ރާއްޖޭގެ ހިމާޔަތްކޮށްފައިވާ ތަންތަނުގެ ތެރެއިން މެނޭޖްމެންޓް ޕްލޭން ހަދައި، ރަނގަަޅަށް ހިންގެނީ 5 ވަރަކަށް ތަން ކަމަށް އެންވަޔަރަންމެންޓް މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަސީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ސްޓޭޓް މިނިސްޓަރ ޑރ. ނަސީރު ވިދާޅުވީ ހިމާޔަތްކޮށްފައިވާ ތަންތަން ބެލެހެއްޓުމަށް މެނޭޖްމެންޓް ޕްލޭނެއް ހަދަންޖެހޭ ކަމަށެވެ. މީގެ ކުރިންވެސް މިފަދަ ތަންތަނުގައި އަމަލުކުރަން ވަކި ގަވާއިދުތަކެއް ހެދިފައި ހުރި ކަމަށާއި، އެހެންނަމަވެސް ރަނގަޅު މެނޭޖްމެންޓް ޕްލޭނެއް ހެދިފައިނުވާކަމަށެވެ.
މިހާތަނަށް އައިރު ރާއްޖޭގެ 73 ސަރަހައްދެއް ހިމާޔަތްކުރެވިފައިވާއިރު، އެތަންތަނުން މެނޭޖްމެންޓް ޕްލޭން ހަދައި، ރަނގަޅަށް ހިންގެނީ 5 ވަރަކަށް ތަން ކަމަށް ޑރ. ނަސީރު ވިދާޅުވިއެވެ. އެހެންނަމަވެސް ބާކީ ހުރި ތަންތަނަކީވެސް ގާނޫނީގޮތުން ހިމާޔަތްކުރެވިފައިވާ ތަންތަން ކަމަށް އޭނާ ވިދާޅުވިއެވެ.
މިގޮތުން މެނޭޖްމެންޓް ޕްލޭނެއްގެ ދަށުން ހިންގާ ތަންތަން ކަމަށްވާ އައްޑޫ ނޭޗަރ ޕާކް ނުވަތަ ހަނިފަރު ފަދަ ތަންތަނަކީ ވަރަށް ރަނގަޅަށް ބަލަހައްޓަމުންދާ ތަންތަން ކަމަށް އޭނާ ވިދާޅުވިއެވެ. އެތަންތަން ހިންގަމުންދަނީ އާމްދަނީވެސް ލިބޭނެ ގޮތަކަށް ކަމަށާއި، އެ އާމްދަނީ ބޭނުންކުރެވެމުންދަނީ އެ ސަރަަހައްދުގެ ރައްޔިތުންގެ ފައިދާއަށް ކަމަށް ޑރ. ނަސީރު ވިދާޅުވިއެވެ.
މީގެ އިތުރުން ބ. އަތޮޅުގެ ބައޮސްފިއަރ ރިޒަރވް ބަލަހައްޓަން ޚާއްސަ އޮފީހެއް ހުންނަ ފަދައިން ތަނެއް ހިމާޔަތްކުރެވޭ ހިސާބުން އެތަނެއްގެ ބެލެހެއްޓުމާއި، އަދި މިނޫންވެސް މެނޭޖްމެންޓް ކަންކަން ކުރެވެންޖެހޭ ކަމަށް ޑރ. ނަސީރު ވިދާޅުވިއެވެ.
އައްޑޫ ނޭޗަރ ޕާކާއި، ފުވައްމުލަކު ނޭޗަރ ޕާކު ބެލެހެއްޓުމުގައިވެސް މިނިސްޓްރީގެ ވަރަށް ގިނަ މުވައްޒަފުން މިހާތަނަށް ތިބެމުން އައީއެންވަޔަރަންމެންޓް މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަސީރު
މީގެ ކުރިން މި ތަންތަން ބެލެހެއްޓުމަށް މިނިސްޓްރީން މުވައްޒަފުން ބޭތިއްބި ނަމަވެސް ލާމަރުކަޒީ ގާނޫނުގެ ދަށުން ކައުންސިލްތަކަށް ބޮޑު ބާރެއް ލިބިފައިވުމާއެކު އެތަންތަނަކީ މިނިސްޓްރީން ބަލަހައްޓަންޖެހޭނެ ތަންތަން ކަމުގައި ގަބޫލުނުކުރައްވާ ކަމަށް އޭނާ ވިދާޅުވިއެވެ. އެހެންކަމުން އެތަންތަން ކައުންސިލްތަކާ ހަވާލުކުރުމުގެ މަސައްކަތް ފަށާފައިވާކަމަށް ޑރ. ނަސީރު ވިދާޅުވިއެވެ.
މިއަހަރުތެރޭގައި އަޅުގަނޑުމެން މިވަނީ ފުވައްމުލަކު ނޭޗަރ ޕާކާއި، އައްޑޫ ނޭޗަރ ޕާކު ސިޓީ ކައުންސިލްތަކާ ހަވާލުކުރުމުގެ މަސައްކަތް ފަށައި، މިހާރު ގާތްގަނޑަކަށް ހަމަ ނިމުމަކާ ހަމައަށް މިދަނީއެންވަޔަރަންމެންޓް މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަސީރު
މިނިސްޓްރީގެ ވިސްނުމަކީ އެތަންތަން ހިމާޔަތްކުރުމަށްފަހު އެތަންތަނުގެ މެނޭޖްމެންޓް ޕްލޭން ހަދައި މިނިސްޓްރީން އެތަންތަން ބެލެހެއްޓުމެއް ނޫން ކަމަސް ޑރ. ނަސީރު ވިދާޅުވިއެވެ. މިތަންތަން ބެލެހެއްޓުުގެ މަސައްކަތް ކައުންސިލްތަކާއި، އަދިވެސް އެހެނިހެން ފަރާތްތަކާ ހަވާލުކުރަަންޖެހޭ ކަމަށް ވިދާޅުވިއެވެ.
