"ނެޓްވޯކް ހަދައިގެން ޑްރަގް ވިޔަފާރިކޮށް، އެކަކު ޒިންމާ ނެގުމުން ދެން ތިބި މީހުން ދޫކޮށްލުމަކީ ހަމަޖެހޭ އުސޫލެއް ނޫން"
5 ޑިސެމްބަރު 2021 | އާދީއްތަ 06:07މި މައްސަލައިގައި އުފުލާފައިވާ ދައުވާތަކުގެ ތެރޭގައި މަނީ ލޯންޑަރިންގެ ކުށުގެ ދައުވާ ހިމެނޭ
މަސްތުވާތަކެތި ޓްރެފިކް ކުރުމުގެ މައްސަލައެއްގައި ހިމެނޭ ބައެއްގެ މައްޗަށް ފުރަތަމަ ފަހަރަށް މަނީ ލޯންޑަރިންގ ގެ ދައުވާތަކެއް އުފުލައި ކްރިމިނަލް ކޯޓުގައި މިހާރު ކުރިއަށްދާ ޝަރީއަތް
ނެޓްވޯކް ހަދައިގެން ޑްރަގް ވިޔަފާރިކޮށް، އެކަކު ޒިންމާ ނެގުމުން ދެން ތިބި މީހުން ދޫކޮށްލުމަކީ ހަމަޖެހޭ އުސޫލެއް ނޫންކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
ޕީޖީ އޮފީހުން އެހެން ބުނެފައިވަނީ މަސްތުވާތަކެތި ޓްރެފިކް ކުރުމުގެ މައްސަލައެއްގައި ހިމެނޭ ބައެއްގެ މައްޗަށް ފުރަތަމަ ފަހަރަށް މަނީ ލޯންޑަރިންގެ ދައުވާތަކެއް އުފުލައި ކްރިމިނަލް ކޯޓުގައި މިހާރު ކުރިއަށްދާ ޝަރީއަތުގެ އަޑުއެހުމުގައެވެ.
ޕީޖީ އޮފީހުން ބުނީ، މިއީ 12 ޖަނަވަރީ 2021 ވަނަ ދުވަހު ދިވެހިރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކޮށް، ގެންގުޅެ އަދި އެތަކެތި ޓްރެފިކް ކުރާކަމަށް ތުހުމަތުކުރެވުނު މައްސަލައެއް ކަމަށެވެ. މި މައްސަލައާ ގުޅިގެން މޯލްޑިވްސް ޕޮލިސް ސަރވިސްއިން މާލޭގެ 04 ގެއެއް ބަލައިފާސްކޮށް ހިނގި އޮޕަރޭޝަންގައި ގިނަ ޢަދަދެއްގެ މަސްތުވާތަކެތި ފެނިފައިވާއިރު، މި މައްސަލައިގައި ހިމެނޭ މީހުންގެ މައްޗަށް ދައުވާ އުފުލާފައިވަނީ މި އަހަރުގެ މާރޗު މަހުގެ 18 ވަނަ ދުވަހުއެވެ.
މި މައްސަލައިގައި ހިމެނޭ އަފްލާހު ފިޔަވައި އެންމެންގެ މައްޗަށް އުުފުލާފައިވާ ދައުވާތަކުގެ ތެރޭގައި މަނީ ލޯންޑަރިންގެ ކުށުގެ ދައުވާ ހިމެނޭއިރު، މި މައްސަލައަކީ މަސްތުވާތަކެތި ޓްރެފިކް ކުރުމުގެ މައްސަލައެއްގައި މަނީ ލޯންޑަރިންގެ ކުށުގެ ދަޢުވާކުރުމަށް ހުށަހެޅި ފުރަތަމަ މައްސަލަކަމަށް ޕީޖީ އޮފީހުން މައުލޫމާތު ދެއެވެ.
