ސައިންޓިފިކް ސަރވޭތައް ނިމެމުންދާވަރަކަށް އަންނަ އަހަރު ކެބިނެޓަށް ހުށަހަޅަނީ
ކޮވިޑާއި ގުޅިގެން މި މަސައްކަތް މަޑުޖެހުނު
ޑރ. އަބްދުﷲ ނަސީރު ރާއްޖެޓީވީގެ ފަލަސުރުޙީ ޕްރޮގްރާމުގައި ވާހަކަ ދައްކަވަނީ
ފަސް އަހަރުގެ ތެރޭގައި ކޮންމެ އަތޮޅެއްގައި ފަޅެއް، ކަނޑޫފަލެއް، ފަރެއް، ތިމާވެށީގެ ގޮތުން ހިމާޔަތް ކުރެވިފައިވާ ސަރަހައްދެއްގެ ގޮތުގައި ހެދުމަކީ ސަރުކާރުގެ ވައުދެއް ކަމަށްވާއިރު ސަރވޭތައް ނިމެމުންދާވަރަކަށް އަންނަ އަހަރު ކެބިނެޓަށް ހުށަހަޅުއްވާނެ ކަމަށް މިނިސްޓަރ އޮފް ސްޓޭޓް ފޯ އެންވަޔަރަމެންޓް ކްލައިމޭޓް ޗޭންޖް އެންޑް ޓެކްނޮލިޖީ ޑރ. އަބްދުﷲ ނަސީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމުގައި ވާހަކަ ދައްކަވަމުން ނަސީރު ވިދާޅުވީ ރާއްޖޭގެ ކޮންމެ އަތޮޅަކުން ފަރުގެ ސަރަހައްދު ހިމާޔާތް ކުރުމަކީ މުހިންމު ވައުދެއް ކަމަށެވެ. އަދި ކޮވިޑާއި ގުޅިގެން މި މަސައްކަތް މަޑުޖެހުނު ކަމަށެވެ. މި މަސައްކަތުގެ ދަށުން އެ ސަރަހައްދުތަކަށް ގޮސް ކުރަންޖެހޭ ސައިންފިކް ސަރވޭތައް ވެސް ހުންނަ ކަމަށް ވިދާޅުވިއެވެ.
މިހާރު އަރިއަތޮޅުގެ ސަރވޭ ނިންމާ، ލ. އަތޮޅުގެ ހުރިހާ ތަނެއް ވެސް ސަރވޭ މިއަހަރު ކެބިނެޓަށް ހުށަހެޅުމަށް ތައްޔާރުވަމުންދާ ކަމަށް ވިދާޅުވިއެވެ. މީގެއިތުރުން ހައްދުންމަތީގައި ހިމާޔަތް ކުރަން ބޭނުންވާ ހުރިހާ ސަރަހައްދުތަކުގެ މައުލޫމާތު އެއްކޮށް ނިންމާލާފައިވާ ކަމަށް ނަސީރު ވިދާޅުވިއެވެ.
ވަރަށް ގިނަ ތަންތާނގައި ޚާއްސަ ސިފަތައް އެބަހުރި ކަމަށާއި އެގޮތުން ލ. އަތޮޅުގައި ހުރި ކަނޑޫފާ ކުޅި ޗަސްބިންތައް ވެސް ފާހަގަކޮށްލެވޭ ކަމަށް އޭނާ ވިދާޅުވިއެވެ.
ތިމާވެށީގެ ގޮތުން ތަންތަން ހިމާޔާތް ކުރުމަކީ ބުރަ މަސައްކަތެއްކަން ފާހަގަކުރައްވާ ނަސީރު ވިދާޅުވީ ތަންތަން ހިމާޔަތް ކުރުމުގައި ވިސްނަން މަޖުބޫރު ކަންތައްތަކެއްވާ ކަމަށެވެ. އެގޮތުން ހުރިހާ ސްޓޭކް ހޯލްޑަރުންނާއެކު މަޝްވަރާކޮށް، އެންމެން އެއްބަސްވާ ގޮތަށް ކަންތައްތައް ނިންމުމަކީ މުހިންމު ކަމެއް ކަމަށެވެ.
ތަންތަން ހިމާޔަތް ކުރުމަށް ރައްޔިތުންނާއި ގާތުން މަސައްކަތް ކުރަންޖެހޭކަން ފާހަގަކުރައްވާ ނަސީރު ވިދާޅުވީ ވަރަށް ގިނަކަންތައްތައް ކުރަން ޖެހޭ ކަމަށެވެ. އެގޮތުން ކައުންސިލާއި ކަމާއި ބެހޭ ހުރިހާ މީހުންނާއި މަޝްވަރާކޮށް، އެ މީހުންގެ އެއްބާރުލުން ވެސް ހޯދަން ޖެހޭ ކަމަށެވެ.
ފަރުތަކުގެ މުއްސަނދިކަމަށް އިޝާރާތް ކުރައްވާ ނަސީރު ވިދާޅުވީ ކޮވިޑުގެ ހާލަތުގައި ވެސް ހިފަހައްޓާލެވުނީ ދަނޑުވެރިކަމާއި މަސްވެރިކަމުން ލިބުނު ނަފާއަކުން ކަމަށެވެ.
