މަސްވެރިންގެ ފޯރަމް ފަށައިފި

މަސްވެރިންގެ ފޯރަމް ފަށައިފިއެވެ. މި ފޯރަމް އިފްތިތާހުކޮށްދެއްވީ، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަނެވެ.

މި ފޯރަމް އިފްތިތާހު ކޮށްދެއްވަމުން އެމަނިކުފާނު ވިދާޅުވީ، މިވަގުތުވެސް ދިވެހިރާއްޖޭގެ މަސްވެރިކަމުގެ ސިނާއަތުގައި ހައްލުކުރަންޖެހޭ ގިނަ މައްސަލަތަކެއް ހުރިކަން ގަބޫލުފުޅު ކުރައްވާ ކަމަށާއި، އެގޮތުން މި ސިނާއަތުގައި އެންމެ އިސްކަމެއް ދޭންޖެހޭ ކަމަކީ މަސްވެރިންނަށް ހަމައަގު ހޯދައި ދިނުމަށް ކުރަންޖެހޭ މަސައްކަތްތައް ކަމަށެވެ. އެކަމަށް އޮތް ގޮންޖެހުންތަކާއި ކުރަންޖެހޭ މަސައްކަތްތައް ވެސް ގިނަކަން ފާހަގަކުރައްވަމުން މިނިސްޓަރ ވިދާޅުވީ، ހަމައަގު ލިބުމަށް އޮތް އެންމެ ބޮޑު ގޮންޖެހުމަކީ ޔޫރަޕިއަން ޔޫނިއަންގެ ގައުމުތަކަށް ދިވެހިރާއްޖެއިން މަސް އެކްސްޕޯޓްކުރުމަށް ނަގާ ޑިއުޓީ ބޮޑުވުންކަމަށެވެ. އެހެންކަމުން އެކަން ހައްލުކުރުމަށް މިހާރުވެސް ގިނަ މަސައްކަތްތަކެއް ކުރެވެމުންދާކަމަށް މިނިސްޓަރ ފާހަގަކުރެއްވިއެވެ.

މި މަހުގެ 12 ވަނަ ދުވަހުން ފެށިގެން ދެ ދުވަހުގެ މުއްދަތަށް ގާފަރުގައި ކުރިއަށްދާ މި ފޯރަމްގެ ސެޝަން މައިގަނޑު ގޮތެއްގައި މަޝްވަރާކޮށްފައިވަނީ މަސްވެރިކަމުގައި ހުރި ގޮންޖެހުން ތަކަށެވެ. އެގޮތުން، މަސްވެރިންނަށް ހަމައަގު ހޯދައިދިނުމުގައި ހުރި ގޮންޖެހުންތަކަށާއި، މަތީ އަގު ލިބޭ ލިބޭ ޕްރިމިއަމް މާކެޓުތަކަށް ރާއްޖޭގެ މަސް ވިއްކުމަށް އޮތް ފުރުސަތު ހަނިވަމުންދާ މައްސަލައިގެ މައްޗަށާއި، ތެލުގެ އަގު އުފުލުމާއި، މަސްވެރިކަން ކުރުމުގެ ޚަރަދު ނިސްބަތުން ބޮޑުވުމުގެ މައްޗަށެވެ. މީގެއިތުރުން މަހުގެ ކޮލިޓީ ނިސްބަތުން އަދިވެސް ދަށް ކަމަށާއި މަސްވެރިން ބާނާ މަހުގެ ނިސްބަތުން ބޮޑު މިންވަރެއް، މަތީ އަގު ލިބޭ ގޮތަށް ޕްރޮސެސްނުކޮށް، ރޯ މެޓީރިއަލްގެ ގޮތުގައި އެކްސްޕޯޓް ކުރަން ޖެހިފައިވާ ޖެހުމުގެ މައްޗަށް ވެސް، ފޯރަމްގައި މަޝްވަރާތައް ކުރިއަށް ދިޔައެވެ.

ދެމެހެއްޓެނިވި ގޮތުގައި، ދޮށިން، އަދި އަތުނަނުގައި ބާނާ މަހަށް ލިބެމުން އައި ޕްރިމިއަމް އަގު ގެއްލެމުން ދިޔުމާއި، އިންޑިއާ ކަނޑުގައި މަސްވެރިކަން ކުރާ ރާއްޖެއާ ވާދަވެރި ބައެއް ގައުމުތަކަށް ރާއްޖެއަށް ވުރެ ކުޑަ އަގެއްގައި އިމްޕޯޓް މާކެޓްތަކަށް މަސް ވިއްކޭކަން ފާހަގަކޮށް މަސްވެރިކަން ތަރައްގީކުރުމުގައި އެކަންތައްތަކަށް އަލިއަޅުވާލާނެ ގޮތާ ގުޅޭގޮތުން މަޝްވަރާ ކޮށްފައިވެއެވެ. އަދި މީގެ އިތުރުން، އެންވެރިކަމުގައި ހުރި ގޮންޖެހުންތަކާއި، ދުނިޔޭގެ މޫސުމަށް އަންނަ ބަދަލާ ގުޅިގެން ކަނޑުގެ މާހައުލަށް އަންނަ ބަދަލުތަކުގެ ސަބަބުން މަސްވެރި ކަމަށާއި އެންވެރި ކަމަށް އަންނަ ގޮންޖެހުންތަކުގެ މައްޗަށް ވެސް ފޯރަމްގައި ވާހަކަދައްކާފައިވެއެވެ.

މަސްވެރިންގެ ދުވަހުގެ މުނާސަބަތުގައި މަސްވެރިންނަށް ޚާއްސަކޮށްގެން މިފަދަ ފޯރަމެއް ބޭއްވުމުގެ މައިގަނޑު މަގުސަދަކީ މަސްވެރިކަމުގައި ދިމާވަމުންދާ ގޮންޖެހުންތަކާއި، ހުރި ކަންބޮޑުވުތަކާ ގުޅޭގޮތުން ފުޅާދާއިރާއެއްގައި މަޝްވަރާކޮށް، އެކަންބޮޑުވުންތަކަށް ހައްލު ހޯދައިދިނުމަށްޓަކައި މަސައްކަތް ކޮށްދެއްވުން ކަމުގައި މަސްވެރިކަމާ ބެހޭ ވުޒާރާއިން ބުންޏެވެ.

ފޯރަމްގައި، ރާއްޖޭގެ އެކި ކަންކޮޅުތަކުގައި ހަރަކާތްތެރިވާ މަސްވެރިންނާއި، މި ސިނާޢަތުގައި ހަރަކާތްތެރިވާ މަސްކުންފުނިތަކުގެ އިސް ބޭފުޅުނާއި ސިނާއަތުގެ ފަންނީ މާހިރުން ވެސް ބައިވެރިވެވަޑައިގެންނެވިއެވެ.