ގާފަރު އައިސް ޕްލާންޓް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ހުޅުވައިދެއްވައިފިއެވެ.
ރަޢްޖޭގެ 41 ވަނަ މަސްވެރިންގެ ދުވަސް ރަސްމީކޮށް ކ.ގާފަރުގައި ފާހަގަކުރުމުގެ ގޮތުން ގިނަ ހަރަކާތްތަކެއް އަންނަނީ ހިންގަމުންނެވެ. ގާފަރުގައި ހިންގާ ހަރަކާތްތަކުގައި ބައިވެރިވެވަޑައިގަތުމަށް ރައީސުލްޖުމްހޫއިއްޔާ އިބްރާހިމް މުހައްމަދު ސާލިހާއި, ނާއިބުރައީސް ފައިސަލް ނަސީމް ގާފަރަށް ވަޑައިގަތުމުން އެރަށުން ވަނީ ހޫނު މަރުހަބާއެއް ދަންނަވާފައެވެ.
ގާފަރުގެ އައިސް ޕްލާންޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ފިޝަރީޒް މިނިސްޓަރ ޑރ. ހުސައިން ރަޝީދު ހަސަން ވިދާޅުވީ, މަސްވެރިންނަށް ދިމާވާ ދަތިތައް ހައްލު ކުރުމަށް ސަރުކާރުން ކުރާ މަސައްކަތުގެ ނަތީޖާއެއްގެ ގޮތުން މިހާތަނަށް 225 ޓަނުގެ އައިސް އިތުރަށް އުފެއްދޭނެ މަގު ފަހިކޮށްދީފައިވާ ކަމަށެވެ. މި ސަރުކާރު އައިއިރު ރާއްޖޭގައި ހުރީ 1600 ޓަނުގެ އައިސް އުފެއްދޭ ވަސީލަތް ކަމަށާއި, މަސްވެރިންގެ ދުވަހު ހުޅުވި އައިސް ޕްލާންޓްތަކުންވެސް ޖުމްލަ 125 ޓަނުގެ އައިސް އުފެއްދޭނެ ކަމަށެވެ. އަލަށް އައިސް ޕްލާންޓް ހުޅުވާފައިވަނީ ހޯރަފުށި, ފެލިވަރު, މަޑުއްވަރި އަދި ގާފަރުގައެވެ.
ފީއަލީގައި ގާއިމްކުރާ އައިސް ޕްލާންޓް ކުރިއަށް އޮތް 40 ދުވަހުގެ ތެރޭގައި ނިމޭނެ ކަމަށް މިނިސްޓަރ ހުސައިން ރަޝީދު ވިދާޅުވިއެވެ.
ގާފަރުގައި މަސްވެރިންގެ ދުވަަހަށް ޚާއްސަކޮށްގެން ކުރިއަށްގެންދާ މަސް ކެނޑުމުގެ މުބާރާތްވެސް ރައީސުލްޖުމްހޫރިއްޔާ ބައްލަވާލެވިއެވެ. އަދި މަސްވެރިންގެ ދުވަހުގެ މުނާސަބަތުގައި އެ ރަށުގައި އޮތް އެކްސްޕޯއަށްވެސް ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނާއިބު ޒިޔާރަތް ކުރެއްވިއެވެ.
