރިޔާ އަޙުމަދު ދީދީގެ ސުވާލެއް ޔާމީނަށް އަމާޒުވެއްޖެއެވެ.
ހުކުރު ދުވަހުގެ ރޭ އިދިކޮޅުން ބޭއްވި ކޮތަރުކޮށި ޖަލްސާގައި ވާހަކަ ދައްކަވަމުން ރައީސް ޔާމީނު ވަނީ ސުޕްރީމްކޯޓުގެ ޓިނު ނަގަން ޖެހުނީ އޭރު ކުއްލި ނުރައްކަލުގެ ޙާލަތުން މެނުވީ ޤާނޫނުތައް ސަސްޕެންޑު ނުކުރެވޭނެތީ ކަމަށް ވިދާޅުވެ، އެގޮތުން އޭރު ފަނޑިޔާރު އަބްދުﷲ ސައީދާއި އަލީ ޙަމީދުގެ ކޮރަޕްޝަން މައްސަލަތަކެއް ފެންމަތިވެގެން ދިޔަކަން ފާހަގަ ކުރައްވާފައެވެ. އެކަންކަން ހިނގާދިޔައީ އެބޭފުޅުންނާއި ގުޅިގެން ފެންމަތިވި ކޮރަޕްޝަންގެ ތުހުމަތުތަކާއި ގުޅިގެންކަމަށް ވިދާޅުވެ، އޭރު ހިނގާދިޔަ ކަންކަން ދިފާއު ކުރައްވައި ރައީސް ޔާމީނު ވަނީ މި ޖަލްސާގައި ވާހަކަ ދައްކަވާފައެވެ.
ރައީސް ޔާމީނު ވިދާޅުވީ، އެބޭފުޅުންނަށް އޭރު ފައިސާ ލިބިފައިވަނީ ކިހިނެއްކަންވެސް ސާފު ކުރެއްވި ކަމަށެވެ. ސުޕްރީމްކޯޓުގެ ބެންޗުން ފާސްކޮށްގެން މެނުވީ އެއްވެސް ފަނޑިޔާރަކު ތަހުގީގީ އިދާރާއަކަށް ހާޒިރު ނުކުރެވޭނެކަމަށް އޭރު ފާސްކުރިކަން ފާހަގަ ކުރައްވައި ޔާމީނު ވިދާޅުވީ، އެއީ ސީދާ ޖޭއެސްސީގެ މަސައްކަތްތަކަށް ހުރަސްއެޅުން ކަމަށެވެ. ވީއިރު މި ކަންކަން ބެލުން އޭރު ލާޒިމުވެގެން ދިޔަ ކަމަށާއި، އެ މާއްދާ އުވާލުމަށްޓަކައި ކުއްލި ނުރައްކަލުގެ ޙާލަތު އިއުލާނު ކުރުމަށް މަޖުބޫރުވީކަމަށް ރައީސް ޔާމީނު ވިދާޅުވިއެވެ.
ސުޕްރީމްކޯޓުގެ ފުރާޅުން ޓިނު ނަގަން ޖެހުނީ އެހެންވެކަމަށް ޔާމީނު ވިދާޅުވުމާއި ގުޅިގެން ޑިފެންސް މިނިސްޓަރ މާރިޔާ އަހުމަދު ދީދީ ކުރެއްވި ޓްވީޓެއްގައި ވަނީ ރައީސް ޔާމީނުގެ މައްޗަށް އިއްވާފައިވާ ޖަލު ޙުކުމް ބާތިލުކޮށް ސުޕްރީމްކޯޓުން ކުރި ޙުކުމުގައި އެމަނިކުފާނު ކަންތައް ކުރެއްވީ ޤައުމެއްގެ ރައީސަކު ކަން ކުރައްވާނެ ގޮތަކަށް ނޫންކަމަށް ބަޔާން ކުރައްވާފައިވާ ކަމަށެވެ. ވީއިރު މި ޙާލަތުގައިވެސް ޗެކް ނަންބަރެއް ދިމާނުވެގެން އެމަނިކުފާނު ދޫވުމަކީ ކުއްލި ނުރައްކަލުގެ ޙާލަތު އިއުލާނުކޮށް ރައީސް ޔާމީނު ޖަލަށް ލުން ހުއްދަ ކުރާ ކަމެއްތޯ މާރިޔާ ސުވާލު ކުރެއްވިއެވެ.
