ރާއްޖޭގެ އެކި ރަށްރަށުގެ ކައުންސިލްތައް އޮޑިޓް ކުރުމަށް ރާއްޖޭގެ އަށް އޮޑިޓް ފާމަކާ ހަވާލުކޮށްފިއެވެ.

މި މަސައްކަތް ހަވާލުކޮށްފައި ވަނީ އޭއައިއެސް އެލްއެލްޕީ، ކައުރީ މޯލްޑިވްސް އެލްއެލްޕީ، އެފްސީ އެލްއެލްޕީ، އެފްޖޭއެސް އެސޯޗިއޭޓްސް އެލްއެލްޕީ، މެކްރޯ އެޝުއަރެންސް އެލްއެލްޕީ، އެމްއެޗްއެޕީއޭ ލްއެލްޕީގެ އިތުރުން މައިލް އެންޑް އެސޯސިއޭޓްސް އަދި ޕްރޫޑެންޓް ޗާޓާޑް އެލްއެލްޕީއާއެވެ.

ކައުންސިލްތައް އޮޑިޓް ކުރުމުގެ މަސައްކަތް ހަވާލުކުރުމަށް އޮޑިޓަރ ޖެނެރަލް އޮފީހުގައި މިއަދު ބޭއްވި ރަސްމިއްޔާތު ޝަރަފްވެރިކޮށްދެއްވީ ރައްޔިތުން މަޖިލީހުގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒެވެ. ނިޔާޒު ވިދާޅުވީ މިއަދު މި ފެށިގެންދިޔައީ ވަރަށް މުހިންމު މަސައްކަތެއް ކަމަށާ، މީގެ ސަބަބުން ލޯކަލް ކައުންސިލްތަކުގެ މަސައްކަތްތައް ރަނގަޅަށް ބެލެހެއްޓި އިތުރަށް ޒިންމާދާރު ކުރެވިގެންދާނެ ކަމަށެވެ.

ނިޔާޒު ވަނީ މީގެ ކުރިން ލޯކަލް ކައުސިލްތަކަށް ސަރުކާރުން ކަނޑައަޅާފައިވަ ބަޖެޓާ އަޅާބަލާއިރު މިއަންނަ އަހަރަށް ކަނޑައަޅާފައިވާ ބަޖެޓް ބޮޑުތަނުން އިތުރުވެފައިވާކަން ފާހަގަކުރައްވާފައެވެ. މީގެ ސަބަބުން ލާމަރުކަޒީ އުސޫލުން ގައުމު ހިންގައި، ރާއްޖޭގެ ހުރިހާ ސަރަހައްދަކަށް ކުރިއެރުން ލިބިގެންދާނެ ކަމަށް ނިޔާޒު ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަމުން އޮޑިޓަރ ޖެނެރަލް ހުސައިން ނިޔާޒީ ވިދާޅުވީ، ހުރިހާ ލޯކަލް ކައުންސިލްތަކެއް އޮޑިޓަރ ޖެނެރަލްއިން އޮޑިޓް ކުރުމަކީ ވާނެ ކަމެއް ނޫން ކަމަށެވެ. އަދި ބިޑަށް ހުޅުވަލައިގެން ރާއްޖޭގެ އެކި އޮޑިޓް ފާމްތަކަށް މި މަސައްކަތް ހަވާލުކުރުމުގެ ސަބަބުން މިކަމަށްތަކައި ދައުލަތުން ކުރަންޖެހޭ ޚަަރަދު ކުޑަވާނެކަން ފާހަގަކުރައްވައި ނިޔާޒީ ވިދާޅުވީ އޮޑިޓަރ ޖެނެރަލްގެ އޮފީހަށް އިތުރު މުއައްޒަފުންތަކެއް ނަގައިގެން މި މަސައްކަތް ކުރާނަމަ ޚަރަދު މާބޮޑުވާނެ ކަމަށެވެ. މި މަސައްކަތުގެ ފެންވަރު ރަނގަޅުވުމުގެ އިތުރުން މަސައްކަތް އަވަށް ނިންމޭނެކަމަށް ނިޔާޒީ ފާހަގަކުރެއްވިއެވެ. ޕްރައިވެޓް ފާމްތަކުން ކައުންސިލްތައް އޮޑިޓް ކުރި ނަމަވެސް މިހުރިހާ މަސައްކަތެއް އޮޑިޓަރ ޖެނެރަލްގެ އޮފީހުން ބަލާނެއެވެ.

ކައުންސިލްތައް އޮޑިޓް ކުރުމުގެ މަސައްކަތް މި ފާމްތަކުން ނިންމަން ޖެހޭނީ 2022 ވަނަ އަހަރުގެ މެއި މަހުގެ ނިޔަލަށެވެ. އެކި ޕްރވިންސްތަކުގެ މަސައްކަތް ކްލަސްޓާތަކަށް ބަހާލައިގެން އޮޑިޓް ކުރުމަށް މި ފާމްތަކާއި ހަވާލުކުރެވިފައިވަނީ 2020 އަދި 2021ގެ އޮޑިޓް ކުރުމަށެވެ. މި މަސައްކަތްތައް ރަނަގަޅަށް ނިމިއްޖެނަމަ ދެއް ނުވަތަ ތިން އަހަރު ދުވަހުގެ މުއްދަތަށް މި ފާމްތަކާއެކު ކޮންޓްރެކްޓް ހެދުމަށް ވަނީ ނިންމާފައެވެ.

ރާއްޖެގައި އޮޑިޓްގެ މަސައްކަތް ރަސްމީ ސސިފައެއްގައި ކުރަމުން އަންނަތާ ޑިސެމްބަރ މަހަށް ވަނީ 72 އަހަރު ވެފައެވެ. އެހެންކަމުން މި ރަސްމިއްޔާތުގެ ތެރެއިން ވަނީ އޮޑިޓް އޮފީހަށް 72 އަހަރު ފުރުން ފާހަގަ ކޮށްފައެވެ.