އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން އިންތިޒާމުކޮށްގެން ބާއްވާ ވޯލްޑް ޔޫތު ޗެމްޕިއަންޝިޕުގެ މިކްސް ޑަބަލްސް އިވެންޓުގައި ކުޅުނު ފުރަތަމަ މެޗުން ރާއްޖޭގެ ޒުވާން ޓީޓީ ތަރި ފާތިމަތު ދީމާ އަލީ މޮޅުވެއްޖެއެވެ.

ޕޯޗުގަލުގައި ކުރިއަށްދާ މި މުބާރާތުގެ މިކްސް ޑަބަލްސް އިވެންޓުގައި ދީމާގެ ޕާޓްނަރަކީ ޗެކް ރިޕަބްލިކުގެ މާޓިސް ސިޕްއެވެ. ދީމާ އާއި ސިޕްގެ ޕެއާ ވަނީ ހޮނިހިރު ދުވަހު ކުޅުނު މެޗުން އޮސްޓްރޭލިއާގެ ނިއީ ޝުލޮން އާއި ސިހޯއިއޯސް ކޮންސްޓަންޓީނާގެ ޕެއާ 3-1 ސެޓުން ބަލިކޮށްފައެވެ.

މި މެޗުގެ ފުރަތަަމަ ދެ ސެޓު ދީމާ އާއި ސިޕްގެ ޕެއާއިން 4-11 އަދި 7-11 އިން ގެންގޮސްފައިވަނިކޮށް، ނިއީ އާއި ކޮންސްޓަންޓީނާގެ ޕެއާ ވަނީ ތިންވަނަ ސެޓު 11-9 އިން ގެންގޮސްފައެވެ. އެކަމަކު ދެން ކުޅުނު ސެޓު 7-11 އިން ކާމިޔާބުކޮށް ދީމާ އާއި ސިޕްގެ ޕެއާ ވަނީ އެ މެޗުން މޮޅުވެފައެވެ.

މި މޮޅާއެކު ދީމާ އާއި ސިޕްގެ ޕެއާ މިކްސް ޑަބަލްސްގެ ގަދަ 16 އަށް ދަތުރުކުރިއިރު، އެ ބުރުގައި އެ ދެ ކުޅުންތެރިންގެ ޕެއާ ބައްދަލުކުރީ ރުމޭނިއާގެ ޕެއާއެއް ކަމަށްވާ ޗިރިޓާ ލުލިއަން އާއި ރޯސޫ ބިއާންކާގެ ޕެއާއާއެވެ. އެކަމަކު އެ މެޗުން ދީމާ އާއި ސިޕްގެ ޕެއާ ވަނީ ސީދާ ތިން ސެޓުން ބަލިވެފައެވެ.

މި މުބާރާތުގެ އަންހެން ޑަބަލްސް އިވެންޓުގައިވެސް ދީމާ ވާދަކުރަން ހަމަޖެހިފައި އޮތްއިރު، އެ އިވެންޓުގައި ދީމާގެ ޕާޓްނަރަކީ ނައިޖީރިއާގެ ސުކުރާތު އަޔުލްބިގަންއެވެ. އެކަމަކު ދީމާގެ ޕާޓްނަރު ނައިޖީރިއާގެ ސުކުރާތުއަށް ޕޯޗުގަލަށް ނާދެވުމުން ދީމާއަށް ވަނީ އަންހެން ޑަބަލްސް އިވެންޓް މެޗު ދޫކޮށްލަން ޖެހިފައެވެ.

ދެން މި މުބާރާތުގައި ދީމާއަށް އޮތީ އަންހެން ސިންގަލްސް ބައެވެ. އެގޮތުން އާދީއްތަ ދުވަހު 15 އަހަރުން ދަށުގެ އަންހެން ސިންގަލްސް ބައިގައި ދީމާ ނުކުންނާނީ ސްލޮވާކިއާގެ ވިލިޝްކޯވާ ޑޮމިނިކާއާ ދެކޮޅަށެވެ. 

މި ފަހަރުގެ ދުނިޔޭގެ ޔޫތު މުބާރާތުގައި ދީމާ ވާދަކުރާއިރު، އޭނާ ވެފައިވަނީ ވޯލްޑް ޔޫތު ޗެމްޕިއަންޝިޕުން ފުރުސަތު ހޯދި ފުރަތަމަ ދިވެހި ކުޅުންތެރިޔާއަށެވެ. މި މުބާރާތުން ކުޅުންތެރިންނަށް ފުރުސަތު ލިބެނީ ދުނިޔޭގެ ރޭންކިންއަށް ބެލުމަށްފަހުއެވެ. އެގޮތުން މި މުބާރާތުގެ 15 އަހަރުން ދަށުގެ އަންހެން ސިންގްލަސް ކެޓަގަރީއަށް ކޮލިފައިވި 24 ކުޅުންތެރިންގެ ލިސްޓުގައި ދީމާގެ ނަން ހިމެނުނީ 13 ވަނައިގައެވެ.

ދުނިޔޭގެ ޔޫތު މުބާރާތުން ދީމާ ފުރުސަތު ހޯދިއިރު، ދާދި ފަހުން އޭނާ ވަނީ އައިޓީޓީއެފްއިން އިންތިޒާމުކޮށްގެން އޮމާނުގެ ވެރިރަށް މަސްކެޓުގައި ބޭއްވި ވޯލްޑް ޓޭބަލް ޓެނިސް ޔޫތު ކޮންޓެންޑާ މުބާރާތުގައި ރަނގަޅު ތަޖުރިބާއެއް ހޯދާފައެވެ. އަދި މިދިޔަ ސެޕްޓެމްބަރު މަހު ދީމާ ވަނީ ޓިއުނީޝިއާގެ ވެރިރަށް ތޫނިސްގައި ބޭއްވި ވޯލްޑް ޓޭބަލް ޓެނިސް ޔޫތު ކޮންޓެންޑާ މުބާރާތުގައިވެސް ވާދަކޮށްފައެވެ. އޭގެ ފަހުން ޕޯޗުގަލުގެ ވެރިރަށް ލިޒްބަނުގައި ބޭއްވި ވޯލްޑް ޓޭބަލް ޓެނިސް ޔޫތު ސްޓާ ކޮންޓެންޑާ މުބާރާތުގައިވެސް ދީމާ ވާދަކުރަން އޮތް ނަމަވެސް، ވިސާގެ ކަންކަން ހަމަނުޖެހުމުން އެ މުބާރާތުގައި ދީމާ ވާދަކޮށްފައެއް ނުވެއެވެ.