އޭގެ އިތުރުން، އެކައުންޓުގައި އާމްދަނީއާ ނުބައްދަލު ފައިސާ ހުރި ނަމަވެސް ޤާނޫނުން ސާބިތު ނުވާތީ އެމަނިކުފާނު ދޫކޮށްލައްވަން ޙުކުމް ކުރެއްވި ފަނޑިޔާރުންނަށް އެމަނިކުފާނުގެ ވެރިކަމެއްގައި ނަމަ، ކުއްލި ނުރައްކަލުގެ ޙާލަތު ހިންގައި، ކޯޓުގެ ފުރާޅުން ޓިނު ނަންގަވާނެތޯވެސް މާރިޔާ ސުވާލު ކުރެއްވިއެވެ.
މަނީ ލޯންޑަރިންގ ގެ ދައުވާއިން ޔާމީނު މިނިވަންވެވަޑައިގަތީ އެ ފައިސާ ޖަމާކުރި ޑިޕޮސިޓް ސްލިޕްގައި، މޮރިޝަސް ކޮމާޝަލް ބޭންކްގެ އެކައުންޓުން ދޫކޮށްފައިވާ ކަމަށް ބުނާ ޗެކް ނަންބަރާއި، އެ މައްސަލައިގައި ހުށަހަޅާފައިވާ އެސް.އޯ.އެފްގެ އެކައުންޓް ސްޓޭޓްމަންޓްގައި 11 އޮކްޓޯބަރ 2015 ގައި އެ ކައުންޓަށް ޖަމާވި އެއްމިލިޔަން ޑޮލަރުގެ މުޢާމަލާތުގެ ތަފުސީލުގައި ހިމެނިފައިވާ ޗެކް ނަންބަރު ދިމާނުވާތީއެވެ. އެހެންނަމަވެސް، ޔާމީނުގެ އެކައުންޓަށް ޖަމާވި އެއްމިލިޔަން ޑޮލަރަކީ ކޮން ގޮތަކުން ޖަމާވެފައިވާ ފައިސާއެއްކަން ކަށަވަރު ނުވާކަމަށްވެސް ސުޕްރީމްކޯޓުގައި މައްސަލަ ބެއްލެވި 3 ފަނޑިޔާރުން ދެކިވަޑައިގަންނަވައެވެ. އަދި އެސްއޯއެފަކީ ދަންނަ ކުންފުންޏެއް ނޫންކަމަށް ޔާމީނު ވިދާޅުވި ނަމަވެސް، އެ ކުންފުނިން ޖަމާކުރި ފައިސާ ހިމަނައިގެން އިންވެސްޓު ކުރައްވައި ފައިދާ ހޯއްދެވިކަން އެނގެން އޮންނަކަމަށް ފަނޑިޔާރުން ވިދާޅުވެއެވެ.
ސުޕްރީމްކޯޓުގެ ޙުކުމުގައިވެސް ވަނީ ޔާމީނު ކަން ކުރެއްވީ ވެރިއަކު ކުރައްވަންޖެހޭ ގޮތަކަށް ނޫންކަމަށް ބަޔާން ކުރައްވާފައެވެ. އެގޮތުން އެ ފައިސާއަކީ އަދީބު ދިން ފައިސާއެއްކަމަށް ޤަބޫލު ކުރައްވައިގެން ކުރެއްވި އިންވެސްޓްމަންޓެއް ކަމަށް ޔާމީނު ވިދާޅުވި ނަމަވެސް، އެއީ އެ ފައިސާއާމެދު ކަންތައް ކުރައްވަން ޖެހިވަޑައިގަންނަވާ ގޮތް ނޫންކަމަށް ފަނޑިޔާރުން ދެކިވަޑައިގަންނަވައެވެ.
