2022 ވަނަ އަހަރު ރާއްޖޭގެ އިގްތިޞާދު 12 އިންސައްތަ ކުރިއަރާނެ
4 ޑިސެމްބަރު 2021 | ހޮނިހިރު 04:36މިއަހަރުގެ ތެރޭގައި ރާއްޖޭގެ އިގްތިޞާދު 31.6 އިންސައްތަ ކުރިއަރާނެ ކަމަށް ބެލެވޭ
މޯލްޑިވްސް މަނިޓަރީ އޮތޯރިޓީ (އެމްއެމްއޭ)
ކުރިއަށް އޮތް 2022 ވަނަ އަހަރު ރާއްޖޭގެ އިގްތިޞާދު 12 އިންސައްތަ ކުރިއަރާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަންދާޒާކޮށްފިއެވެ.
އެމްއެމްއޭއިން ނެރުނު ނޮވެމްބަރ މަހުގެ އިގްތިޞާދީ ތަފާސްހިސާބުތައް ދައްކާ ގޮތުން 2020 ވަނަ އަހަރާ އަޅާބަލާއިރު 2021 ވަނަ އަހަރުގެ ދެވަނަ ކުއާޓާގައި ރާއްޖޭގެ އިގްތިޞާދު ވަނީ 3.75 ކުރިއަރާފައެވެ. މީގެ މައިގަނޑު ސަބަބަކީ ކޮވިޑް-19ގެ ސަބަބުން 2020 ވަނަ އަހަރު ރާއްޖޭގެ ފަތުރުވެރިކަން މެދުކަނޑާލުމަށްފަހު އަލުން ފަށައިގެން މިހާރު އައިސްފައިވާ ބޮޑު ކުރިއެރުމެވެ. މީގެ އިތުރުން ރާއްޖޭގެ އިގްތިޞާދީ އެހެނިހެން ދާއިރާތައް ކަމުގައިވާ ދަތުރުފަތުރާ މުއާސަލާތީގުޅުން، ހޯލްސޭލް އަދި ރީޓެއިލް ވިޔަފާރިތަކަށް ވެސް ހެޔޮ ބަދަލެއް އައިސްފައިވާ ކަމަށް އެމްއެމްއޭގެ ހިސާބުތައް ދައްކައެވެ.
ކޮވިޑްގެ ސަބަބުން ރާއްޖޭގެ އިގްތިޞާދަށް 33.5 އިންސައްތައިގެ ދަށްވުމެއް އައިސްފައި ވާއިރު، މިއަހަރުގެ ތެރޭގައި 28.1 އިންސައްތައާ 38.5 އިންސައްތައާ ދެމެދުގެ ކުރިއެރުމެއް އިގްތިޞާދަށް ލިބިގެންދާނެ ކަމަށް އެމްއެމްއޭގެ ތަފާސްހިސާބުތަކުން ދައްކައެވެ. ބެލެވޭ ގޮތުގައި މިއަހަރު ނިމޭއިރު ރާއްޖޭގެ އިގްތިޞާދު 31.6 އިންސައްތަ ކުރިއަރާނެއެވެ.
އިގްތިޞާދީ މި ކުރިއެރުމުގައި އެންމެ އިސް ދައުރެއް އަދާކުރަނީ ރާއްޖޭގެ ފަތުރުވެރިކަމަށް އަންނަމުންދާ ހެޔޮ ބަދަލުތަކެވެ. އެގޮތުން ކޮވިޑްގެ ކުރިން ރާއްޖޭގެ ފަތުރުވެރިކަން ހުރި މިންވަރަށްވުރެ މިހާރު ފަތުރުވެރިކަން ވަނީ ކުރިއަރާފައެވެ. 2019 ވަނަ އަހަރުގެ ނޮވެމްބަރ މަހު 141،928 ފަތުރުވެރިން ރާއްޖެ ޒިޔާރަތްކުރިއިރު، މިއަހަރުގެ ނޮވެމްބަރ މަހުގެ ތެރޭގައި 142،066 ފަތުރުވެރިން ވަނީ ރާއްޖެ އައިސްފައެވެ.
