ވެސްޓް ހޭމުން ފަހަތުން އަރައި ޗެލްސީ ބަލިކޮށްފި

އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުގައި ވެސްޓް ހޭމް ޔުނައިޓެޑުން ފަހަތުން އަރައި ތާވަލުގެ އެއްވަނައިގައި އޮތް ޗެލްސީ ބަލިކޮށްފިއެވެ.

އަމިއްލަ ދަނޑުގައި ކުޅުނު މެޗުން ވެސްޓް ހޭމް މޮޅުވީ ޗެލްސީ އަތުން 3-2 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ޗެލްސީންނެވެ. މެޗުގެ 28 ވަަނަ މިނެޓުގައި ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ތިއާގޯ ސިލްވާ އެވެ. އެކަމަކު މެޗުގެ 40 ވަނަ މިނެޓުގައި ލިބުނު ޕެނަލްޓީއަކުން މެނުއަލް ލަންޒީނީ ވަނީ ވެސްޓް ހޭމަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން ވެސްޓް ހޭމުގެ ޖެރޮޑް ބޮވެންއަށް ޗެލްސީގެ ގޯލްކީޕަރު އެޑޮއާޑް މެންޑީ ކުރި ފައުލަކަށް ރެފުރީ ދިން ޕެނަލްޓީއެކެވެ.

ނަމަވެސް ފުރަތަމަ ހާފު ނިމުމުގެ ކުރިން ޗެލްސީން ވަނީ މި މެޗުގައި އަލުން ލީޑު ނަގާފައެވެ. ހަކީމް ޒިޔެކް ނެގި ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ މޭސަން މައުންޓް ޖެހި މޮޅު ގޯލުންނެވެ. މައުންޓެވެ. މި މެޗުގައި ވެސްޓް ހޭމުން ދެވަނަ ފަހަރަށް ނަތީޖާ އެއްވަރުކޮށްފައިވަނީ ދެވަނަ ހާފު ފަށައިގެން 11 ވަނަ މިނެޓުގައި ބޮވެން ކާމިޔާބުކޮށްދިން ލަނޑުންނެވެ. އަދި މި މެޗުން ވެސްޓް ހޭމް މޮޅުކޮށްދިން ލަނޑު މެޗު ނިމެން ތިން މިނެޓަށް ވެފައި ވަނިކޮށް ކާމިޔާބުކޮށްދިނީ އާތޫރް މަސުއާކޫއެވެ.

މި ނަތީޖާއާއެކު ތާވަލުގެ އެއްވަނައިގައި ޗެލްސީ މި ވަގުތު އޮތީ ކުޅުނު 15 މެޗުން ލިބުނު 33 ޕޮއިންޓާއެކުއެވެ. އެކަމަކު ލީގުގައި ހޮނިހިރު ދުވަހުގެރޭ ތާވަލުގެ ދެވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ތިންވަނައިގައި އޮތް ލިވަޕޫލް ކުޅޭ މެޗުތަކަށްފަހު ޗެލްސީގެ މަގާމަށް ބަދަލު އައުމުގެ ފުރުސަތު އެބައޮތެވެ. ސިޓީ މި ވަގުތު ދެވަނައިގައި އޮތީ 14 މެޗުން 32 ޕޮއިންޓާއެކުއެވެ. އަދި ތިންވަނައިގައި ލިވަޕޫލް އޮތީ 14 މެޗުން 31 ޕޮއިންޓާއެކުއެވެ.

ޗެލްސީ އަތުން ވެސްޓް ހޭމް މޮޅުވިއިރު، މި ފަހަރު ލީގުގައި އެ ޓީމުން މި ވަނީ އަމިއްލަ ދަނޑުގައި ކުޅެ ލިވަޕޫލުވެސް ބަލިކޮށްފައެވެ. އެއާއެކު ތާވަލުގެ ހަތަރުވަނައިގައި ވެސްޓް ހޭމް އޮތީ 15 މެޗުން 27 ޕޮއިންޓާއެކުއެވެ.