އޭގެ އިތުރުން، މި މައްސަލާގައި ފުލުހުން ބަލައިފާސްކުރި ތަންތަނުން ޖުމްލަ 1،542،675ރ (އެއްމިލިއަން ފަސްލައްކަ ސާޅީސް ދެހާސް ހަސަތޭކަ ހަތްދިހަ ފަހެއް) ރުފިޔާ ފެނިފައިވާކަމަށް ޕީޖީ އޮފީހުން މައުލޫމާތު ދެއެވެ. އެގޮތުން މި މައްސަލައިގެ ތަހުގީގުގައި ކުށްކޮށްގެން ހޯދާފައިވާކަމަށް ބެލެވޭ ގިނަޢަދަދެއްގެ ފައިސާ، މި މައްސަލާގައި ދައުވާލިބޭ މީހުންގެ އެކައުންޓްތަކާއި، އެމީހުންނާ ގުޅުންހުރި އެކައުންޓްތަކުގައި ދަޢުރު ކޮށްފައިވާކަން ހޯދިފައިވާކަމަށްވެސް ޕީޖީ އޮފީހުން މައުލޫމާތު ދެއެވެ.
މި މައްސަލައާ ގުޅިގެން ދައުވާ އުފުލާފައިވާ މީހުން:
އާދިއްތަ ދުވަހުގެ އަޑުއެހުން:
މި މައްސަލައިގައި އާދިއްތަ ދުވަހު އޮތް އަޑުއެހުމުގައި ދައުވާލިބޭ 4 މީހުންގެ ބައި ވަނީ ވަކިވަކިން ކުރިއަށް ގެންގޮސްފައެވެ. އެގޮތުން އިސްމާއިލް ޝަރީފް ވަނީ މަސްތުވާތަކެތީގެ ޒިންމާ ނަގައި، އެއީ އޭނާ ބޭނުން ކުރުމަށް ބަހައްޓާފައިވާ މަސްތުވާތަކެތި ކަމަށް ބުނެފައެވެ. އަދި ޑްރަގް ޓްރެފިކް ކުރުމާއި، ވިއްކާ ވިޔަފާރިކުރާ ކަމަށް ކުރާ ތުހުމަތަށް އޭނާ ވަނީ އިންކާރު ކޮށްފައެވެ. އެގޮތުން 75،000ށް ވުރެ ގިނަ ރުފިޔާ ދައުލަތުން އޭނާއާ ގުޅުވާއިރު، ދައުލަތުން ވަނީ އޭނާ އެ ފައިސާ ހޯދީ ކިހިނެއްކަން ސާފު ކޮށްދީފައިނުވާތީ އެއީ ޑްރަގް ވިޔަފާރިކޮށްގެން ހޯދާފައިވާ ފައިސާކަމަށް ތުހުމަތު ކޮށްފައެވެ.
"އާންމު އުސޫލުން ގިނައިން ގަނެގެން އަޅުގަނޑު ބޭނުން ކުރަނީ، އަޅުގަނޑަކީ 100 ރުފިޔާގެ ޕީސް ގެ ކުދި ކޮތަޅު ގަނެގެން ބޭނުންކުރާ މީހެއް ނޫން"އިސްމާއިލް ރަޝީދު ބުނެއެވެ.
މި މައްސަލައިގައި ފެނިފައިވާ ތަކެއްޗަށް އޭނާ ޒިންމާ ނަގާފައިވާއިރު، މި މައްސަލައިގެ ދިފާއީ ވަކީލުން ވަނީ އެކަމަށް ރިއާޔަތްކޮށް މައްސަލައިގައި ދައުވާލިބޭ އިތުރު ފަރާތެއް ދޫކޮށްލުމަށް އެދިފައެވެ. ނަމަވެސް އެކަމަށް ދައުލަތުން ވަނީ އިންކާރު ކޮށްފައެވެ. އެގޮތުން ދައުލަތުން ވަނީ ނެޓްވޯކް ހަދައިގެން ޑްރަގް ވިޔަފާރިކޮށް، އެކަކު ޒިންމާ ނެގުމުން ދެން ތިބި މީހުން ދޫކޮށްލުމަކީ ހަމަޖެހޭ އުސޫލެއް ނޫންކަމަށް ބުނެ، އެމީހުންގެ ބަންދަށް ލުއި ނުދިނުމަށް އެދިފައެވެ.
މި މައްސަލައިގައި އިސްމާއިލް ރަޝީދުގެ އިތުރުން، ޙަސަން ރަޝީދާއި، ޙަސަން ލޫތު ވަނީ ބައެއް ލިއެކިއުންތައް ލިބިފައިނުވާކަމަށް ބުނެފައެވެ. އެކަމާއި ގުޅިގެން މައްސަލަ ބައްލަވާ ގާޒީ ވަނީ ލިއެކިއުންތައް ހަމަ ކުރުމަށް ފުރުސަތެއް ދެއްވާފައެވެ.
