މަހްމޫދު މަރާލީ ފައިސާއަށް، އިތުރު މީހެއްގެ ބައިވެރިވުމެއް ނެތް
އިތުރު ބައެއްގެ ބައިވެރިވުން ނެތް ކަަމަށް ޝާހު އާލަމްގެ އިއުތިރާފުގެ ބަޔާނުގައި ބުނެފައިވޭ
މަހްމޫދުގެ މަރުގެ މައްސަލާގައި ހައްޔަރުކޮށްފައިވާ ޝާހު އާލަމް
އދ. ދަނގެތީގެ ވިޔަފާރިވެރިޔާ މަހްމޫދު އަބޫބަކުރު މަރާލީ ފައިސާގެ ބޭނުމުގައި ކަމަށް ފުލުހުން ބުނެފިއެވެ.
މި މައްސަލައާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ, އިތުރު ބައެއްގެ ބައިވެރިވުން ނެތް ކަަމަށް ޝާހު އާލަމްގެ އިއުތިރާފުގެ ބަޔާނުގައި ބުނެފައިވާ ކަމަށެވެ. އަދި މިކަން ކޮށްފައިވަނީ ފައިސާގެ ބޭނުމުގައި ކަމަށެވެ.
ފުލުހުން އިތުރަށް ބުނީ މިއީ ޝާހު އާލަމް ކުރި ހަމައެކަނި ކުށް ނޫން ކަމަށެވެ. އަދި ރަށުގައި މީގެ ކުރިން ހިނގި ވައްކަމެއްގައި ވެސް އޭނާ ބައިވެރިވެފައިވާ ކަަމަށާއި، މި މައްސަލަ އދ. ދަނގެތީގެ ފުލުހުން ތަހުގީގު ކުރަމުންދާ ކަމަށެވެ.
ނޫސްވެރިންގެ ބައްދަލުވުމުގައި ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ ހެޑް ސްޕްރިންޓެންޑެންޓް އޮފް ޕޮލިސް ހަސަން ސައީދު ވިދާޅުވީ، މަހުމޫދަށް ފުރަތަމަ ހަމަލާ ދީފައިވަނީ ނެދުން ގޭގައި ކަމަށާއި، ފަސް ގަޑިއިރުގެ ތެރޭގައި ތިން ފަހަރަށް ހަމަލާ ދީފައިވާކަން ތަހުގީގަށް ފާހަގަކުރެވިފައިވާ ކަމަށެވެ. ހޯދިފައިވާ ފޫޓޭޖްތަކުން އެކަން ސާފުވާ ކަމަށާއި، ފަސްގަޑިއިރު ފަހުން ކޮނޑުމައްޗަށް މީހެއްގެ ހަށިގަނޑުލައިގެން ދާތަން ފެންނަ ކަމަށް ސައީދު ވިދާޅުވިއެވެ.
މީގެ އިތުރުން އެގޭގައި ވަޅުލާފައިވާ މަހުމޫދުގެ ހުރިހާ ސާމާނެއް ހޯދިފައިވާ ކަމަށާއި، މައްސަލަ ސާބިތު ކުރެވޭވަރަށް ހެކި ލިބިފައިވާ ކަމަށެވެ. އަދި ނެދުން ގެއިން ދެތިން ހަތިޔާރު ފެނިފައިވާ ކަމަށާއި، ހެކީގެ ގޮތުގައި އެހަތިޔާރު ބޭނުން ކުރާނެ ކަމަށެވެ.
މަހުމޫދު މަރާލީ ފައިސާގެ ބޭނުމުގައި ކަމަށްވާއިރު، 500ގެ ގާތްގަނޑަކަށް 20 ނޫޓް ފެނިފައިވާ ކަމަށް ސައީދު ވިދާޅުވިއެވެ. އަދި މަހުމޫދަށް ހަމަލާދީފައިވަނީ ކުރިއާލައި ރާވައިގެންކަން ތަހުގީގަށް ފާހަގަކުރެވިފައިނުވާ ކަމަށެވެ.
