އަތޮޅުތެރޭގައި ތިން ކެޓަގަރީއަކަށް ބަހުގެ ޚިދުމަތް ހިލޭ ދެނީ
8 ޑިސެމްބަރު 2021 | ބުދަ 08:24ޚިދުމަތް ހިލޭ ލިބޭނީ ސްކޫލް ކުދިންނާއި، އިސް ރަށްވެހިންނަށާއި، ޚާއްސަ އެހީއަށް ބޭނުންވާ ފަރާތްތަކަށް
އެމްޓީސީސީގެ ބަސްތަކެއް ބޮޑުތަކުރުފާނު މަގުގައި ޕާކުކޮށްފައި
މިއަންނަ އަހަރުގެ ޖެނުއަރީ މަހުން ފެށިގެން ގްރޭޓާރ މާލެ ސަރަހައްދެކޭ އެއްގޮތަށް އަތޮޅުތެރޭގައިވެސް ތިން ކެޓަގަރީއެއްގެ މީހުންނަށް ބަހުގެ ޚިދުމަތް ހިލޭ ފޯރުކޮށްދިނުމަށް އެމްޓީސީސީން ނިންމައިފިއެވެ.
އެގޮތުން ސްކޫލް ކުދިންނަށާއި، 65 އަހަރުން މަތީގެ އިސް ރަށްވެހިންނަށާއި، ޚާއްސަ އެހީއަށް ބޭނުންވާ ފަރާތްތަކަށް އެމްޓީސީސީގެ އާންމު ދަތުރުފަތުރުގެ ނިޒާމުގައި ހިލޭ ދަތުރުކުރެވޭނެ ގޮތް މިހާރު ވަނީ ހަމަޖެހިފައެވެ.
އެމްޓީސީސީން ފޯރުކޮށްދޭ އާންމު ފެރީ ޚިދުމަތުގައި މީގެ ކުރިންވެސް ސްކޫލް ކުދިންނަށާއި، އުމުރުން 65 އަހަރުން މަތީގެ އިސް ރަށްވެހިންނަށާއި، ޚާއްސަ އެހީއަށް ބޭނުންވާ ފަރާތްތަކަށް ދަތުރުކުރެވެއެވެ. އަދި މި ހަމަޖެހުނު ބަދަލާއެކު މި ފަރާތްތަކަށް ޖެނުއަރީ 2022ން ފެށިގެން އާންމު ބަހުގެ ޚިދުމަތްވެސް ހިލޭ ލިބޭނެއެވެ.
މިވަގުތު އަތޮޅުތެރޭގައި ބަހުގެ ޚިދުމަތް ދެމުން ގެންދަނީ އައްޑޫ ސިޓީގެ ހިތަދޫ އަދި ފޭދޫ އާއި ދެމެދު ސްކޫލް ކުދިންނަށް ޚާއްސަކޮށްގެން ދެވޭ ބަހުގެ ޚިދުމަތެއް ގޮތުގައެވެ. ނަމަވެސް އައްޑޫ، ފުވައްމުލަށް އަދި ލ.އަތޮޅުގެ (ގަން، ފޮނަދޫ، އަދި އިސްދޫ، ކަލައިދޫ) ރަށްތަކުގައި ބަހުގެ ޚިދުމަތް ފެށުމަށްޓަކައި އައު ބަސްތަކެއް ހޯދުމުގެ މަސައްކަތް މިވަގުތު ދަނީ ކުރެވެމުންނެވެ. އައު ބަސްތައް ލިބުމާއެކު ފުވައްމުލަކާއި މި ރަށްތަކުގައިވެސް ބަހުގެ ޚިދުމަތް ސްކޫލް ކުދިންނަށާއި، 65 އަހަރުން މަތީގެ އިސް ރަށްވެހިންނަށާއި، ޚާއްސަ އެހީއަށްބޭނުންވާ ފަރާތްތަކަށް ހިލޭ ލިބޭނެ ކަމަށް އެމްޓީސީސީން މައުލޫމާތުދެއެވެ.
އެމްޓީސީސީން ބުނީ އެކުންފުނީގެ މަގްސަދަކީ ހެޔޮ އަގުގައި ފަސޭހަކަމާއެކު ބޭނުންކުރެވޭ، ކަނޑާއި އެއްގަމުގެ ދަތުރުފަތުރުގެ ޚިދުމަތެއް ރައްޔިތުންނަށް ފޯރުކޮށްދޭ ކުންފުންޏެއް ގޮތުގައި ދެމިއޮތުމެވެ.
