އައު ވޭރިއަންޓް ނުހުއްޓުވުނަސް އަދަދު މަދު ކުރެވިދާނެ: ޑރ. ނަޒްލާ
28 ނޮވެމްބަރު 2021 | އާދީއްތަ 10:44ވޭރިއެންޓް ފެތުރުން ހުއްޓުވުމަށް މިހާރުވެސް އަންނަނީ މަސައްކަތް ކުރަމުން
ޑރ ނަޒްލާ ރަފީގު
ކޮވިޑް-19ގެ އައު ވޭރިއެންޓް "އޮމިކްރޮން" ރާއްޖެއަށް އައުން ނުހުއްޓުވުނު ނަމަވެސް އެ ވޭރިއެންޓް ޖެހޭ މީހުންގެ އަދަދު މަދުކުރެވިދާނެކަމަށް ހެލްތު އިމަޖެންސީ އޮޕަރޭޝަންސް ސެންޓަރ (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
އޮމިކްރޯން ވޭރިއެންޓާއި ގުޅޭ ގޮތުން ހެލްތު މިނިސްޓްރީގައި އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ޑރ ނަޒްލާ ވިދާޅުވީ މި ވޭރިއެންޓް ރާއްޖެއަށް އައުން ހުއްޓުވުމަކީ ނާދިރުކަމަކަށް ވެދާނެ ކަމަށެވެ. ނަމަވެސް ކުރިއާލައި އެކަށީގެންވާ ފިޔަވަޅުތައް އެޅިއްޖެނަމަ މި ވޭރިއެންޓް ޖެހޭ މީހުންގެ އަދަދު މަދުކުރެވިދާނެ ކަމަށެވެ.
ޑރ ނަޒްލާ ވިދާޅުވީ އެހެން ވޭރިއެންޓްތަކާއި ޚިލާފަށް މި ވޭރިއެންޓް ވަރަށް އަވަހަށް ފެތުރިގެންދާ ކަމަށް ބެލެވޭ ކަމަށެވެ. ނަމަވެސް މިކަން ޔަގީންކަމާއެކު ބުނެވޭނީ ކެރޭނީ މިހާރު ކުރިއަށްދާ ދިރާސާތައް ނިމުމުން ކަމަށެވެ. އޮމިކްރޮން ވޭރިއަންޓަކީ ދުނިޔޭގެ ގައުމުތަކަށް އޮތް ކަންބޮޑުވުމެއްގެ ގޮތުގައި ޑަބްލިއުއެޗްއޯ އިން ކަނޑައަޅާފައިވާ އިރު، މިއީ ކުރިން ބަލި ޖެހިފައި ތިބި މީހުންގެ ގަޔަށް ވެސް އަރާ ބައްޔެކެވެ. އެހެންކަމުން މި ވޭރިއެންޓުން ރައްކާތެރިވުމަށް އަޅަންޖެހޭ ފިޔަވަޅުތައް މިހާރު އަޅަމުން އަންނަކަން ފާހަގަކުރައްވައި ޑރ ނަޒްލާ ވިދާޅުވީ ބަލި ފެނިފައިވާ ހަތް ގައުމަކުން ރާއްޖެއަށް މީހުން އައުން މިހާރު މަނާކޮށްފައިވާ ކަމަށެވެ.
ހަމައެހެންމެ މި ވޭރިއެންޓް ހުރިތޯ ޓެސްޓް ކުރުމަށް ޖީން ސިކުއެންސް ފޮނުވާނެކަމަށް ވިދާޅުވިއެވެ. މިހާރުވެސް ރާއްޖޭގެ ސީކުއެންސް ސާމްޕަލްތައް ކޮންމެ ހަފްތާއަކު އެއްފަހަރު އަންނަނީ ޓެސްޓު ކުރުމަށް ފޮނުވަމުންނެވެ. މި ވޭރިއެންޓް ފެނުމާއެކު މި ވޭރިއެންޓް ހުރިތޯ ބެލުމަށް ޚާއްސަ ސަމާލުކަމެއް ދޭނެ ކަމަށް ޑރ ނަޒްލާ ވިދާޅުވިއެވެ.
ކޮންމެ ފަހަރަކު ސީކުއެންސްތައް ބޭރަށް ފޮނުވައިގެން ނަތީޖާ ލިބުމަށް ދެތިން ހަފުތާގެ މުއްދަތެއް ނަގާކަން ފާހަގަކުރައްވައި ޑރ ނަޒްލާ ވިދާޅުވީ ރާއްޖޭގައި މި ޓެސްޓުތައް ހެދުމުގެ މަސައްކަތް މިހާރު ކުރަމުން އަންނަ ކަމަށެވެ. އެގޮތުން މި ޓެސްޓުތައް ކުރުމަށް ބޭނުންވާ މެޝިންތައް މިހާރު ރާއްޖެ ގެނެވިފައިވާކަން ފާހަގަކުރެއްވިއެވެ. ނަމަވެސް މަސައްކަތްތައް ފެށޭނީ މިކަމަށް ބޭނުންވާ ތަމްރީނުތައް މީހުންނަށް ދިނުމުގެ އިތުރުން ފުރިހަމަ ކުރަންޖެހޭ ބައެއް މަސައްކަތްތައް ނިންމާފައި ކަމަށް ވިދާޅުވިއެވެ.
