ކ.ގާފަރުގައި ފުލުހުންގެ ޚިދުމަތް ރަސްމީކޮށް ފަށައިފިއެވެ.
މިކަމަށްޓަކައި ގާފަރުގައި ބޭއްވި ޚާއްސަ ރަސްމިއްޔާތު ޝަރަފުވެރި ކޮށްދެއްވީ, ހޯމް މިނިސްޓަރު އިމްރާން އަބަދުاللهއެވެ. މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރި ވިދާޅުވީ, ގާފަރުގައި ހުޅުވިގެން މިދިޔަ ޕޮލިސް ޕޯސްޓާއެކު ރަށަށް އުފާވެރިކަން ލިބިގެންދާނެ ކަމަށެވެ. ރަށަށް އަންނަ ތަރައްގީއާ ގުޅިލާމެހިގެން ރަށަށް އަމާންކަން ލިބިގެން ދިޔުމަކީ ރަށުގައި ދިރިއުޅޭ ރައްޔިތުންނަށް ލިބިގެންދާނެ ބޮޑު ހިތްހަމަ ޖެހުމެއް ކަަމަށެވެ. އަތޮޅުތެރޭގެ ތަރައްގީގެ އެންމެ މުހިންމު ކަމަކީ, އަމާންކަން ގާއިމްވެގެން ދިޔުން ކަމަށާއި, ތަރައްގީގެ ފުރިހަމަ ހިތްހަމަ ޖެހުން ރައްުޔިތުންނަށް ލިބިގެންދާނީ އޭރުން ކަމުގައި މިނިސްޓަރު ވިދާޅުވިއެވެ.
ރަށްރަށުގައި ސުލްޙަ ގާއިމްވެ މުއައްސަސާތައް އެކުގައި މަސައްކަތް ކުރުމަކީ މުހިންމު ކަމެއްކަން މިނިސްޓަރު ފާހަގަކުރެއްވިއެވެ. ކ އަތޮޅުގައި މިހާރު ފުލުހުންގެ ޚިދުމަތް ނުދެވި އޮތީ އެންމެ ރަށެއްގައި ކަމަށާއި, އެ ރަށުގައިވެސް ފުލުހުންގެ ޚިދުމަތް ވަރަށް އަވަހަށް ފެށިގެން ދާނެކަމަށް މިނިސްޓަރު ވިދާޅުވިއެވެ.
ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ގާއިމް ކުރުމަށް ހޯމް މިނިސްޓްރީން ގެންދަނީ މަސައްކަތް ކުރަމުންނެވެ. ފުލުހުންގެ އައު ގާނޫނާއެކު ރައްޔިތުންނާ ގާތުން މަސައްކަތްކޮށް ރަށްރަށުގައި އަމާން ވެށްޓެއް ގާއިމް ކުރުމަކީ ސަރުކާރުގެ އަމާޒެކެވެ.
ޕޮލިސް ޕޯސްޓް ހުޅުވުމުގެ ރަސްމިއްޔާތުގައި ހޯމް މިނިސްޓަރުގެ އިތުރުން ކޮމިޝަނަރު އޮފް ޕޮލިސް މުހައްމަދު ހަމީދާއި ފުލުހުންގެ އިސްވެރިން ބައިވެރިވެވަޑައިގެންނެވިއެވެ.
ގާފަރުގެ ޕޮލިސް ޕޯސްްޓް ހުޅުވުމުގެ ރަސްމިއްޔާތަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި, ނައިބް ރައީސް ފައިސަލް ނަސީމްވެސް ވަޑައިގެން ޕޮލިސް ޕޯސްޓް ބައްލަވާލެއްވިއެެވެ.
