ހުކުރު ދުވަހު ހެނދުނު އެޗްޑީސީ އިން މުރަކަ އިންދުމަށްފަހު ރޭގަނޑު ތިމާވެށީގެ ބައްދަލުވުމެއް ބާއްވަނީ
2 އޮކްޓޯބަރު 2025 | ބުރާސްފަތި 11:44ސަރުކާރާ ދެކޮޅަށް ބޮޑު މުޒާހަރާއެއް އޮންނަ ދުވަހު އެޗްޑީސީން ތިމާވެށީގެ ޚާއްސަ ޕްރޮގްރާމްތަކެއް ކުރިއަށް ގެންދަން ވަނީ ނިންމާފައި
ހުޅުމާލެ
މާލޭގައި ސަރުކާރާ ދެކޮޅަށް ބޮޑު އެއްވުން އޮންނަ ދުވަހު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ތިމާވެށީގެ ޚާއްސަ ޕްރޮގްރާމްތަކެއް ކުރިއަށް ގެންދަން ނިންމައިފިއެވެ.
އެގޮތުން ހުކުރު ދުވަހު ހެނދުނު 7:00 ގައި، ހުޅުމާލޭގެ ފޭސް އެކަކާއި ފޭސް ދޭއްގެ ބީޗް ގުޅޭ ބްރިޖު ސަރަހައްދުގައި ގޮނޑުދޮށާއި، ހޭޅިފަށާއި، މޫދު ސާފު ކުރުމުގެ ޕްރޮގްރާމެއް ފެށުމަށް ވަނީ ހަމަޖެހިފައެވެ. އޭގެ އިތުރުން ހުޅުމާލޭގެ ދެ ފޭސް ގުޅޭ ޗެނަލް ސަރަހައްދުގައި މުރަކަ އިންދުމަށް ވެސް ވަނީ ރޭވިފައެވެ.
ގޮނޑުދޮށް ސާފު ކުރުމުގެ ޕްރޮގްރާމް ރާއްޖޭގެ އެކި ސަރަހައްދުތަކުގައި މީހުން އުޅޭ ރަށްރަށާއި ރިސޯޓުތަކުގައި ވެސް ކުރިއަށް ގެންދަން ވަނީ ރާވާފައެވެ.
މުޅި ދުވަހަށް ރޭވިގެން ކުރިއަށް ގެންދާ މި ހަރަކާތުގައި، ހުކުރު ދުވަހުގެ ރޭގަނޑު ޕެނަލް ޑިސްކަޝަނެއް ކުރިއަށް ގެންދަން ހަމަޖެހިފައިވާއިރު މި ބައްދަލުވުމުގައި އެންޖީއޯތަކާއި ސަރުކާރު ހިއްސާވާ ކުންފުނިތައް ބައިވެރި ކުރާ ގޮތައް ހަމަޖެހިފައިވާ ކަމަށް މައުލޫމާތު ލިބިފައިވެއެވެ.
ހުކުރު ދުވަހުގެ ރޭ ލޫޓުވައިފި، ލޫޓުވައިފި ނަމުގައި އެންމެ ބޮޑު އިދިކޮޅު ޕާޓީ އެމްޑީޕީ އިން އިންތިޒާމު ކުރާ ބޮޑު މުޒާހަރާ އާ ދިމާވާ ގޮތައް ސަރުކާރާއި ސަރުކާރުގެ ކުންފުނިތައް ގުޅިގެން ގިނަ ހަރަކާތްތަކެއް އަންނަނީ ރާވަމުންނެވެ.
ސަރުކާރުގެ ސިޔާސަތުތަކުގެ ސަބަބުން ރައްޔިތުންނަށް އެތަކެއް ދަތިތަކާ އުނދާގޫތައް ކުރިމަތިވެ ގައުމުގެ ހާލަތު ދަށަށް ދާތީ އެކަމާ އިހުތިޖާޖު ކުރުމުގެ ގޮތުން އެމްޑީޕީ އިން ބާއްވާ މުޒާހަރާ ގައި ގިނަ ބަޔަކު ބައިވެރިވާނެ ކަމަށް ބެލެވިފައިވާއިރު އަދާލަތު ޕާޓީން ވެސް ވަނީ ރަސްމީ ކޮށް މުޒާހަރާ ގައި ބައިވެރިވާނެ ކަން އިއުލާނު ކޮށްފައެވެ.
