ޖެނުއަރީ މަހުގެ ފުރަތަމަ ހަފުތާ ތެރޭގައި އައްޑޫ އެލްޑަރލީ ވިލެޖްގެ ބިންގާ އެޅޭނެ – ޖެންޑަރ މިނިސްޓްރީ
29 ނޮވެމްބަރު 2021 | ހޯމަ 02:45އެލްޑަރލީ ވިލެޖްގައި 3 ކޮންސެޕްޓެއް ހިމެނޭނެ
އައްޑޫ ސިޓީ
އަންނަ އަހަރުގެ ޖެނުއަރީ މަހުގެ ފުރަތަމަ ހަފުތާ ތެރޭގައި އައްޑޫ ސިޓީގައި އެޅުމަށް ހަމަޖެހިފައިވާ އެލްޑަރލީ ވިލެޖްގެ ބިންގާ އަޅާނެ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރ ފަޒްނާ ޝާކިރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ފަޒްނާ ވިދާޅުވީ އައްޑޫ ސިޓީގައި އަޅާ އެލްޑަރލީ ވިލެޖަކީ ބޭރު ގައުމުތަކުގައި ހުންނަ ރެސިޑެންޝަލް ހޯމްސް ފަދަ ތަނެއް ކަމަށެވެ. އަދި ސަރުކާރުގެ ޕީއެސްއައިޕީ ޕްރޮޖެކްޓެއްގެ ގޮތުގައި ރެސިޑެންޝަލް ހޯމެއް ހެދުން ހިމެނޭ ކަމަށާއި، އޭޑީބީގެ އެހީއާއި ސަރުކާރުގެ އެހީއާއެކުގައި އައްޑޫގައި އެ މަސައްކަތް ކުރަމުންދާ ކަމަށެވެ. އަދި މިކަމަށް ބޭނުންވާ ބިން ލިބި ކޮންސެޕްޓް މަސައްކަތް މިހާރު ކުރެވެމުންދާ ކަމަށް ފަޒްނާ ވިދާޅުވިއެވެ.
ފަޒްނާ ވިދާޅުވީ އައްޑޫގައި ހަދާ އެލްޑަރލީ ވިލެޖްގައި ތިބޭ މީހުންނަށް ބޭރަށް ނުކުމެ އެހެން މީހުންނާއި ބައްދަލުކޮށް ހެދޭނެ ކަމަށެވެ. އަދި ޑޭކެއަރ ކޮންސެޕްޓެއް ވެސް މީގެ ތެރޭގައި ހިމެނޭނެ ކަމަށެވެ.
ފަޒްނާ ވިދާޅުވީ ގުރައިދޫގައި ތިބީ އިހުމާލުގެ ސަބަބުން ގިނައިން ގެނެވިފައި ތިބި މީހުން ކަމަށާއި، މުޖްތަމައުގެ ތެރެއިންނާއި އާއިލާގެ ތެރެއިން ބަލާނެ އެއްވެސް މީހަކު ނެތިގެން ނަގާފައި ހުރި ކޭސްތައް ވެސް ހިމެނޭ ކަމަށެވެ.
