ނުކުޅެދުންތެރިކަން ހުންނަ މީހުން ބާރުވެރިކުރެވޭނެ ފަދަ ގޮތަކަށް ޕްރޮގްރާމްތައް ހިންގަން ޖެހޭ - ރައީސް
5 ޑިސެމްބަރު 2021 | އާދީއްތަ 07:40ކޮވިޑް-19 ޕެންޑެމިކްގެ ތެރޭގައިވެސް ނުކުޅެދުންތެރިކަން ހުންނަ 25 މީހަކަށް ސަރުކާރުން ވަޒީފާގެ ފުރުސަތު ހޯދައިދީފައިވޭ
"ރިވެލި އެވޯޑް 2021" ހަފްލާގައި ރައީސް ވާހަކަފުޅު ދައްކަވަނީ
ނުކުޅެދުންތެރިކަން ހުންނަ މީހުން ބާރުވެރިކުރެވޭނެ ފަދަ ގޮތަކަށް ޕްރޮގްރާމްތައް ހިންގަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، ރިވެލި އެވޯޑް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވިދާޅުވީ، ނުކުޅެދުންތެރިކަން ހުންނަ މީހުންނަށް ޚާއްސަ ކޮށްގެން ހިންގާ ޕްރޮގްރާމްތައް މިހާރު ހިންގާ ގޮތް ބަދަލުކުރަން ޖެހޭ ކަމަށާއި، އޭގެ ފުރިހަމަ ނަތީޖާ ލިބޭނީ އޭރުން ކަމަށެވެ. އެފަދަ ކުދިން ބާރުވެރި ކުރުވޭނެ ގޮތަށް ޕްރޮގްރާމްތައް ބައްޓަން ކުރަން ޖެހޭނެ ކަމަށެވެ.
ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތް ކުރުމަށް ސަރުކާރުން އިސްކަމެއްދޭ ކަމަށާއި، އެގޮތުން ކޮވިޑް-19 ޕެންޑެމިކްގެ ތެރޭގައި ވެސް ނުކުޅެދުންތެރިކަން ހުންނަ 25 މީހަކަށް ސަރުކާރުން ވަޒީފާގެ ފުރުސަތު ހޯދައިދީފައިވާ ކަމަށް ރައީސް ވިދާޅުވިއެވެ. ކޮވިޑްގެ ތެރޭގައި ޚަރަދު ކުޑަ ކުރުމުގެ ގޮތުން އެޅި ފިޔަވަޅުތަކުގެ ތެރޭގައި ވެސް އެފަދަ މީހުންނަށް ކުރަމުންދިޔަ ޚަރަދުތައް އުނި ކުރެވިފައި ނުވާކަމަށް ވިދާޅުވިއެވެ.
ނުކުޅެދުންތެރިކަން ހުންނަ މީހުންނަށް ބޭނުންވާ އެހީތެރިކަން ފޯރުކޯށްދިނުމުގެ ގޮތުން އެ މީހުންނަށް ބޭނުންވާ ވަސީލަތްތައް އިތުރު ކުރުމާއި އާލާތްތައް ހޯދުމުގެ މަސައްކަތް ކުރަމުން އަންނަކަން ރައީސް ފާހަގަކުރެއްވިއެވެ. ފަސޭހައިން އެ އާލާތްތައް ލިބޭނެ އިންތިޒާމް ހަމަޖެއްސުމަށް މަސައްކަތް ކުރައްވާ ކަމަށް ވިދާޅުވިއެވެ. އެކަމުގައި ދުނިޔޭގެ ސިއްހަތު ޖަމިއްޔާގެ ލަފާ ސަރުކާރުން ހޯދާފައިވާ ކަމަށާއި، ސަރުކާރުން ހުއްދަކުރާ އެފަދަ އާލާތްތަކުގެ ލިސްޓެއް މިހާރު އެކުލަވާލާފައިވާކަމަށްވެސް ވިދާޅުވިއެވެ.
ނުކުޅެދުންތެރިކަން ހުންނަ ފަރާތްތަކުގެ ހާލަތު ރަނގަޅު ކުރުމަށް އެންމެ މުހިންމު ކަމަކީ، އެންމެންގެ އަޅާލުމާއި ލޯތްބާއި އޯގާތެރިކަން، މިހާރަށް ވުރެ ފުރިހަމައަށް އެފަރާތްތަކަށް ދިނުންކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.
ރިވެލި އެވޯޑަކީ ނުކުޅެދުންތެރިކަން ހުންނަ މީހުންނާއި މި ދާއިރާގައި މަސައްކަތް ކުރައްވާ އެކިއެކި ފަރާތްތަކުގެ މަސައްކަތުގެ އަގު ވަޒަންކުރުމުގެ ގޮތުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއާއި، ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތްކުރާ ކައުންސިލް ގުޅިގެން ދެވޭ އެވޯޑެކެވެ.
"ރިވެލި ތަރި" އެވޯޑަކީ ނުކުޅެދުންތެރިކަން ހުންނަ މީހުންނާއި ކުދިންގެ ތެރެއިން، އެކި ދާއިރާތަކުން ހުނަރުވެރިން ކުރަމުން އަންނަ މަސައްކަތާއި އުފެއްދުންތައް ދައްކާލުމާއި، އެފަރާތްތަކުގެ މަސައްކަތާއި އުފެއްދުންތައް ކުރިއަރުވައި މާކެޓްކުރުމާއި، ނުކުޅެދުންތެރިކަން ހުންނަ ފަރާތްތަކުގެ ހުނަރާއި ގާބިލުކަމުގެ މައުލޫމާތު ފުޅާދާއިރާއެއްގައި ފަތުރައި, އަދި ނުކުޅެދުންތެރިކަން ހުންނަ ޒުވާނުންގެ ތެރެއިން މަސައްކަތްތެރިކަމާއި ވިޔަފާރި ކުރިއެރުމަށް ޝައުގުވެރިކަން ހުންނަ ފަރާތްތަކަށް އެކަމަށް ހިތްވަރުދީ މަގުފަހިކޮށްދިނުމަށް ދެވޭ އެވޯޑެވެ.
