ރައީސް ޔާމީން ކޮވިޑް-19ގެ ނަން ވެސް ނުނަންގަވާ
ރައީސް ޔާމީން ދެއްކެވީ މި ސަރުކާރުން އަނިޔާވެރިވީ ވާހަކަ
ހުކުރު ދުވަހުގެރޭ އިދިކޮޅުން ބޭއްވި ޖަލްސާ
ފާއިތުވި ދެ އަހަރު ދިވެހިން ތަހައްމަލުކުރަމުންދިޔަ ކޮވިޑް-19ގެ ހާލަތާމެދު ކުރީގެ ރައީސް އަބްދުﷲ ޔާމީން އަބްދުލްގައްޔޫމް އެއްވެސް ވަރަކަށް ކަންބޮޑުވެވަޑައިނުގަންނަވާކަން އެމަނިކުފާނު ހާމަކުރައްވައިފިއެވެ.
ދެއަހަރު ދުވަހުގެ ޖަލު ހުކުމަކުން މިިންޖުވެވަޑައިގެން ކުރީގެ ރައީސް ޔާމީން ވަނީ ހުކުރު ދުވަހުގެރޭ ރައްޔިތުންނާ ބައްދަލުކުރައްވައި ވާހަކަދައްކަވާފައެވެ. ހުކުރު ދުވަހުގެރޭ ބޭއްވި ޖަލްސާގައި ވާހަކަދައްކަވަމުން އެމަނިކުފާނު ވަނީ ރާއްޖޭގައި އިންޑިއާގެ ސިފައިން ތިބުމާ ގުޅޭގޮތުންނާއި، މި ސަރުކާރުން އެމަނިކުފާނަށް އަނިޔާވެރިވެފައިވާކަމާއި، ސަރުކާރު ކޯލިޝަންގައި ހިމެނޭ ލީޑަރުންނާ ގުޅޭގޮތުން ގިނަ ވާހަކަތަކެއް ދައްކަވާފައެވެ.
ރައީސް ޔާމީން ވަނީ ވަކިވަކިން ސަރުކާރު ކޯލިޝަންގައި ހިމެނޭ މައި ހަތަރު ޕާޓީގެ ލީޑަރުންގެ އިތުރުން، ނާއިބު ރައީސަށްވެސް ފާޑުވިދާޅުވެ ވާހަކަދައްކަވާފައެވެ. އަދާލަތު ޕާޓީގެ ރައީސް އަދި މިސަރުކާރުގެ ހޯމް މިނިސްޓަރަށް އަމާޒުކުރައްވައި ޔާމީން ވިދާޅުވީ، ޖަލު ބަންދުގައި ހުންނަ މީހާއަށްވެސް ހައްގުތަކެއް ކަށަވަރުވާން ޖެހޭކަމަށާއި، އެމަނިކުފާނަށް އިމްތިޔާޒުތަކެއް ލިބިވަޑައިގަންނަވަންޖެހޭކަމަށެވެ. ޖުމްހޫރީ ޕާޓީގެ ލީޑަރ ގާސިމް އިބްރާހީމަށް އިޝާރާތްކުރައްވައި ޔާމީން ވިދާޅުވީ، ލީޑަރުންގެ ސިފައަކީ ހުކުމެއް ކުރާއިރަށް އަނބުރައިގަނެގެން ވެއްޓުން ނޫންކަމަށެވެ.
