ކ. ތަސްފަރީ ފަރަކީ 90 ގެ އަހަރުތަކުން ފެށިގެން ޑައިވަރުންގެ މެދުގައި އެންމެ މަޤުބޫލު އެއް ފަރު ކަމަށް މިނިސްޓްރީ އޮފް އެންވަޔަރމަންޓް އެންޑް ކްލައިމެޓް ޗޭންޖް އިން ބުނެފިއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކައިގައި މިނިސްޓަރ އޮފް ސްޓޭޓް ފޯރ އެންވަޔަރމަންޓް ޑރ އަބްދުﷲ ނަސީރު ވިދާޅުވީ، ރަސްފަރިއާއި އެތަނުގެ ވަށައިގެންވާ ފަރަކީ ހިމާޔަތް ކުރެވިފައިވާ ތަންތަން ކަމަށެވެ. އެގޮތުން އެއީ ތިމާވެށީގެ ގޮތުން ޚާއްސަ ސިފަތަކެއް ލިބިގެންވާ ފަރަކަށް ވުމުގެ އިތުރުން، ފަތުރުވެރިންގެ މެދުގައިވެސް ނުހަނު މަޤުބޫލު ފަރެއްކަން ނަސީރު ފާހަގަ ކުރެއްވިއެވެ. އެންމެ ފުރަތަމަ އެ ސަރަޙައްދު ހިމާޔަތް ކުރެވުނު ސަބަބަކީވެސް އެއީކަން ނަސީރު ފާހަގަ ކުރެއްވިއެވެ.
ނަސީރު ވިދާޅުވީ، ޑައިވަރުންގެ މެދުގައި މަޤްބޫލުކަން ހޯދާފައިވާ 26 ތަނެއް ފާހަގަކޮށް، އެތަންތަން ހިމާޔަތްކުރުމުގެ މަސައްކަތް އެންމެ ފުރަތަމަ ފެށުނީ 90 ގެ އަހަރުތަކުގެ ތެރޭގައި ކަމަށެވެ. އޭރު އެންމެ ފުރަތަމަ އެކުލަވާލި ލިސްޓުގައިވެސް ރަސްފަރި ހިމެނެއެވެ. ރަސްފަރީގެ އިތުރުން ކަނބުރުދޫ ތިލައަކީވެސް އެގޮތަށް ފާހަގަކޮށްލެވޭ ތަނެއްކަމަށް ނަސީރު ވިދާޅުވިއެވެ. އެ ހުރިހާތަނެއްގެ ސަރަޙައްދު އަލުން ކަނޑައަޅައި، "ރީ-ބައުންޑަރީ" އާ ގުޅޭ މަސައްކަތްތައް މިހާރު މިނިސްޓްރީން ކުރަމުންދާކަަމަށް އޭނާ ވިދާޅުވިއެވެ.
ރަސްފަރީ ފަރަށް ދާދި ފަހުން ލިބުނު ގެއްލުމަށް އަލިއަޅުވާލައްވާ ނަސީރު ވިދާޅުވީ، އެއީ ތިމާވެށީގެ ގޮތުން ބަލާއިރު ނުހަނު މުހިއްމު ތަނެއް ކަމަށެވެ.
'އެމް.ވީ ނަވިއޯސް އަމަރިލިސް' ނަމަކަށް ކިޔާ ކާގޯ ބޯޓެއް ކ. ރަސްފަރީ ފަރަށް އެރުމާއި ގުޅިގެން އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން ވަނީ ޖޫރިމަނާގެ ގޮތުގައި 100 މިލިއަން ރުފިޔާ ދެއްކުމަށް ބޯޓުގެ ވެރިފަރާތަށް އަންގާފައެވެ. އެ މައްސަލަ، ބޯޓުގެ ވެރިފަރާތުން މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާއަށް އިސްތިއުނާފު ކުރުމަށް ހުށައެޅުމުން މިނިސްޓަރު އެމައްސަލަ ބައްލަވައި ނިންމެވީ އީޕީއޭގެ ނިންމުން ބަދަލުކުރަން އަންގަންޖެހޭ ތަނެއް ނެތްކަމަށެވެ.
މި މައްސަލައިގައި ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާގެ އަސްލު އަދަދު 893 މިލިއަން ރުފިޔާއަށް އަރައެވެ. ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާޢިދުގެ ދަށުން ކަނޑައެޅޭ އެންމެ މަތީ އަދަދަކީ 100 މިލިއަން ރުފިޔާއެވެ.
ރަސްފަރި ފަރަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން 1995 އިން ފެށިގެން ހިމާޔަތްކޮށްފައިވާ ފަރެކެވެ. މިއީ ޑައިވަރުންގެ މެދުގައި މަޝްހޫރު، މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަޙައްދެވެ. މި ފަރުގައިވާ މުރަކައިގެ ބަގީޗާގައި، އެންމަޑި ސާފުކުރުމަށް ބޭނުންކުރާ "ކްލީނިންގ ސްޓޭޝަން" އެއްވެސް ހިމެނެއެވެ. މީގެ އިތުރުން މި ސަރަޙައްދަކީ ފަރުމަހުގެ ދިރުމުން މުއްސަނދި އަދި ރާއްޖޭގައި ހިމާޔަތްކޮށްފައިވާ މާހުޅުނބުލަނޑާއާއި، މަޑިއާއި، މިޔަރާއި، ވެލާ ފެންނަ ސަރަޙައްދެކެވެ.
