ނުކުޅެދުންތެރިކަން ހުންނަ އެއްވެސް މީހެއްގެ ވަޒީފާ ކޮވިޑް ތެރޭގައި ގެއްލިފައިނުވާނެ: ރައީސް

ކޮވިޑް-19ގެ ސަބަބުން ގިނަ ބައެއްގެ ވަޒީފާ ގެއްލި އެކި ކަހަލަ އަސަރުތައް ކުރިނަމަވެސް، ނުކުޅެދުންތެރިކަން ހުންނަ އެއްވެސް މީހެއްގެ ވަޒީފާ ގެއްލިފައިނުވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ނުކުޅެދުންތެރިކަން ހުންނަ ފަރާތްތަކުގެ އަގު ވަޒަންކުރުމުގެ ގޮތުން ދޭ ރިވެލި އެވޯޑު ދިނުމަށް ހޮނިހިރު ދުވަހުގެރޭ ބޭއްވި ޖަލްސާގައި ބައިވެރިވެވަޑައިގެން ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ, ކޮވިޑް-19ގެ ދަތިކަމުގެ ތެރޭގައި ގިނަ ބައެއްގެ ވަޒީފާ ގެއްލި ވަޒީފާއަށް އެކި ވަރުގެ އަސަރުތައް ކުރި ކަމަށެވެ. އެހެންނަމަވެސް ވަޒީފާ ގެއްލި ވަޒީފާއަށް އަސަރުކުރި މީހުންގެ ތެރޭގައި ނުކުޅެދުންތެރިކަން ހުންނަ މީހުން ނުހިމެނޭނެ ކަމަށް ރައީސް ވިދާޅުވިއެވެ.

ކޮވިޑުގެ ދަތިކަމުގެ ތެރޭގައިވެސް، ނުކުޅެދުންތެރިކަން ހުންނަ 25 މީހަކަށް، ފެނަކައިން އިތުރަށް ވަޒީފާ ދީފައިވާކަން ރައީސް ވަނީ ފާހަގަކުރައްވާފައެވެ. އަދި ކޮވިޑުގެ ދަތިކަމުގެ ތެރޭގައި ދައުލަތުގެ ޚަރަދުތައް ކުޑަކުރުމަށް އެޅި ފިޔަވަޅުތަކުގެ ތެރެއިންވެސް، ނުކުޅެދުންތެރިކަން ހުންނަ މީހުންނަށް މާލީ އެހީ ދިނުމަށް ހިންގާ ޕްރޮގްރާމަށް އެއްވެސް ބަދަލެއް ގެނެސްފައިނުވާނެ ކަމަށް ރައީސް ވިދާޅުވިއެވެ. އަދި އެއްވެސް މިންވަރެއް އުނިނުކޮށް މަހުން މަހަށް އެހީތެރިކަން ފޯރުކޮށްދީފައިވާކަމަށް ރައީސް ވިދާޅުވިއެވެ.

މީގެ އިތުރުން ނުކުޅެދުންތެރިކަން ހުންނަ ކުދިންނަށް ލުއިފަސޭހަ ގޮތްތަކެއް ހަމަޖައްސައިދިނުމަށް ސަރުކާރުން ކުރަމުންދާ މަސައްކަތްތަކުގެ ތެެރެއިން، 2019 ވަނަ އަހަރު ފެށި ތެރަޕިއުޓިކް ފަރުވާއަށް ޚަރަދު ހަމަޖައްސައިދިނުމުގެ ޕްރޮގްރާމަށް ރައީސް ވަނީ އަލިއަޅުވާލައްވާފައެވެ. މި ފަރުވާއަށް 2019 ވަނަ އަހަރު 3.1 މިލިއަން ރުފިޔާ، 2020 ވަނަ އަހަރު 7.2 މިލިއަން ރުފިޔާ، އަދި މި އަހަރުގެ އޮކްޓޫބަރު މަހުގެ ނިޔަލަށް 18.2 މިލިއަން ރުފިޔާ ޚަރަދު ކުރެވިފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ ނުކުޅެދުންތެރިކަން ހުންނަ މީހުންނަށް ލުއިފަސޭހަ ގޮތްތަކެއް ހޯދައިދިނުމުގެ މަސައްކަތުގެ ތެރެއިން މިހާރު ކުރިއަށްދަނީ އެމީހުންނަށް ބޭނުންވާ އެކި އާލާތްތައް ފަސޭހައިން ލިބޭނެ އިންތިޒާމެއް ހަމަޖެއްސުމުގެ މަސައްކަތް ކަމަށެވެ. މިކަމަށް ޑަބްލިއުއެޗްއޯއާ މަޝްވަރާކޮށް، ލަފާ ހޯއްދަވާފައިވާކަމަށް ރައީސް ވިދާޅުވިއެވެ. އަދި ސަރުކާރުން ހުއްދަކުރާ އެފަދަ އާލާތްތަކުގެ ލިސްޓެއް މިހާރު ވާނީ އެކުލަވާލާފައި ކަމަށް ވިދާޅުވިއެވެ.

މީގެ އިތުރުން ނުކުޅެދުންތެރިކަން ހުންނަ މީހުންގެ ކަންކަމާ ގުޅޭގޮތުން ހިންގާ ޕްރޮގްރާމްތަކަށް އަލިއަޅުވާލައްވައި ރައީސް ވިދާޅުވީ އެފަދަ މީހުންނާއި ކުދިން ބާރުވެރި ކުރެވޭފަދަ ގޮތަކަށް، އެ ޕްރޮގްރާމްތައް ބައްޓަންކޮށް ޕްރޮގްރާމްތަކަށް ބަދަލު ގެންނަންޖެހޭ ކަމަށެވެ. އެފަދަ މީހުންގެ ހުނަރުތައް ތަރައްގީކުރުމަށް ފުރުސަތު ފަހިކޮށްދިނުމަކީ ކުރަންޖެހިފައިވާކަމެއް ކަމަށާއި، އެ ޕްރޮގްރާމްތަކުގެ އެދެވޭ ނަތީޖާ ހާސިލްކުރެވޭނީ އޭރުން ކަމަށް ރައީސް ވިދާޅުވިއެވެ.

"ރިވެލި އެވޯޑު" އަދި "ރިވެލި ތަރި" އެވޯޑު ދިނުމަށް ހޮނިހިރު ދުވަހުގެ ރޭ ބޭއްވި ހަފްލާގައި، 5 ދާއިރާއަކުން، 7 ފަރާތެއް ވަނީ ރިވެލި ތަރި ހާސިލްކޮށްފައެވެ. އަދި 5 ދާއިރާއަކުން 6 ފަރާތެއް ވަނީ ރިވެލި އެވޯޑު ހާސިލްކޮށްފައެވެ. މިއީ ކޮންމެ ދެއަހަރަކުން އެއް އަހަރު ދެވޭއެވޯޑެކެވެ.