އަންނަ އަހަރު ކުރިއަށް ގެންދާ ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ ބޯހިމެނުމުގެ މަސައްކަތްތަކަށް ތައްޔާރުވަމުންދާ ކަމަށާއި، މުޖުތަމައުގެ ސަމާލުކަން ވަރަށް ބޮޑަށް ހޯދަން ޖެހޭ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓިޝަން އައިޝަތު ހަސަން ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އައިޝަތު ވިދާޅުވީ މިހާރު މިކުރިއަށް ގެންދަނީ ސުވާލު ކަރަދާހުގެ މަސައްކަތް ކަމަށާއި، މި ފަހަރުގެ ބޯހިމަނަނީ ޓެބްލެޓް ބޭނުން ކޮށްގެން ކަމަށެވެ. އަދި ޓެބްލެޓުން ސުވާލު ކަރުދާސްތައް ޓެސްޓު ކުރުމުގެ މަސައްކަތް ކުރިއަށްދާކަން އޭނާ ފާހަގަކުރެއްވިއެވެ.

މިދިޔަ ހަފްތާތެރޭގައި ބޯހިމެނުމުގެ މަސައްކަތުގައި އެކިއެކި ޓީމުތަކުން ގެތަކަށް ޒިޔާރަތްކުރިކަން ފާހަގަކުރައްވައި އައިޝަތު ވިދާޅުވީ ލިސްޓް އެކުލަވާލުމަށް ގޭބިސީތަކުން އެއްބާރުލުން ދިން ކަމަށާއި، އަންނަ ބުރާސްފަތި ދުވަހު އެ ގެތަކަށް ތަފްސީލީ މައުލޫމާތުތައް ނެގުމަށް ޓީމުތަކުން ޒިޔާރަތް ކުރާނެ ކަމަށެވެ. އަދި މާލޭގައި ތަފްސީލީ މައުލޫމާތުތައް ނެގުމުގެ އިތުރުން ރަށްރަށުގައި ކަރުދާސްތައް ޓެސްޓު ކުރެވި މައުލޫމާތުތައް ނަގާނެ ކަމަށް އޭނާ ވިދާޅުވިއެވެ.

މީގެ ކުރީގެ ބޯހިމެނުމުގެ ތަޖުރިބާތަކަށް އަލިއަޅުއްވާލައްވައި އައިޝަތު ވިދާޅުވީ ބިދޭސީންނާއި ގުޅުންހުރި ކަމަކަށްވާއިރު، ބައެއް ގޮންޖެހުންތަކާއި ކުރިމަތިވާ ކަމަށެވެ. އެހެންކަމުން މިމަސައްކަތް ކުރުމުގައި އިމިގްރޭޝަނާއި، އިކޮނޮމިކް މިނިސްޓްރީ އަދިވެސް ކަމާގުޅުން ހުރި ހުރިހާ ފަރާތްތަކެއްގެ އެއްބާރުލުން ބޭނުންވާ ކަމަށް އައިޝަތު ވިދާޅުވިއެވެ. އައިޝަތު ވިދާޅުވީ މީގެ ކުރީގެ ބޯހިމެނުންތަކުގައި ގަވާއިދާ ހިލާފަށް އުޅުނު ބިދޭސީން ފާހަގަކުރެވި، އެމީހުން ފުރުވާލުމުގެ ބައެއް ހާދިސާތައް ހިނގާފައިވާތީ މައުލޫމާތު ދިނުމަށް ދެކޮޅު ހަދާ ކަމަށެވެ.

މީގެ އިތުރުން އައިޝަތު ވިދާޅުވީ ތަފާސްހިސާބުގެ ގާނޫނު އައުމަކީ މި މަސައްކަތަށް ލިބުނު އިތުރު ކުރިއެރުމެއް ކަމަށާއި، މަސައްކަތް ކުރުމަށް އާންމުންގެ ފަރާތުން އެއްބާރުލުން ލިބިގެންދާނެ ކަމަށް އުންމީދު ކުރާ ކަމަށެވެ. އެއީ މައުލޫމާތު ދޭ ފަރާތްތަކަށް ގާނޫނުން ހިމާޔަތް ލިބިގެންވާ ކަމަށް އައިޝަތު ވިދާޅުވިއެވެ. އަދި ވިދާޅުވީ ރާއްޖޭގެ ހުރިހާ ހިސާބެއްގައި މިމަސައްކަތް ކުރިއަށްދާއިރު، މުޅި މުޖުތަމައުގެ ސަމާލުކަން މިކަމަށް ބޭނުންވާ ކަމަށާއި، ގިނަ ބަޔަކަށް މިމައުލޫމާތު ފޯރުކޮށްދޭން ބޭނުންވާ ކަމަށެވެ.

ރާއްޖޭގެ އާބާދީ އާއި މީހުން ދިރިއުޅޭ ތަންތަނުގެ ބޯހިމެނުން 2022 ވަނަ އަހަރުގެ ސެޕްޓެމްބަރ މަހުގެ 17ން 30ށް ބޭއްވުމަށް ހަމަޖެހިފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނެއެވެ.

މިފަހަރުގެ ބޯހިމެނުމުގެ މަސައްކަތަށް 4300 އެނިއުމަރޭޓަރުން ބޭނުންވެއެވެ. އެއީ އަތޮޅުތަކުގައި މަސައްކަތްކުރުމަށް 2200 އަދި މާލޭގައި މަސައްކަތްކުރުމަށް 2100 އެވެ. އެނިއުމަރޭޓަރުން ހޯދުމަށް އަންނަ މަހު އިއުލާން ކުރުމަށް ވަނީ ހަމަޖެހިފައެވެ. ރާއްޖޭގައި ކޮންމެ 10 އަހަރަކުން އެއް އަހަރު ބޯހިމަނައެވެ. އެންމެފަހުން ބޯހިމަނާފައިވަނީ 2014 ވަނަ އަހަރުއެވެ. އެފަހަރުގެ ބޯހިމެނުމުގެ ނަތީޖާ ދައްކާގޮތުން ރާއްޖޭގައި 402،071 މީހުން ދިރިއުޅެއެވެ.

މިފަހަރުގެ ބޯހިމެނުމުގެ ޝިއާރަކީ "މީ އަހަރުމެންގެ ބޯހިމެނުން- އަހަރެންވެސް ބައިވެރިވާނަން" އެވެ.