ލާމަރުކަޒީ ގާނޫނަށް ގެނެވުނު 16 ވަނަ އިސްލާހް ގެނައުމުގެ ގާނޫނުން ކައުންސިލަށް މުވައްޒަފުން ނުނެގި ރަށުގެ ރައްޔިތުންނަށް ކައުންސިލުން ދޭ އަސާސީ ކިދުމަތްތައް ހުއްޓިދާނެ ކަމުގެ ބިރު އޮތުމުން ކައުންސިލްތަކަށް މުވައްޒަފުން ނެގުމަށް ބޭނުންވާ އުސޫލު ވީހާ ވެސް އަވަހަށް ފާސްކޮށް. އެ އުސޫލު ގެޒެޓް ކޮށްދިނުމަށް ށ. ފޭދޫ ކައުންސިލުން ސަރުކާރަށް ގޮވާލައިފި އެވެ.

ލާމަރުކަޒީ ގާނޫނަށް ފަހުން ގެނެވުނު އިސްލާހާއި އެކު މުވައްޒަފުން ނުނެގޭ މައްސަލައިގައި ކަންބޮޑުވުން ފާޅުކޮށް ފޭދޫ ކައުންސިލުން ނެރުނު ބަޔާނެއްގައި ބުނީ ސަރުކާރުގެ ފަރާތުން ގާނޫނު ނަމްބަރ 7/2010، ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫނަށް ގެނެވުނު 16 ވަނަ އިސްލާހުގައި ކައުންސިލްތަކުގެ ދައުރު ހަމަވާން އެއް އަހަރަށް ވެފައިވާ ނަމަ ކައުންސިލްތަކަށް މުވައްޒަފުން ނުނެގޭނޭ ކަމަށް ބަޔާންކޮށްފައިވާތީ، ކައުންސިލުން ދެމުން ގެންދާ ރަށްވެހިކަމުގެ ޚިދުމަތް ތަކަށް ބޭނުންވާ މުވައްޒަފުން ނުނެގުމަކީ އެ ކައުންސިލުން ވަރަށް ކަންބޮޑުވާ ކަމެއް ކަމަށެވެ.

އެގޮތުން ލާމަރުކަޒީ ގާނޫނަށް ގެނައި އިސްލާހުގެ ދަށުން މިހާރު ރަށްވެހިކަމުގެ ޚިދުމަތްތަކުގެ ތެރެއިން މިސްކިތްތައް ބެލެހެއްޓުމާއި ކުނި މެނޭޖް ކުރުމުގެ ޚިދުމަތަށް ބޭނުންވާ މުވައްޒަފުން ނުނެގޭތީ ރަށުގެ ރަސްޔިތުންނަށް ދޭ އަސާސީ ހިދުމަތްތަށް ހުއްޓިދާނޭ ކަމުގެ ކަންބޮޑުވުން އިންތިހާއަށް އޮތް ކަމަށް ބަޔާނުގައި ބުނެފައި ވެއެވެ.

އަދި އެ ގާނޫނުގެ ދަށުން ދެން ކައުންސިލަށް މުވައްޒަފުން ނެގޭނީ ގާނޫނު ފާސްކުރާތާ 30 ދުވަހުގެ ތެރޭގައި ލޯކަލް ގަވަމަންޓް އޮތޯރިޓީއާއި މާލީ ވުޒާރާއިން ކަނޑައަޅާ އުސޫލެއްގެ ދަށުން ކަމަށް ބަޔާންކޮށްފައި ވީ ނަމަވެސް 30 ދުވަސް ފާއިތުވެގެން ދިޔަ އިރުގައި ވެސް އެ އުސޫލު ފާސްކޮށް ކައުންސިލްތަކާއި ހިއްސާކޮށްފައި ނުވާ ކަމަށް ބަޔާނުގައި ވަނީ ފާހަގަކޮށްފައި އެވެ.

މީގެ އިތުރުން މިސްކިތްތަށް ބެލެހެއްޓުމަކީ ވެސް ގާނޫނަކުން ކައުންސިލް ތަކަށް ލާޒިމް ކުރާ ކަމެއްކަން ފާހަގަކޮށް ފޭދޫ ކައުންސިލުން ބުނީ މިސްކިތްތަކުގެ ހުސްވާ މަގާމުތަކަށް މީހުން ނުނެގި މިސްކިތްތަށް ނުބެލެހެއްޓޭ ހިސާބަށް ދިއުމަކީ ވަރަށް ހިތާމަކުރާ ކަމެއް ކަމަށެވެ.

އަދި ކައުންސިލުން ރަށުގެ ކުނި މެނޭޖުކުރުމަށް ފަށާފައިވާ މަސައްކަތް ހުސްވާ މަގާމުތަކަށް މުވައްޒަފުން ނުނެގި ޚިދުމަތް ހުއްޓާލަން ޖެހިދާނެ ކަމުގެ ކަންބޮޑުވުން ވެސް އެބަ އޮިތް ކަމަށް ފޭދޫ ކައުންސލުން ބުނެފައި ވެއެވެ.

ކަންމިހެން އޮތުމުން ރަށުގެ ރައްޔިތުންނަށް ކައުންސިލުން ދޭ އަސާސީ ކިދުމަތްތައް ހުއްޓިދާނެ ކަމުގެ ބިރު އޮތުމުން ކައުންސިލްތަކަށް މުވައްޒަފުން ނެގުމަށް ބޭނުންވާ އުސޫލު ފާސްކޮށް ވީހާ ވެސް އަވަހަކަށް ގެޒެޓް ކޮށްދިނުމަށް ފޭދޫ ކައުންސިލުން ވަނީ ސަރުކާރަށް ގޮވާލާފަ އެވެ.