"ފެމިލީ ކޯޓުގެ ދޮރުގައި ގިނައިން ޓަކިޖަހަނީ އަންހެނުން"
އާއިލާއާބެހޭ ގާނޫނާއި އާއިލީ ކޯޓު އަދި އެދާއިރާގެ ފަނޑިޔާރުންގެ ދައުރު ވަރަށް ފުޅާ
ފެމިލީ ކޯޓަށް އަލަށް އައްޔަނު ކުރެއްވި ދެ ފަނޑިޔާރުން ހުވާ ކުރެއްވުމުގެ ރަސްމިއްޔާތުގެ ތެރެއިން
އާއިލީ ކޯޓަށް ޚިދުމަތް ހޯދަން ދާ ފަރާތްތަކުގެ ތެރެއިން މައްސަލަ ހުށައެޅުމުގެ ބޮޑު ބައެއް ހިއްސާކުރަނީ އަންހެނުން ކަމަށް ޖުޑީޝަލް ސަރވިސް ކޮމިޝަން (ޖޭއެސްސީން) ބުނެފިއެވެ.
ފެމިލީ ކޯޓަށް އަލަށް އައްޔަން ކުރެއްވި ފަނޑިޔާރުން ހުވާ ކުރެއްވުމަށް އާދިއްތަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން ޖޭއެސްސީގެ މެމްބަރު އަލީ ސަމީރު ވިދާޅުވީ، ފެމިލީ ކޯޓުގައި ހުރި މައްސަލަތައް ދެނެގަތުމުގެ މަސައްކަތް ކޮމިޝަނުން ފާއިތުވި ދުވަސްތަކުގައި ކޮށްފައިވާ ކަމަށެވެ. އެގޮތުން އެ މަސައްކަތުގެ ތެރެއިން ފެމިލީ ކޯޓާއި، އާއިލީ އަދުލުގެ ނިޒާމާއި ގުޅޭގޮތުން ފާހަގަވި ކަންކަން ސަމީރު ވަނީ ހިއްސާ ކުރައްވާފައެވެ.
ސަމީރު ވިދާޅުވީ، އާއިލީ ކޯޓަށް ޚިދުމަތް ހޯދަން ދާ ފަރާތްތަކުގެ ތެރެއިން މައްސަލަ ހުށައެޅުމުގެ ބޮޑު ބައެއް ހިއްސާކުރަނީ އަންހެނުން ކަމަށެވެ. އަދި އެހެން އެއްވެސް ކޯޓަކަށް އެ ނިސްބަތުން ޚިދުމަތް ހޯދުމަށް އަންހެނުން ނުދާކަމަށް ސަމީރު ވިދާޅުވިއެވެ. އޭގެ ތެރޭގައި ދަރިފުޅަށް ޚަރަދު ނުދިނުމާއި، ހަޟާނާތުގެ މައްސަލަތަކާއި، ގެވެށި އަނިޔާގެ މައްސަލަތަކާއި، ފިރިމީހާގެ އެކި މައްސަލަތަކާއި ގުޅިގެން ވަރިވާން ބޭނުންވެގެން ހުށައަޅާ މައްސަލަތައްވެސް ހިމެނޭކަމަށް ވިދާޅުވިއެވެ.
އޭގެ އިތުރުން، ގިނަ ފަހަރު އެފަދަ މައްސަލަތައް ހުށައަޅާ ފަރާތްތަކަކީ މާލީ ގޮތުން ތަނަވަސްކަން ނެތް، ހަމައެކަނި ފިރިމީހާގެ މައްޗަށް ބަރޯސާވެގެން ދިރިއުޅުން ބައްޓަންވެފައިވާ ފަރާތްތައް ކަމަށެވެ.
ސަމީރު ވިދާޅުވީ، ފެމިލީ ކޯޓުގެ ތަރުތީބުތައް ހުންނަން ޖެހޭނީ ޚިދުމަތް ހޯދާ ފަރާތްތަކަށް ފަސޭހައިން ކޯޓާއި ހަމައަށް ވާސިލުވެވޭނެ ގޮތަކަށް ކަމަށެވެ. އެގޮތުން މައްސަލަ ހުށައެޅުމާއި، ކޯޓަށް ހާޒިރުވުން ފަދަ ކަންކަމުގައިވެސް ތަރުތީބުވެފައި އޮންނަންޖެހޭނީ އެގޮތަށްކަމަށް ވިދާޅުވިއެވެ.