އެމްއާރުއެމްގެ ލީޑަރ އަދި އެމަނިކުފާނުގެ ބޭބޭފުޅު މައުމޫން އަބްދުލްގައްޔޫމްއަށް އިޝާރާތްކުރައްވައި ވިދާޅުވީ، ރައީސް މައުމޫންގެ ވެރިކަމުގައި ކުރިމަތިވި ނޮވެމްބަރ 3 މިހާރު އެއީ ހަނދާންކުރަން ޖެހޭ ކަމަކަށްނުވާކަމަށެވެ. ރައީސް މައުމޫނަށް އެއީ ކަމަކަށްނުވާކަމަށް ވިދާޅުވިއެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ނިސްބަތްކުރައްވައި ޔާމީން ވަނީ، ރައީސަކަށް ހުންނަ މީހެއްގެ މައްޗަށް ބޮޑު ޚިޔާނާތުގެ ތުހުމަތެއް ކުރެވިއްޖެނަމަ އެކަމެއް ރައްޔިތުންނަށް ސާފުކޮށްދޭންޖެހޭކަމަށް ވިދާޅުވެފައެވެ. އަދި ޅިޔަނު ކޮމިޝަނަރ އޮފް ޕޮލިސްގެ މަގާމުގައި ހުރެގެން ރަނގަޅު ތަހުގީގެއް ނުހިނގާނެކަމަށް ވިދާޅުވިއެވެ. މީގެ އިތުރުން ވަރަށް ބުރަކޮށް ނާއިބު ރައީސް ކުރައްވާކަމަކީ އިމާރާތަކަށް ވަޑައިގެން ލިފްޓެއް ހުޅުއްވައިދެއްވުންކަމަށް ޔާމީން ވިދާޅުވިއެވެ.
ޔާމީން ވަނީ ޖުޑީޝަރީއަށާއި ފަނޑިޔާރުންނަށްވެސް ފާޑުވިދާޅުވެފައިވެއެވެ. އަދި ރައީސް ޔާމީންގެ ސަރުކާރުގައި ކޮންމެ ވާހަކައެއް ދެއްކުމުގެ ފުރުސަތު ދެއްވައި، މިނިވަން ނޫސްވެރިކަން ކުރުމުގެ ފުރުސަތު ދެއްވާފައިވާނެ ކަމަށާއި، މިއަދު އެ މިނިވަންކަން ނެތް ކަމަށް ވިދާޅުވިއެވެ. އަދި އިންޑިއާ ސިފައިން ރާއްޖޭގައި ތިބޭތީ އެކަމާއި ގުޅިގެންވެސް އެމަނިކުފާނު ވާހަކަދައްކަވާފައިވެއެވެ.
މި ހުރިހާ ވާހަކައެއް ދެއްކެވި އިރުވެސް ފާއިތުވި 2 އަހަރުތެރޭ ކޮވިޑް-19ގެ ހާލަތުގައި ދިވެހިން ތަހައްމަލުކުރި ދަތި އުނަދަގޫތަކުގެ މައްޗަށް އަލިއަޅުވާލައްވާފައެއް ނުވެއެވެ. ރާއްޖެއިން މި ބައްޔަށް ޕޮޒިޓިވްވި މީހުންގެ އަދަދު ލައްކައަކާ ގާތްކޮށްފައިވާއިރު، އެއީ އެމަނިކުފާނަށް މާ ބޮޑު ކަމަކަށް ނުވިއެވެ. މި ބަލީގައި ނިޔާވި މީހުންގެ އަދަދު 252އަށް އަރާފައިވާއިރު، މިކަމަށްވެސް އަލިއަޅުވާލައްވާފައެއް ނުވެއެވެ. މިހާރު ކޮވިޑް-19ގެ އައު ވޭރިއަންޓެއް ދުނިޔޭގެ ގިނަ ގައުމުތަކުން ފެންނަމުންދާއިރު، މިކަމުގެ މައްޗަށްވެސް އެމަނިކުފާނު އަލިއަޅުވާލައްވާފައެއް ނުވެއެވެ.
މިހާހިސާބުން މިއީ ރައްޔިތުންނަށް އެންމެ ހެޔޮއެދޭ ވެރިޔާތޯ ރައްޔިތުން ވަނީ ސުވާލުއުފައްދަން ފަށާފައެވެ. ރައްޔިތުންނަށް އެހާ ހެޔޮއެދޭ ވެރިއަކު މި ދެ އަހަރު ރައްޔިތުން ތަހަމަލްކުރި ހިތްދަތި ދުވަސްތަކުގެ ނަންވެސް ނުނަންގަވާފާނެބާއެވެ!
