ޕްރެކްޓިސް ޕާލަމަންޓް ފޯރ ޔޫތު ނިންމުމުގެ ރަސްމިއްޔާތު ބާއްވައިފިއެވެ.
ޕްރެކްޓިސް ޕާލަމަންޓް ފޯރ ޔޫތުގައި 40 ޒުވާނުން ވަނީ ބައިވެރިވެފައެވެ. މި ޒުވާނުންނަށް ސެޓްފިކެޓް ހަވާލުކޮށްދެއްވީ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމެވެ.
ރަސްމިއްޔާތުގައި ވާހަކަ ދައްކަވަމުން އާޒިމް ވިދާޅުވީ ޒުވާނުންނަކީ ސިޔާސީ ކަންކަމަށް ޝައުޤުވެރިކަން ހުރި، އެ މަގުން ކުރިއަށްދާން ބޭނުންވާ ބަޔަކަށްވުމުން އުފާކުރައްވާ ކަމަށެވެ. އާޒިމް ވިދާޅުވީ މަޖިލީހުގައި ތިބި އަންހެނުންނާއި ޒުވާނުންގެ އަދަދު މަދު ކަމަށެވެ. އަންހެނުންނާއި ޒުވާނުން ސިޔާސީ ކަންކަމަށް ކުރިމަތިލާން ފަސްޖެހޭކަން ފާހަގަކުރައްވައި އާޒިމް ވިދާޅުވީ، އެކަން އެގޮތަށް ވަނީ ބަލިވެދާނެކަމަށް ބިރުގަތުމާއި މީހުން ކިޔާފާނެ އެއްޗެކަށް ފަސްޖެހޭތީ ކަމަށެވެ.
އާޒިމް އިތުރަށް ވިދާޅުވީ، ރާއްޖޭގެ ސިޔާސީ ކަންކަން ބައްޓަންކުރުމަށް ތިބީ ޒުވާނުން ކަމަށާއި މީހުން ކިޔާފާނެ އެއްޗަކަށް ފަސް ޖެހުމެއް ނެތި ކުރިއަށްދާން އަޒުމް ކަނޑައަޅަން ޖެހޭނެ ކަމަށެވެ.
ސިޔާސީ ދާއިރާއަށް ޒުވާނުން އަހުލުވެރި ކުރުވުމަކީ މިފަދަ ޕްރޮގްރާމެއް ކުރިއަށް ގެންދިޔުމުގެ މައިގަނޑު މަގްސަދު ކަމަށާއި، މި ޕްރޮގްރާމްގެ ޒަރިއްޔާއިން ޒުވާނުން ރައްޔިތުންގެ މަޖިލީހުގެ މަސައްކަތްތަކަށް އަހުލުވެރިކުރެވިގެންދާނެ ކަމަށް ރައްޔިތުންގެ މަޖިލީހުން ބުނެއެވެ. މި ޕްރޮގްރާމްގައި ރާއްޖޭގެ އެކި ކަންކޮޅުތަކުން ހޮވާލެވޭ، ޒުވާނުން ބައިވެރިވާއިރު މިފަދަ ޕްރޮގްރާމަކުން ލިބޭ އާރޯ ޚިޔާލަކީ ޒުވާނުންނަށް ލިބޭ ވަރަށް ބޮޑު ކުރިއެރުމެއް ކަމަށް ވެސް ވަނީ ބުނެފައެވެ.
ޕްރެކްޓިސް ޕާލަމެންޓް ސީރީޒްއަކީ ރައްޔިތުންގެ މަޖިލީހުގެ އިދާރާއާއި ޔޫއެންޑީޕީ މޯލްޑިވްސް ގުޅިގެން, އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާރޒް އެންޑް ޓްރޭޑްގެ އެހީތެރިކަމާއެކު ހިންގާ ޕްރޮގްރާމެކެވެ. މި ޕްރޮގްރާމްގައި ހިމެނެނީ މައިގަނޑު 2 ބައެވެ. އެއީ، "ޕްރެކްޓިސް ޕާލަމެންޓް ފޯރ ޔޫތު" އަދި "ޕްރެކްޓިސް ޕާލަމެންޓް ފޯރ ވިމެން"އެވެ. މިޕްރޮގްރާމްގެ މައިގަނޑު މަގުސަދަކީ ޒުވާނުންނާއި އަންހެނުން ސިޔާސީ ހަރަކާތްތަކުގައި ބައިވެރިވުމަށް ހިތްވަރުދީ، އެހީތެރިވެ, އަދި ކުރިމަގުގައި ސިޔާސީ މަގާމުތަކަށް ކުރިމަތިލުމަށް ބާރުއެޅުމެވެ.
"ޕްރެކްޓިސް ޕާލަމެންޓް ފޯރ ޔޫތު"ގައި 3 ބައެއް ހިމެނެއެވެ. އެއީ; ޕޮލިސީތަކާއި، މަޖިލީހުގެ މަސައްކަތްތައް ކުރިއަށްދާ ގޮތުގެ މައުލޫމާތު ދިނުމުގެ ސެޝަންއަކާއި، ރައްޔިތުންގެ މަޖިލީހުގެ ނަމޫނާ މާދިރީއެކެވެ.
