މަސައްކަތުގެ މާހައުލުގައި ބައިވެރިކޮށްގެން ޒުވާނުން ތަމްރީނު ކުރުމުގެ އެއްބަސްވުމެއްގައި ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން ޔޫތު މިނިްސްޓްރީއާ އެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމަކީ ޔޫތު މިނިސްޓްރީން ކުރިއަށް ގެންދާ ނެޝަނަލް އެޕްރެންޓިސްޝިޕް ޕްރޮގްރާމްގައި ވެމްކޯއިން ބައިވެރިވެ ޒުވާނުން ތަމްރީނު ކުރުމަށް އެކުލަވާލި އެއްބަސްވުމެކެވެ. ވެމްކޯގެ ފަރާތުން މި އެއްބަސްވުމުގައި ސޮއި ކުރެއްވީ އެކުންފުނީގެ މެނޭޖިންގ ޑިރެކްޓަރ އާދަމް މުހައްމަދެވެ. ޔޫތު މިނިސްޓްރީގެ ފަރާތުން ސޮއިކުރެއްވީ މިނިސްޓްރީގެ ސްޓޭޓް މިނިސްޓަރު ހުސައިން އިސްމާއިލެވެ.

މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ ނެޝަނަލް ކޮމްޕިޓެންސީ ސްޓެންޑަޑްތަކަށް ފެތޭ ގޮތަށް ކުރިއަށް ގެންދާ މި އެއްބަސްވުމުގެ ދަށުން މަސައްކަތުގެ މާހައުލުގައި ބައިިވެރިކޮށްގެން 29 ޒުވާނުން ތަމްރީނު ކުރުމަށް ވަނީ ހަމަޖެހިފައެވެ.

ވެމްކޯއިން ޒުވާނުން ތަމްރީނު ކުރާ ދާއިރާތަކުގެ ތެރޭގައި ހިމެނެނީ ސެޓްފިކެޓް ތިނެކުން ކޭޝިއަރިން އާއި، ވެލްޑިން ޓެކްނިކްސް އާއި، އިންވެންޓަރީ މެނޭޖްމަންޓްގެ އިތުރުން ހެވީ ވެހިކަލް އޮޕަރޭޝަންސް، މެރިން މެކޭނިކް އަދި އޮޓޯމޯޓިވް މެއިންޓެނަންސް އެވެ.

މި ތަމްރީނުތައް ފުރިހަމަކުރާ ފަރާތްތަކަށް ވެމްކޯއިން ވަޒީފާ ހޯދުމުގެ ފުރުސަތު އޮތްއިރު، މަސައްކަތުގެ މާހައުލުގައި ތަމްރީނު ހާސިލުކުރާ ދުވަސްތަކުގައި މަހަކު 5000 ރުފިޔާގެ އެލަވަންސެއް ދިނުމަށް ވަނީ ނިންމާފައެވެ.