ހއ. ބާރަށު ސިނާއީ ސަރަހައްދުން ބިން ކުއްޔަށް ދޫކުރަނީ
ރަޖިސްޓަރ ނުވާ ފަރާތްތަކަށް ބީލަން ހުށަހެޅުމުގެ ފުރުސަތެއް ނޯންނާނެ
ހއ. ބާރަށް
ހއ. ބާރަށުގެ ސިނާއީ ސަރަހައްދުން ބިން ކުއްޔަށް ހިފަން ބޭނުންވާ ފަރާތްރަކަށް އެ ފުރުސަތު ހުޅުވާލައިފިއެވެ.
ބާރަށުގެ ސިނާއީ ސަރަހައްދުން ބިން ކުއްޔަށް ދޫކުރަން ހަމަޖެހިފައި ވަނީ ތެލުގެ ވިޔަފާރި ކުރުމަށާއި، މަހުގެ ބާވަތްތައް އުފެއްދުމަށާއި، ވޯރކްޝޮޕް ހިންގުމަށާއި، ގުދަން އަދި ވަޑާންގެ ހެދުމަށެވެ. ބިމަށް އެދޭ ފަރާތްތަކުގެ ހުންނަން ޖެހޭ ޝަރުތުތަކުގެތެރޭގައި، ދިވެހި ރާއްޖޭގައި ރަޖިސްޓްރީކުރެވިފައިވާ ކުންފުންޏެއް ނުވަތަ ކޯޕަރޭޓިވް ސޮސައިޓީއެއް ނުވަތަ އަމިއްލަ ފަރުދެއްގެ ވިޔަފާރިއެއްކަމުގައި ވާންޖެހެއެވެ. އަދި މީގެ ކުރިން މިފަދަ ބިމެއް ދޫކޮށް، ގަވާއިދާ ޚިލާފުވެގެން ބިން ވަކިކޮށްފައިވާ ފަރާތެއްނަމަ، ވަކިކުރިތާ މީލާދީގޮތުން އަހަރެއް ވެފައި ވުމާއި، މިކަމާގުޅިގެން ޚަލާސްކުރަން ޖެހޭ އެއްވެސް ފައިސާއެއް ވާނަމަ، އެ ފައިސާ ޚަލާސްކޮށްފައިވުން ހިމެނެއެވެ.
އެހެންކަމުން ބިން ކުއްޔަށް ހިފުމަށް ޝައުގުވެރިވާ ފަރާތްތަކުން ބީލަން ހުށައެޅުމަށް ރަޖިސްޓަރ ކުރުމަށްފަހު ބީލަންހުށައެޅުމަށް ބާރަށު ކައުންސިލުން ވަނީ ފުރުސަތު ހުޅުވާލާފައެވެ. އީމެއިލް މެދުވެރިކޮށްވެސް ރަޖިސްޓްރޭޝަން ފޯމު ހުށަހެޅޭއިރު، ރަޖިސްޓަރ ނުވާ ފަރާތްތަކަށް ބީލަން ހުށަހެޅުމުގެ ފުރުސަތެއް ނޯންނާނެއެވެ.
މި ބިންތަކަށް ކުރިމަތިލާން ޝައުގުވެރިވާ ފަރާތްތަކަށް ރަޖިސްޓަރވާން ހުޅުވާލާފައިވާ އެންމެ ފަހު ވަގުތަކީ އަންނަ ޑިސެންބަރުު މަހުގެ 5 ވާ އާދިއްތަ ދުވަހުގެ 13:00ގެ ކުރިއެވެ. އަދި ބީލަން ބަލައިގަތުމާއި ހުޅުވަން ނިންމާފައި ވަނީ ޑިސެމްބަރު 13ވާ ހޯމަ ދުވަހުގެ 13:00ގައި ބާރަށު ކައުންސިލް އިދާރާގައެވެ.