އަންހެނުން ހުށައަޅާ މައްސަލަތައް ނިސްބަތުން ގިނަ ކޯޓެއްގައި އަންހެން ފަނޑިޔާރުން ނެތުމަކީ އާއިލީ އަދުލުގެ ނިޒާމަށް ދިމާވެފައިވާ ހީނަރުކަމެއްކަން ފާހަގަ ކުރައްވައި ސަމީރު ވިދާޅުވީ، ފެމިލީ ކޯޓަށް ދެ އަންހެން ފަނޑިޔާރުން އައްޔަން ވެގެން ދިއުމަކީ އުފާ ކުރައްވާ ކަމެއް ކަމަށެވެ. އަދި ފިރިހެނުންނެކޭ އެއްފަދައިން އެހެން ކޯޓުތަކުގައިވެސް އަންހެން ފަނޑިޔާރުން އިތުރުވާން ޖެހޭކަން ފާހަގަ ކުރެއްވިއެވެ.
އާއިލީ ކޯޓަށް ހުށައެޅޭ މައްސަލަތަކާއި ގުޅިގެން ކަމާބެހޭ އިދާރާތަކުން ދޭ ސަމާލުކަން ކުޑަކަން ފާހަގަ ކުރައްވައި ސަމީރު ވިދާޅުވީ، ބައެއް މީހުންގެ ނަޒަރުގައި އާއިލާއާބެހޭ ޤާނޫނާއި އާއިލީ ކޯޓުން ކުރާ މަސައްކަތަކީ ހަމައެކަނި ވަރި ކައިވެނީގެ ކަންކަން އެކަނި ކަމަށެވެ.
ނަމަވެސް އާއިލާއާބެހޭ ޤާނޫނާއި އާއިލީ ކޯޓު އަދި އެ ދާއިރާގެ ފަނޑިޔާރުންގެ ދައުރު އެއަށްވުރެ ފުޅާކަން ސަމީރު ފާހަގަ ކުރެއްވިއެވެ. އެގޮތުން ގެވެށި އަނިޔާގެ މައްސަލަތަކާއި، ކުޑަކުދިންގެ ރައްކާތެރިކަމާ ގުޅޭ މައްސަލަތަކާއި، ދެމަފިރިންގެ މުދަލާއިބެހޭ މައްސަލަތަކާއި، ދޭސީ އަދި ބިދޭސީ ކައިވެނިތަކާއި ގުޅޭ މައްސަލަތަކާއި، އެފަދަ ކައިވެނީގެ މައްޗަށް ލިބޭ ދަރިންނާއި ގުޅޭ އެކި މައްސަލަތަކާއި، ދައުލަތުގެ ބެލުމުގެ ދަށުގައި ތިބޭ ކުދިންނާއި ގުޅޭ މައްސަލަތައް ފަދަ ކަންކަން މިސާލެއްގެ ގޮތުން އޭނާ ފާހަގަ ކުރެއްވިއެވެ.
އާދިއްތަ ދުވަހު ޖުޑީޝަލް ސަރވިސް ކޮމިޝަނުން ބޭއްވި ރަސްމިއްޔާތެއްގައި ފަނޑިޔާރު ކަމުގެ ހުވާ ކުރައްވާފައިވަނީ އއ. ފެރިދޫ، ނަޝީދީހިޔާ، އަލްއުސްތާޒާ ޒައީމާ ނަޝީދު އަބޫބަކުރާއި މ. ވިލުފުށީގެ، އަލްއުސްތާޒާ މައީޝާ ޔޫސުފް ސަމީރެވެ. އެ ދެބޭފުޅުންނަކީ ފަނޑިޔާރުން އައްޔަންކުރާ ކޮމިޓީން އިންޓަރވިއުކޮށް އެންމެ ގާބިލުކަމަށް ފެންނަކަމަށް ނިންމަވައި ކޮމިޝަނަށް ލަފާ ދެއްވި ދެ ބޭފުޅުންނެވެ.