އޭގެ އިތުރުން، ޝާނިޔާ އިބްރާހީމްގެ ވަކީލު ވަނީ ދައުވާ ސާފުވެފައިވާކަމަށާއި، އޭނާ ދައުވާއަށް އިންކާރު ކުރާ ކަމަށް ވިދާޅުވެފައެވެ. އަދި އޭނާއަކީ ޓްރެފިކް ކުރާ މީހެއް ނޫންކަމަށް ވަކީލު ވިދާޅުވިއެވެ. ޝަނިޔާ ދައުވާއަށް ޖަވާބު ދިނުމާއެކު ދައުލަތުން ވަނީ އޭނާގެ މައްޗަށް ހެކި ހުށައަޅާފައެވެ. އަދި ދިފާއީ ހެކި ހުށައެޅުމަށް ގާޒީ ވަނީ 10 ދުވަހުގެ މުއްދަތެއް ދެއްވާފައެވެ.
އާދިިއްތަ ދުވަހުގެ އަޑުއެހުމުގައި ގާޒީ ވަނީ ދައުވާލިބޭ 4 މީހުންގެ ބަންދުގެ މުއްދަތު ދަމަހައްޓަވާފައެވެ. އަދި ޙަސަން ރަޝީދާއި، ޙަސަން ލޫތުގެ ބޭސްފަރުވާއާ ގުޅޭގޮތުން ދިފާއުން ގިނަ ނުކުތާތަކެއް ފާހަގަކޮށްފައިވާއިރު، ގާޒީ ވަނީ އެފަރާތްތަކުގެ ބޭސްފަރުވާގެ ކަންކަން ގާތުން ބެލުމަށް ދައުލަތަށް ދަންނަވާފައެވެ. އަދި 29 މާރޗުގައި ޙަސަން ލޫތުގެ ބޭސްފަރުވާއާ ގުޅިގެން ޑޮކްޓަރު ދެއްވާފައިވާ ރިފަރެންސްއާ އެއްގޮތަށް އެކަން ކޮށްފައިނުވާކަމަށް އެފަރާތުން ފާހަގަކުރެއެވެ. އެގޮތުން ރިފަރެންސްއާ އެއްގޮތަށް ޑޮކްޓަރަށް ދައްކާފައިނުވާކަމަށް ލޫތު ބުނެއެވެ.
ގާޒީ ވަނީ ޙަސަން ލޫތު ހުރީ ބަންދަށް ލުއި ދެވޭނެ ޙާލަތުގައިކަން ދައުލަތުން ޤަބޫލު ކުރޭތޯ ސުވާލު ކޮށްފައެވެ. ވަކިން ޚާއްސަކޮށް 9 މަސް ވޭތުވެދާއިރު، ޑޮކްޓަރުގެ ރިފަރެންސްއާ އެއްގޮތަށް އެކަން ކުރެވިފައިނުވުމުގެ ކަންބޮޑުވުން ގާޒީ ފާޅު ކުރެއްވިއެވެ.
އެކަމާ ގުޅިގެން ދައުލަތުން ވަނީ ޚާއްސަ އިންތިޒާމުތަކެއް ހަމަޖެހެން ޖެހޭކަމަށް ޤަބޫލު ކުރެވޭކަމަށް ބުނެފައެވެ. އަދި ދައުވާގެ ސީރިއަސްކަމާއި، މި މައްސަލައިގެ ޙާލަތަށް ބަލާއިރު، އޭނާއަށް ސިއްޙީ އިންތިޒާމުތައް ހަމަޖައްސައިދޭން ޖެހޭނެކަމަށް ޤަބޫލު ކުރައްވާކަމަށް ދައުލަތުގެ ވަކީލާ ވިދާޅުވިއެވެ.
ގާޒީ ވަނީ އެކަންކަން ކަށަވަރު ކުރުމަށްފަހު، ރިސެސްގެ މުއްދަތުގައި މި މައްސަލައިގެ އަޑުއެހުމެއް ބޭއްވުމަށް ނިންމަވާފައެވެ. އެގޮތުން 26 ޑިސެމްބަރުގެ 09:00ށް އަޑުއެހުމެއް ބާއްވަވާނެކަން ގާޒީ ފާހަގަ ކުރެއްވިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީޤެވެ.
