މަހުމޫދުގެ މަރު: ތުހުމަތުކުރި ތިން މީހަކަށް އަނިޔާދީ، ގެއްލުން ދިން މައްސަލަ ތަހުގީގު ކުރަނީ!

އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލައިގެ އެރަށުގެ ރައްޔިތުން ތިން މީހަކަށް ތުހުމަތުކުރުމަށްފަހު ގެއްލުންތަކެއް ދީފައިވާ މައްސަލަ ތަހުގީގު ކުރަމުންދާ ކަމަށް ފުލުހުން ބުނެފިއެވެ.

މަހުމޫދުގެ މަރުގެ މައްސަލާގައި ބުރާސްފަތި ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމުގައި މޭޖާ ކްރައިމްސް އިންވެސްޓިގޭޝަންގެ ހެޑް ޗީފް ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ތަހުގީގަށް ބޮޑެތި ކުރިއެރުންތަކެއް ލިބިފައިވާ ކަމަށެވެ. ނަމަވެސް މިމަރާއެކު، އެރަށުގައި ދިރިއުޅެމުންދިޔަ ތިން މީހަކު މީގެ ކުރިން ކޮށްފައިވާ ކަންތައްތަކެއްގެ މައްޗަށް ރިޔާއަތްކޮށް، އެ ތިން މީހުންނަށް ތުހުމަތު ކުރި ކަމަށް ޝިފާއު ވިދާޅުވިއެވެ. ޝިފާއު ވިދާޅުވީ އެރަށުގެ މަދު ބައެއް އެ ތިން މީހުންނަށް ޖިސްމާނީ އަނިޔާދީ، އެމީހުންގެ މުދަލަށް ގެއްލުން ދީފައިވާ ކަމަށެވެ. އަދި އެ މައްސަލަ ވަކި މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ޝިފާއު ވިދާޅުވިއެވެ.

ޝިފާއު ވިދާޅުވީ މަރުގެ ހާދިސާއާ ގުޅިގެން ޖަޒުބާތުގައި ޖެހި، ހިނގާ ދިޔަ ކަންތައްތަކަކީ ވަރަށް ދެރަ ކަންތައްތަކެއް ކަމަށެވެ. އަދި ނުހައްގުން ބަޔަކަށް މިފަދަ މައްސަލައެއްގައި ތުހުމަތުކޮށް އަނިޔާ ކުރުމަކީ ކޮށްގެންވާނެ ކަމެއް ނޫން ކަމަށް ޝިފާއު ވިދާޅުވިއެވެ.

މީގެ އިތުރުން ޝިފާއު ވިދާޅުވީ މިފަދަ ކަންކަމާއި ގުޅިގެން އަސްލު މައްސަލާގެ ތަހުގީގު ކުރިއަށް ގެންދިއުމަށް އެކި ދަތިތައް ކުރިމަތިވާ ކަމަށާއި، ބައެއް ހާލަތްތަކުގައި ފޮރެންސިކް ހެކިތައް ގެއްލިގެންދާ ފަހަރު ވެސް ކުރިމަތިވާ ކަމަށެވެ. އެހެންކަމުން މިފަދަ ހާދިސާތަކުގައި ތުހުމަތެއްކޮށް، މީހުންނަށް ގެއްލުން ނުދިނުމަށް ވަނީ އިލްތިމާސްކޮށްފައެވެ.

މަހުމޫދުގެ މަރާ ގުޅިގެން އެރަށުގައި ދިރިއުޅެމުން ދިޔަ 31 އަހަރުގެ މުހައްމަދު ޖަމްޝާދާއި، 23 އަހަރުގެ ޝާރިހު އަލީ އެރަށުގެ ރައްޔިތުން ތުހުމަތުކުރިއެވެ. ހަމަނުޖެހުން ހިންގައި އެރަށުން އެމީހުން ބޭލުމުގެ މަސައްކަތް ދެނގެތީގެ ރައްޔިތުން ފެށިއެވެ. އެއާއެކު އެ ދެމީހުންގެ އިތުރުން އިތުރު އަންހެނަކަށް ހިމާޔަތް ދީގެން އދ. މަހިބަދޫ ގެންދިޔައެވެ. އެމީހުން ހައްޔަރުކުރީ އެރަށު ރައްޔިތުންގެ ހިތުގައި ބިރުވެރިކަން އުފެދޭ ގޮތަށް އަމަލުކޮށް، ރަށުގެ އާންމު މަސްލަހަތު ނަގާލަން މަސައްކަތް ކުރާ ކަމަށް ތުހުމަތު ކުރެވޭތީ ކަމަށް ފުލުހުން ބުނެފައިވެއެވެ.

މީގެ އިތުރުން ފުލުހުން ބުނީ މި މައްސަލަ ބެލުމަށްފަހު، ޖަމްޝާދާއި، ޝާރިހު ބަންދުން ދޫކޮށްލީ އޮކްޓޫބަރު މަހުގެ 23 ވީ ހޮނިހިރު ދުވަހު ކަމަށެވެ. އަދި އޮކްޓޫބަރު މަހުގެ 21 ވީ ބުރާސްފަތި ދުވަހު އެ މީހުންނާއެކު ހައްޔަރުކުރި އަންހެން މީހާ ދޫކޮށްލާފައިވާ ކަމަށް ފުލުހުން ބުނެއެވެ. އެ ތިން މީހުންނާއި މަހުމޫދުގެ މަރާއި އެއްވެސް ގުޅުމެއް ނެތް ކަމަށް ފުލުހުން ބުނެފައިވެއެވެ.