އިޤްރާ ހައިބްރިޑް ބުކް ފެއަރ 2021 ހުޅުވުމުގެ ރަސްމިއްޔާތު ބުދަ ދަވަހު ބާއްވައިފިއެވެ.

މިރަސްމިއްޔާތު ބާއްވައިފައި ވަނީ ބުދަ ދުވަހުގެ ހެނދުނު 9:30ގައި ދިވެހިރާއްޖޭގެ އިސްލާމީ ޔުނިވަރސިޓީގައެވެ. މި ރަސްމިއްޔާތުގައި ވާހަކަ ދައްކަމުން ޑޮކްޓަރ އިބްރާހިމް ލަތީފް ވިދާޅުވީ، ސްކޫލްތަކާއި މަތީ ތައުލީމު ދޭފަރާތްތަކުގައި، ޚާއްސަކޮށް ދިވެހި ފޮތްތައް ވަރަށް މަދުވެފައިވާ ކަމަށެވެ. އަދި ދިވެހި ފޮތްތައް މަދުވުމުން ވަރަށް ބޮޑު އުނިކަމެއް އޮތްކަން ވެސް ލަތީފް ވިދާޅުވެފައި ވެއެވެ.

އިސްލާމިކް މިނިސްޓްރީއިން ކުރަމުން ގެންދާ މަސައްކަތްތަކުގެ ތެރޭގައި، އިލްމު އެފައްދައި، އިލްމު ފެތުރުމުގެ މަސައްކަތަކީ މުޖުތަމައަށް ކޮށްދެވޭ ވަރަށް މުހިންމު ކަމެއް ކަމަށް ލަތީފް ފާހަގަކުރެއްވިއެވެ. އަދި މުޖުތަމައު ކުރިއެރުވުމަށް ފޮތްތައް ވަރަށް މުހިންމު ރޯލެއް ކުޅޭކަމަށް ވެސް ވިދާޅުވެފައި ވެއެވެ.

އާންމުކޮށް މުޖުތަމައުގައި ފެންނަން ހުންނަނީ އިނގިރޭސި ފޮތްތަކެއް ކަމަށް ލަތީފް ވިދާޅުވެފައި ވެއެވެ. ނަމަވެސް މިރަސްމިއްޔާތުގައި 2 ދިވެހި ފޮތްތަކެއް ތައާރަފް ކުރެވިގެން ދިއުމަކީ ވަރަށް ބޮޑު ކުރިއެރުމެއް ކަމަށް ވެސް ލަތީފް ފާހަގަ ކުރައްވާފައި ވެއެވެ.

ދިވެހި ބަހުން މުޖުތަމައުގެ ނުވަތަ ދިވެހި ސަގާފަތުގެ ވާހަކަ ލިޔުމުން ނުވަތަ ކިޔުމުން އެކުރެވޭ އިހްސާސްތަކެއް އިނރޭސި ބަހަކުން ނުކުރެވޭނެ ކަމަށް ލަތީފް ވިދާޅުވެފައި ވެއެވެ. ދިވެހި މުޖުތަމައެއްގައި އިނގިރޭސި ފޮތްތައް ގިނަވެގެން ދިއުމާއި، ދިވެހި ފޮތްތައް ނުވަތަ ދިވެހި ކަންކަން އިނގިރޭސިން ލިޔެފައި ހުރުމުން، ހަގީގަތުގައި އެކަންކަން ދެނެގަތުމަށް ކުރާ އަސަރު ވަރަށް ކުޑަ ވާނެ ކަމަށް ވެސް ލަތީފް ވިދާޅުވެފައި ވެއެވެ.

އެހެންކަމުން ދިވެހި ބަހުގައި މީހާގެ ފިކުރު އުފެދިގެން އަންނައިރު، އެމުޖުތަމައެއް ދެމެހެއްޓުމުގައި އަދި މުޖުތަމައުގައި ހިނގާ ކަންތައްތައް އަންނަން އޮތް ޖީލަށް ގެންދިއުމަށް އެބައެއްގެ މާދަރީ ބަހުން އެމައުލޫމާތުތައް ހުންނަން ޖެހޭކަމަށް ވެސް ލަތީފް ވިދާޅުވިއެވެ.

