އައްޑޫ ބައިބައި ކުރުން: ވަކި އަތަކަށް ބުރަވެ ރައީސް މުއިއްޒު ތަފްސީލު ކޮށްދެއްވީ ކަން އޮންނަ ގޮތުގެ އެއްފަރާތް
އައްޑޫ ފޭދޫއާއި ހުޅުދޫ އަދި މީދޫ ރައްޔިތުން ބޭނުންވާ ގޮތަކަށް ވޯޓު ލުމުން ނިމުނީ ކަމަށް ރައީސް ވިދާޅުވި
ރައީސް ޑރ. މުހައްމަދު މުއިއްޒު
އައްޑޫ ސިޓީގެ ތިން ރަށުގައި ކައުންސިލްތައް އުފައްދާނެ ގޮތާއިމެދު އަންނަ ހޮނިހިރު ދުވަހު ނަގާ ފެންނަ ނުފެންނަ ވޯޓުގައި ސަރުކާރުން ހާސިލްކުރަން ބޭނުންވާ ވަކި ނަތީޖާއެއް ނެތް ކަމަށް ވިދާޅުވުމަށްފަހު ސަރުކާރުން ބޭނުންވާ ގޮތް ރައީސް ޑރ. މުހައްމަދު މުއިއްޒުގެ ވާހަކަފުޅުގައި ހާމަކުރައްވައިފިއެވެ.
ލ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ލ. ފޮނަދޫއަށް ވަޑައިގެން ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ އައްޑުއަތޮޅު ފޭދޫގެ ރައްޔިތުންގެ ޚިޔާލު ހޯދުމަށް ނަގާ ވޯޓުގައި ސަރުކާރުން ހާސިލުކުރައްވަން ބޭނުންވާ ވަކި ނަތީޖާއެއް ނެތްކަމުގައެވެ. އަދި އައްޑޫ ފޭދޫއާއި ހުޅުދޫ އަދި މީދޫ ރައްޔިތުން ބޭނުންވާ ގޮތަކަށް ވޯޓު ލުމުން ނިމުނީ ކަމަށާއި، އެމަނިކުފާނު ކުރައްވަ ކަމަކީ އެމަނިކުފާނުގެ ވެވަޑައިގެންނެވި ވައުދުފުޅެއް ފުއްދަވަނީ ކަމަށެވެ.
ނަމަވެސް ވަކި ވަކި ކައުންސިލް އުފެދުމުން ލިބޭނެ ފައިދާގެ ވާހަކަ ހިއްސާ ކުރެއްވި އިރު ސިޓީގެ ގޮތުގައި މިހާރު އޮންނަ ގޮތަށް އޮތުމުން ލިބޭނެ ފައިދާއެއް އެއްވެސް ވަރަކަށް ރައީސް ފާހަގަ ނުކުރައްވައެވެ. ވަކި ކައުންސިލްތައް ކަނޑައެޅުމުގެ ވޯޓާއި ގުޅޭގޮތުން ރައީސް ވިދާޅުވީ ރިޔާސީ އިންތިހާބުގެ ތެރޭގައި އެމަނިކުފާނާ ހަމައަށް އައީ ވަކި ކައުންސިލްތަކެއް އުފެއްދުމުގެ ކަންތަކުގައި އެމީހުންނަށް ހައްލެއް ގެނެސްދިނުމަށް ކަމަށެވެ. އަދި ދާއިމީ ހައްލެއް ގެނެސްދެއްވާނެކަމަށް ވިދާޅުވި ކަމަށާއި، ނިޒާމުގެ ތެރެއިން އެކަން ހައްލުކުރުމުން ރައްޔިތުން ބޭނުންވާ ގޮތަކަށް ނިންމުމަށް ފުރުސަތުދެއްވާނެ ކަމަށެވެ.
