މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ބެލުމުގެ ދަށުގައި އޮތް ޓީޖެޓީ އެކުންފުނީގެ އަތުން އަތުލެވޭނީ ހަމައެކަނި ހައުސިން މިނިސްޓްރީއަށް ކަމަށް އެ ކުންފުނިން ބުނެފިއެވެ.

އެމްޕީއެލްއިން މިފަދައިން ބުނީ އެ ކުންފުނީގެ ބެލުމުގެ ދަށުގައި އޮތްް ޓީޖެޓީ މާލެ ސިޓީ ކައުންސިލްގެ ދަށަށް ގެންދާނެ ކަމަށް އެ ކައުންސިލުން ބުނުމާ ގުޅިގެންނެވެ.

އެމްޕީއެލްއިން ބުނީ އެ ކުންފުންޏާ ޓީޖެޓީ ހަވާލުކޮށްފައިވަނީ އެމްއޯޔޫއެއްގައި ސޮއިކޮށް 2015 ވަނަ އަހަރު ހައުސިންގ މިނިސްޓްރީން ކަމަށެވެ. އެތަން އެމްޕީއެލްގެ އަތުން ނެގުމުގެ ބާރު އޮންނާނީ ހައުސިންގ މިނިސްޓްރީއަށް ކަމަށް އެމްޕީއެލްއިން ބުނެފައިވެއެވެ.

އަދި ހައުސިން މިނިސްޓްރީއާ އެމްޕީއެލްއާ ދެމެދު ސޮއިކޮށްފައިވާ އެމްއޯޔޫގެ މުއްދަތު ހަމަވެފައިވާކަމަށް މީޑިއާގައި ދެކެވެމުންދާ ވާހަކަތަކާ ގުޅިގެން އެކުންފުނިން ބުނީ އެ ދެ ފަރާތުން ސޮއިކޮށްފައިވާ އެމްއޯޔޫގައި އެއްވެސް މުއްދަތެއް ބަޔާންކޮށްފައި ނުވާ ކަމަށެވެ.

މާލޭ ސިޓީ ކައުންސިލްގެ 4 ވަނަ ދައުރުގެ 30 ވަނަ ޖަލްސާގައި ވަނީ ޓީޖެޓީ މާލެ ސިޓީ ކައުންސިލާ ހަވާލުކުރުމަށް ދީފައިވާ 90 ދުވަހުގެ މުއްދަތު ހަމަވުމުން، އެ މުއްދަތުގެ ތެރޭގައި އެތަން މާލެ ސިޓީ ކައުންސިލާ ހަވާލުނުކޮށްފިނަމަ ކުރަންޖެހޭ ހުރިހާ ކަމެއް ކުރުމަށް ފާސްކޮށްފައެވެ. ޓީޖެޓީ ހުސްކުރުމަށް މާލެ ސިޓީ ކައުންސިލުން އެމްޕީއެލްއަށް ދީފައިވާ 90 ދުވަހުގެ މުއްދަތު ހަމަވާނީ އަންނަ އާދިއްތަ ދުވަހަށް ކަމަށް މާލެ ސިޓީ ކައުންސިލުން ބުނެފައިވެއެވެ.

މި މުއްދަތު ހަމަވުމުން މާލެ ސިޓީ ކައުންސިލުން އެތަނާ ހަވާލުވުމަށް ކުރެވެން ހުރި ހުރިހާ ކަމެއް ކުރުމަށް ހުށަހަޅާފައިވަނީ މާލެ ސިޓީގެ ޑެޕިއުޓީ މޭޔަރ އަހުމަދު ނަރީޝްއެވެ. ނަރީޝްގެ މި ހުށަހެޅުމަށް ސިޓީ ކައުންސިލްގެ ގިނަ ކައުންސިލަރުން ވަނީ ތާއީދުކުރައްވާފައެވެ.

މި ހުށަހެޅުން ފާސްވުމާއެކު މާލެ ސިޓީގެ މޭޔަރ ޑރ. މުހައްމަދު މުއިއްޒު ވަނީ މި މުއްދަތު ހަމަވުމުން އެތަން ސިޓީ ކައުންސިލްގެ ދަށަށް ގެނައުމަށް ކުރަންޖެހޭ ހުރިހާ ކަމެއް ކުރުމަށް ކައުންސިލްގެ ސެކެޓްރީ ޖެނެރަލްއަށް އަންގަވާފައެވެ.

ޓީޖެޓީ ބެލެހެއްޓުމަށް އެމްޕީއެލްއާ ހަވާލުކޮށްފައިވަނީ މިހާރުގެ މޭޔަރ ޑރ. މުއިއްޒު ހައުސިން މިނިސްޓަރ ކަމުގައި ހުންނެވި އިރު 2015 ވަނަ އަހަރުގެ މާޗް 12 ގައެވެ. މިފަހަކުން ބޭއްވި ނޫސްވެރިންގެ ބައްދަލުވުމެއްގައި މޭޔަރ ޑރ. މުއިއްޒު ވަނީ އެތަން އަނބުރާ މާލެ ސިޓީ ކައުންސިލްގެ ބެލުމުގެ ދަށަށް ގެނައުމަށް އެތައް ފަހަރެއްގެ މަތިން ސަރުކާރުގައި އެދިފައިވާނެ ކަމަށް ވިދާޅުވެފައެވެ. އެހެންނަމަވެސް އެތަން ސިޓީ ކައުންސިލާ ހަވާލުކޮށްފައިނުވާކަމަށެވެ.

މިގޮތަށް އެދިފައިވަނީ އެ ބަނދަރުން ލިބޭ އާމްދަނީން މާލޭގެ ރައްޔިތުންނަށް ފައިދާކުރަނިވި އެތައް ކަމެއް ސިޓީ ކައުންސިލަށް ކުރެވޭނެތީ ކަމަށް ޑރ. މުއިއްޒު ވިދާޅުވިއެވެ. އެގޮތުން އެ ފައިސާއިން ކުނި މެނޭޖްކުރުން ފަދަ ކަންކަމަށް ޚަރަދުކުރެވޭނެ ކަމަށް މޭޔަރ ޑރ. މުއިއްޒު ވިދާޅުވިއެވެ.

އަދި ހުރިހާ ރަށެއްގެވެސް ބަނދަރުތަކަކީ ކައުންސިލްތަކުގެ ބެލުމުގެ ދަށުގައި އޮންނަ ތަންތަނަށް ވެފައި، ޓީޖެޓީ އެމްޕީއެލްއަށް ދޭން ސަރުކާރުން ދެކޮޅުހެދުމަކީ ލާމަރުކަޒީ ގާނޫނާ ޚިލާފަށް ނިންމެވި ނިންމެވުމެއް ކަމަށް ޑރ. މުއިއްޒު ވިދާޅުވެފައިވެއެވެ.