މީގެ އިތުރުން ލަތީފް ވިދާޅުވީ އޯޑިއޯ ފޮތް ލޯންޗް ކުރުމުން ލަތީފްގެ އުންމީދަކަށް ވެފައިވަނީ މިކަހަލަ ޑިޖިޓަލް ގޮތްގޮތަށް ވެބްސައިޓްތަކަށް ދިވެހި ވާހަކަ ނެރެވި، ވެބްސައިޓްތަކުން ވެސް އަދި ޑިޖިޓަލްކޮށް، މިސާލަކަށް އެމެޒޮން ކަހަލަ ސައިޓުކަނުންވެސް ދިވެހި ފޮތްތަކެއް ލިބިގެންދާނެ ކަމަށެވެ. މީގެ އިތުރުން މިޔުނިވަރސިޓީގެ ލައިބްރަރީ މިހާރު ވަނީ އާންމުންނަށް ހުޅުވައިލައިފަ އެވެ.

މި ރަސްމިއްޔާތުގައި ވާހަކަ ދައްކަމުން ޔުނިވަރސިޓީގެ ވައިސް ޗާންސެލަރ ޑޮކްޓަރ އިބްރާހީމް ޒަކަރިއްޔާ މޫސާ ވިދާޅުވީ، ޔުނިވަރސިޓީ އެއްދުވަހުން އަނެއް ދުވަހަށް ތަރައްގީ ކުރުމުގެ މަސައްކަތްތަކުގައި ލައިބްރަރީގެ މުޅި ޓީމު ހަރަކާތްތެރި ވަމުންދާ މަންޒަރު ވަރަށް ގާތުން ފެނި ވަޑައިގެންފައިވާ ކަމަށެވެ. ލައިބްރަރީ އެއްހަރުފަތުން އަނެއް ހަރުފަތަށް ގެންދިއުމަށްޓަކައި ކުރެވޭ މަސައްކަތްތަކުގެ ތެރެއިން އެއް މަސައްކަތަކަށް ވެފައިވަނީ އޯޑިއޯ ފޮތް ނެރުމުގެ މަސައްކަތެވެ.

އިބްރާހީމް ޒަކަރިއްޔާ މޫސާ ވިދާޅުވީ މިމަސައްކަތް ކުރިއަށް ގެންދިއަ ވަގުތު ވަރަށް ބައިވަރު ގޮންޖެހުން ތަކަކާއި ކުރިމަތި ލާން ޖެހުނުކަމަށެވެ. އޭގެ ތެރޭގައި އޯޑިއޯ ފޮތްތަކަށް އަޑު އަޅާނެ މީހެއް ނުލިބިގެން އުޅެންޖެހުނު ކަމަށްވެސް ޒަކަރިއްޔާ މޫސާ ވިދާޅުވެފައި ވެއެވެ. އެހެންނަމަވެސް މިކަމަށް ޝައުގުވެރިވެ ވަޑައިގެން ތިއްބެވި ބޭފުޅުންތަކެއް ލިބިގެން ދިޔަ ކަމަށްވެސް ޒަކަރިއްޔާ މޫސާ ފާހަގަކުރެއްވިއެވެ.

އިޤްރާ ހައިބްރިޑް ބުކް ފެއަރ 2021ގައި މާލޭގެ ތަފާތު ބުކްޝޮޕްތަކުން ވަނީ ބައިވެރި ވެފައެވެ. މީގެ ތެރޭގައި ނޮވެލްޓީ ބުކްޝޮޕްއާއި ޗާންދަލިއަރ ބުކްޝޮޕްއާއި އަސްރަޕީ ބުކްޝޮޕްއާއި ދިވެހި އެކަޑަމީން ބައިވެރިވިއެވެ.