ހއ.ހޯރަފުށީ އެއަރޕޯޓް ޖެޓީގެ މަސައްކަތް ނުފެށިވަނީ އަލުން އީއައިއޭ ހަދަން ޖެހޭތީ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލްއޭވިއޭޝަން އާއިޝަތު ނަހުލާ ވިދަޅުވެއްޖެއެވެ.
ހއ.އަތޮޅުގެ ގިނަ ރައްޔިތުން ބޭނުންކުރަމުންދާ ހޯރަފުށީ އެއަރޕޯޓަށް އަހަރެއްވީ އިރުވެސް އެއަރޕޯޓަށް އަރާފޭބުމަށް ބޭނުންވާ ފާލަމުގެ މަސައްކަތް ކުރިއަށްނުދާތީ އެކަމުގެ ދަތިކަން ރައްޔިތުން ތަހައްމަލުކުރަންޖެހޭތީ، މިހާރު ފާލަމުގެ މަސައްކަތް ގޮސްފައިވާ ހިސާބާ ބެހޭ ގޮތުން އިހަވަންދޫ ދާއިރާގެ މެންބަރު މުޙައްމަދު ޝިފާޢު ކުރެއްވި ސުވާލަށް ރައްޔިތުންގެ މަޖިލީހުގެ އާދީއްތަ ދުވަހުގެ ޖަލްސާއަށް ވަޑައިގެން ނަހުލާ ޖަވާބު ދެއްވިއެވެ.
މިނިސްޓަރ ވަނީ މި މަސައްކަތް މިހާތަނަށް ކުރިއަށްގެންދެވިފައިވާ ގޮތުގެ ޓައިމްލައިންވެސް ހިއްސާ ކުރައްވާފައެވެ. މިނިސްޓަރ ވިދާޅުވީ، ޖެޓީ ހެދުމަށް ނިންމާފައިވާ ސަރަހައްދަކީ، ހޯރަފުށި ކައުންސިލުން ޗެނަލެއް ކެނޑުމަށް އީއައިއޭ ހަދާފައިވާ ތަނެއް ކަމަށެވެ. އެހެންކަމުން އެ އީއައިއޭއަށް ބިނާކޮށް ޖެޓީގެ މަސައްކަތް ކުރިއަށް ނުގެންދެވޭނެކަމަށް އީޕީއޭއިން ލަފާ ދިނުމުން އަލުން އީއައިއޭގެ މަސައްކަތް މިހާރު ފަށާފައިވާ ކަމަށެވެ. އެހެންކަމުން މިހާރު އެ މަސައްކަތް ފެށިގެން ކުރިއަށްދާ ކަމަށެވެ. ޖެޓީގެ މަސައްކަތް ކުރުމަށް ހަވާލު ކޮށްފައިވަނީ، އެމްޓީސީސީއާއެވެ.
މިކަމާ ގުޅިގެން ހޯރަފުށީ ދާއިރާގެ މެމްބަރު އަހުމަދު ސަލީމް ކުރެއްވި ސުވާލުގައި ލާމަރުކާޒީ ގާނޫނުގެ ދަށުން ރަށެއްގައި މަސައްކަތެއް ކުރުމުގެ ކުރިން ކައުންސިލްގެ ހުއްދަ ހޯދަން ޖެހޭ ކަމަށް ވިދާޅުވިއެވެ. އަދި މި މަސައްކަތުގައި ކައުންސިލްގެ ހުއްދަ ހޯއްދެވިތޯ ސަލީމް ސުވާލު ކުރެއްވިއެވެ.
މި ސުވާލަށް މިނިސްޓަރ ސީދާ ޖަވާބެއް ނުދެއްވައެވެ. މިނިސްޓަރ ވިދާޅުވީ، ރައީސުލްޖުމްހޫރިއްޔާ ވަކި މަސްއޫލިއްޔަތުތަކެއް ހަވާލު ކުރައްވާފައިވުމުން އެ މަސައްކަތް ކުރެއްވުމަކީ ވަޒީރެއްގެ ހައިސިއްޔަތުން އެކަމަނާގެ ޒިންމާއެއް ކަމަށެވެ. މިހާރު ކުރައްވަނީ އެ މަސައްކަތް ކަމަށެވެ.
ހޯރަފުށީ އެއަރޕޯޓުން ޖާގަ ލިބުމުގައި ދަތިކަން ހުރިކަން ފާހަގަ ކުރައްވަމުން މިނިސްޓަރ ވިދާޅުވީ، ޑިމާންޑަށް ބަލައި ފްލައިޓް އިތުރު ކުރުމަށް މޯލްޑިވިއަނާއެކު މަޝްވަރާ ކުރައްވާ ކަމުގައެވެ.