ރައްޔިތުން ނިންމާ ކޮންމެ ގޮތަކީ ސަރުކާރުގެ ނިންމުން. ސަރުކާރުން ތާއިދުކުރާނެ ގޮތް، ސަރުކާރުން ޕްރިފަރ ކުރާ ވަކި އެއްވެސް ނިންމުމެއް އެޔަކު ނެތް. އައްޑޫ ސިޓީގެ މިހާރުގެ އޮތް ކޮމްޕޮޒިޝަން ބޭއްވުން ކަމަށްވިއްޔާ ސަރުކާރުން ފުރިހަމައަށް އެކަމަށް ތާއިދުކޮށް އެއްބާރުލުން ދެއްވާނެ ކަމެއް. ވަކިވަކި ކައުންސިލްތައް ހަދަން ބޭނުންވިޔަސް އެކަމަށް ވެސް އެއްބާރުލުންދޭނަން. ވަކި ކައުންސިލްތަކެއް އުފެދިއްޖެއްޔާ އެ ކައުންސިލަކަށް، ކައުންސިލެއްގެ ހުރިހާ ހައިސިއްޔަތެއް ލިބޭނެ. ވަކި ބަޖެޓެއް އަންނާނެ. މިހާރު އޮންނަނީ މުޅި ސިޓީއަށް އެއް ބަޖެޓް. މިހާރަކު ވަކިންނެއް ފޭދޫއަކަށް ވަކި ބަޖެޓެއް ނޯވޭ. ހުޅުދޫއަކަށް، މީދޫއަކަށް ވަކި ބަޖެޓެއް ނޯވޭރައީސް ޑރ މުހައްމަދު މުއިއްޒު
ރައީސް ވަނީ ވަކި ވަކި ކައުންސިލްތައް އުފެދުމުން ބްލޮކް ގްރާންޓުގެ ގޮތުގައި ލިބޭނެ އަދަދުތައްވެސް ހާމަކުރައްވާފައެވެ. ނަމަވެސް މުޅި ސިޓިއަށް ލިބޭ ގްރާންޓުގެ ވާހަކަ ހިއްސަ ނުކުރައްވައެވެ. ރައީސް ވިދާޅުވީ މިހާރު ފޭދޫ، ހުޅުދޫ އަދި މީދޫ އަކަށް ވަކި ބަޖެޓެއް ނޯންނަ ކަމަށެވެ.
ވަކި ކައުންސިލެއް އުފެދިއްޖެއްޔާ އެ ކައުންސިލަކަށް ހުރިހާ ހައިސިއްޔަތެއް ލިބިގެންދާނެ. ވަކި ބަޖެޓެއް އަންނާނެ. މިހާރު އޮންނަނީ މުޅި ސިޓީއަށް އެއް ބަޖެޓް. މިހާރު ވަކިންނެއް ފޭދޫއަކަށް ވަކި ބަޖެޓެއް ނޯވޭ، ހުޅުދޫ އަށް މީދޫ އަކަށް ވަކި ބަޖެޓެއް ނޯވޭ. ނަމަވެސް މިގޮތަށް ހަމަޖެހިގެން ރައްޔިތުން އެގޮތަށް ނިންމަވައިފި ހާލަތެއްގައި މިހާރު ބްލޮކް ގްރާންޓް ކަލްކިއުލޭޓް ކުރާ އުސޫލަށް ބަލާއިރުގައި ފޭދޫގައި ވަކި ކައުންސިލެއް އުފައްދައިފިއްޔާ ފޭދޫ ކައުންސިލަށް ލިބޭނެ އަހަރަކު 25 މިލިއަނެއްހާ ރުފިޔާ. ހުޅުދޫ ކައުންސިލަށް ލިބޭނެ ގާތްގަނޑަކަށް 13 ނުވަތަ 14 މިލިއަން ރުފިޔާ އަދި މީދޫ ކައުންސިލަށް ލިބޭނެ ގާތްގަނޑަކަށް 18 މިލިއަން ރުފިޔާ ބްލޮކް ގްރާންޓުގެ ގޮތުގައި.ރައީސް ޑރ މުހައްމަދު މުއިއްޒު
ރައީސް ވިދާޅުވީ މިހާރު އެއްވެސް ރަށަކަށް ވަކި އަދަދެެއް ނޯންނަ ކަމަށެވެ. މުޅި ސިޓީއަށް އޮންނަ ބަޖެޓެއް އޮންނަ އިރު އެމަނިކުފާނު ގަބޫލުކުރައްވަނީ އެކަން ރައްޔިތުންނަށް ސާފުކޮށްލަ ދެއްވުމަކީ ސަރުކާރުން އެއްވެސް ކަހަލަ މީގައި އައުޓްކަމްއެއް، ވަކި ނަތީޖާއެއް ބޭނުން ނުވާ ހާލަތުގައި ވެސް ރައްޔިތުންނަށް ކަންކަން ނިމިގެންދާ ގޮތަކުން ވާނެގޮތް ބަޔާންކޮށްދިނުމުގެ ޒިންމާއަކީ އެމަނިކުފާނުގެ ކިބައިގައި ވެސް އޮތް ޒިންމާއެއްކަން ފެންނާތީ އެވާހަކަ ދަންނަވާލީ ކަމަށެވެ.
އައްޑޫ ސިޓީ ބައިބައިކުރާ ވޯޓުގައި ސަރުކާރުގެ ސްޓޭންޑެއް ނެތް ކަމަށް ރައީސް ވިދާޅުވި ނަމަވެސް ފޮނަދޫގައި ބޭއްވި ޖަލްސާފައި ވަކިވަކި ކައުންސިލްތައް އޮތުމުން ލިބޭނެ ފައިދާއާއި އަދި ގްރާންޓުގެ ވާހަކަ އެކަނި ދައްކަވާ އެމަނިކުފާނު ވަނީ ކެމްޕޭން ކުރައްވާފައެވެ.
