ސަރުކާރާ ހަވާލުވިއިރު، މަސްވެރިންނަށް ދޭންޖެހޭ ފައިސާ ހުރީ، ބެޔަސް ނުދީ - އަދިހަމަ ނުބެޔަސް ނުދީ
އިތުރު 12 އަތޮޅެއްގައި ޖުމްލަ 18 އައިސް ޕްލާންޓް ގާއިމުކުރުމުގެ މަސައްކަތް ކުރިއަށްދާނެ
މަސްވެރިންގެ ދުވަހުގެ ޚާއްސަ ޖަލްސާގެ ތެރެއިން
ސަރުކާރާ ހަވާލުވިއިރު، މަސްވެރިންނަށް ދޭންޖެހޭ ފައިސާ ހުރީ، ބެޔަސް އަދި ނުބެޔަސް ނުދީ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މަސްވެރިންގެ ދުވަހުގެ ޚާއްސަ ޖަލްސާގައި ގާފަރުގައި ވާހަކަފުޅު ދައްކަވަމުން ރައީސް ވިދާޅުވީ, މަސްވެރިންނަށް އަވަހަށް ފައިސާދިނުން އެއީ، ސަރުކާރުގައިތަރުތީބުގައި ނަމްބަރު އެކެއް ކަމަށެވެ. މި ސަރުކާރު ވެރިކަމަށް އައި އިރު، މަސްވެރިން އެންމެ ބޮޑަށް ކުރަމުން އައި އެއް ޝަކުވާއަކީ، ކިރާ މަހަށް، އަވަހަށް ފައިސާ ނުލިބުމުގެ ޝަކުވާ ކަމަށެވެ. ކޮންމެ މީހަކުވެސް ކުރާ މަސައްކަތެއް ކުރުމުގެ ބޭނުމަކީ، އެއާ އެކަށޭނަ އަގު، ނުވަތަ އުޖޫރަ ލަސްނުވެ ލިބުން ކަމަށް ރައީސް ވިދާޅުވިއެވެ. ދުވަހުން ދުވަހަށް އަދި މަހުން މަހަށް، މަހުގެ އަގު ނުލިބުމުގެ ދައްޗާ ތަކުލީފު މަސްވެރިން އުފުލަން ޖެހުމަކީ، ވެގެންވާނެ ގޮތެއްނޫން ކަމަށާއި, އެތައް ދުވަހަކު ކަނޑުމަތީގައި އުޅުމަށްފަހު، ޢާއިލާއާއެކު ރަށުގައި ހުންނަ ދުވަހު، އެފިކުރު މަސްވެރިންނަށް އޮވެގެން ނުވާނެ ކަމަށް ރައީސް ވިދާޅުވިއެވެ.
މަހުގެ އަގާ ގުޅޭ އެންމެ ބޮޑު އެއް ކަމަކީ މަހުގެ ކޮލިޓީ ކަމަށާއި, އެކޮލިޓީ އެގޮތުގައި ހިފެހެއްޓުމަށްޓަކާ ވަށާޖެހޭ ނިޒާމެއް ބިނާ ކުރައްވަމުން ގެންދަވާކަން ރައީސް ފާހަގަ ކުރެއްވިއެވެ. އެގޮތުން، މަސްވެރިންނަށް ދިމާވެފައިވާ އައިސް ލިބުމުގެ މައްސަލައަށް ހައްލެއް ހޯދުމަށް ސަރުކާރުން ބޮޑު އިންވެސްޓެއް ކޮށް ރާއްޖޭގެ އެކި ކަންކޮޅުތަކުގައި އައިސްޕްލާންޓް ގާއިމުކުރުމުގެ މަސައްކަތް ބާރަށް ކުރިއަށްދާ ކަމަށް ވިދާޅުވިއެވެ. ރ.މަޑުއްވަރީ އަދި ހއ.ހޯރަފުށީ އައިސްޕްލާންޓް ނިމި, ފެލިވަރުގައި އިތުރު 50 ޓަނުގެ އައިސްޕްލާންޓެއް ވަނީ ގާއިމުކުރެވިފައި ކަމަށާއި, އިތުރު 12 އަތޮޅެއްގައި ޖުމްލަ 18 އައިސް ޕްލާންޓް ގާއިމުކުރުމުގެ މަސައްކަތް ކުރިއަށްދާނެ ކަމަށް ރައީސް ވިދާޅުވިއެވެ.
އަލަށް ހުޅުވުނު އައިސް ޕްލާންޓް ތަކާއެކު، އަދި އިތުރަށް ގާއިމުކުރެވޭ އައިސް ޕްލާންޓްތައް ނިމުމުން، ހެޔޮބަދަލަކުން ބޮޑުތަފާތެއް ފެންނާނެ ކަމަށާއި, އޭރުން މަހެއްގެ މައްޗަށް ޖުމްލަ 15000 ޓަނަށް ވުރެ ގިނައިން އައިސް އުފެއްދޭނެ ގާބިލްކަން ދިވެހި މަސްވެރިކަމުގެ ސިނާޢަތަށް އިތުރުވެގެންދާނެ ކަމަށް ރައީސް ވިދާޅުވިއެވެ.
ކޯވިޑް-19 ގެ ޢާލަމީ ބަލިމަޑުކަމުގައި، މުޅިދުނިޔެއާ ރާއްޖެ ހުއްޓިގެން ދިޔައިރުވެސް ނުހުއްޓި ހިނގާހިނގާ އޮތް އިގްތިޞޯދުގެ ލޭނާރަކަށްވީ މަސްވެރިކަން ކަަމަށާއި, މިޞިނާޢަތުގެ ވަރުގަދަކަމާ، މަސްވެރިކަމާ ދިވެހިންނާ އޮތް ގުޅުމަކީ، ސިޔާސީ މީހުންގެ އިންތިޚާބީ ހަތިޔާރަކަށް މަސްވެރިކަން ހަދާ ސަބަބު ކަމަށް ރައީސް ވިދާޅުވިއެވެ. އެހެންނަމަވެސް މައުނަވީ ގޮތެއްގައި، އިޚްލާޞްތެރި ނިޔަތަކާ އެކު، ދެމެހެއްޓެނިވި މަސްވެރި ޞިނާޢަތަކަށް ދެވިފައިއޮތް ސަމާލުކަން ކުޑަ ކަމަށާއި, މިސަބަބަށްޓަކާ، ސަރުކާރާ ހަވާލުވެ ހިފި މިސްރާބު ތަފާތު ކަަމަށް ވިދާޅުވިއެެވެ. ރައީސް ވިދާޅުވީ, ހިސާބު އަދަދުން ބެލިޔަސް، އޭގެ ވަރަށް ބޮޑު ފަރަގު ފެންނަން މިއަދު އެބަހުރި ކަމަށާއި, ސިޔާސަތުން ފެންނަ ބަދަލު ގޮސްނިމޭނީ، އިހަށް ކުރަންވާ ކަންތައް އިހަށް ނިންމާ އުޞޫލަށް ކަމަށެވެ.
