އިމާމުންނާއި ޚަތީބުން ތަމްރީން ކުރުމުގެ ޕްރޮގްރާމްތައް ކުރިޔަށް އޮތްތަނުގައި ހުރިހާ ސިޓީތަކުގައި ކުރިޔަށް ގެންދާނެ: މިނިސްޓަރ
ސިޓީތަކުގައި މިޕްރޮގްރާމްތައް ކުރިޔަށް ގެންދިޔުމަށްފަހު ރާއްޖޭގެ އެކި ހިސާބުތަކުގައި މިޕްރޮގްރާމް ކުރިޔަށް ގެންދިޔުމަށް ހަމަޖެހިފައިވޭ
އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ
އިމާމުންނާއި ޚަތީބުން ތަމްރީންކުރުމުގެ އިތުރު ޕްރޮގްރާމްތަކެއް ކުރިޔަށް އޮތްތަނުގައި މާލެ ސިޓީ، އައްޑޫ ސިއްޓީ ، ފުވައްމުލަކު ސިޓީ އަދި ކުޅުދުއްފުށި ސިޓީގައި ކުރިޔަށް ގެންދާނެކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވެއްޖެއެވެ.
މާލެ ސިޓީގައި ކުރިޔަށް ގެންދިޔަ އިމާމުންނާއި ޚަތީބުން ތަމްރީން ކުރުމުގެ ޕްރޮގްރާމް ނިންމާ ބައިވެރިންނަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ ސިޓީތަކުގައި މިޕްރޮގްރާމްތައް ކުރިޔަށް ގެންދިޔުމަށްފަހު ރާއްޖޭގެ އެކި ހިސާބުތަކުގައި މިޕްރޮގްރާމް ކުރިޔަށް ގެންދިޔުމަށް ވިސްނަވާފައި ވާކަމަށެވެ. އަދި މާލެ ސިޓީގައި އިމާމުންނާއި ޚަތީބުން ތަމްރީން ކުރުމަށް އިތުރު ޕްރޮގްރާމްތައް ކުރިޔަށް އޮތްތަނުގައިވެސް ކުރިޔަށް ގެންދާނެކަމަށް މިނިސްޓަރ ވިދާޅުވިއެވެ.
މާލެ ސިޓީގެ އިމާމުންނާއި ޚަތީބުންނަށް ކުރިޔަށް ގެންދިޔަ މިޕްރޮގްރާމަކީ މިހާތަނަށް މިހާ ފުޅާކޮށް ކުރިޔަށް ގެންދިޔަ ފުރަތަމަ ޕްރޮގްރާމް ކަމަށްވެސް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ މިޕްރޮގްރާމްގެ އެންމެ ބޮޑު އަމާޒަކީ އިމާމުންނާއި ޚަތީބުން މަސައްކަތް ކުރާއިރު އެމަސައްކަތް އެއީ އާންމުން ބަލައިގަންނަ މަސައްކަތް ތަކަކަށް ހެދުމެވެ. ބައެއް ކަންކަމުގައި އާންމުންގެ ފަރާތުން ޝަކުވާ ލިބެމުން އަންނަކަން ފާހަގަކުރައްވާ މިނިސްޓަރ ވިދާޅުވީ މިފަދަ ތަމްރީން ޕްރޮގްރާމް ތަކުގެ ޒަރީޢާއިން އެކަންކަމަށް ހައްލު ހޯދައިދިނުމަށް ބޭނުންފުޅުވާކަމަށެވެ. އަދި ކުރިޔަށް އޮތްތަނުގައި މިޕްރޮގްރާމް ކުރިޔަށް ގެންދިޔުމަށް ބައިވެރިންގެ ފަރާތުން އެއްބާރުލުން ބޭނުންވާނެކަމަށް މިނިސްޓަރ ވިދާޅުވިއެވެ.
02 ޑިސެމްބަރ ން 04 ޑިސެމްބަރގެ ނިޔަލަށް ކުރިޔަށް ގެންދިޔަ މި ޕްރޮގްރާމްގައި 43 ޚަތީބުންނާއި، 43 އިމާމުންނާއި 8 ޕޫލް އިމާމުންނާއެކު ޖުމްލަ 94 ބޭފުޅުން ބައިވެރިވެފައިވެއެވެ. މީގެތެރެއިން 95 އިންސައްތަ ބައިވެރިން ޕްރޮގްރާމަށް ހާޒިރުވެ ޕްރޮގްރާމް ފުރިހަމަކޮށްފައި ވާކަމަށް އިސްލާމިކް މިނިސްޓްރީން ބުނެއެވެ. ތަމްރީން ޕްރޮގްރާމް ނިންމުމަށްފަހު އެކަމުގެ ލިޔުން ދީފައިވަނީ ހާޒިރީއަށް ބަލައިގެންނެވެ. އެގޮތުން 80 އިންސައްތައަށް ވުރެ މަތިން ހާޒިރުވި ފަރާތްތަކަށް ތަމްރީން ޕްރޮގްރާމް ފުރިހަމަކުރިކަމުގެ ލިޔުން ދީފައިވެއެވެ. އަދި 40 އާއި 80 އިންސައްތަ އާ ދެމެދު ހާޒިރުވި ފަރާތްތަކަށް ދީފައިވަނީ ތަމްރީން ޕްރޮގްރާމްގައި ބައިވެރިވި ކަމުގެ ލިޔުމެވެ. 40 އިންސައްތައަށް ވުރެ މަދުން ހާޒިރުވި ފަރާތްތަކަށް ލިޔުން ދީފައެއް ނުވެއެވެ.
އިސްލާމިކް މިނިސްޓްރީން ބުނީ މިފަދަ ޕްރޮގްރާމްތަކަށް ހާޒިރުވެ ޕްރޮގްރާމްތައް ފުރިހަމަކުރާ ފަރާތްތަކަށް ކުރިޔަށް އޮތްތަނުގައި ހިންގާ އެކިއެކި ކަންކަމުގައި އިސްކަންދޭނެ ކަމަށެވެ. މައިގަނޑު ގޮތެއްގައި މި ޕްރޮގްރާމްގައި ކިޔަވައިދީފައިވަނީ ތަޖުވީދު، ހުކުރު ޤަވާޢިދާ އުސޫލު، ސިވިލް ސާވިސްގެ ޤަވާޢިދާ އުސޫލު، މަސައްކަތުގެ އަޚްލާޤާއި އެހެން މީހުންނާއި މުޢާމަލާތްކުރުން، ނަމާދުގެ ޙުކުމްތައް އަދި ޚިލާފީ މައްސަލަތަކުގައި ޢަމަލުކުރާނެގޮތް ފަދަ، މަޢުލޫތަކަށެވެ.
