50 އަހަރުން މަތީގެ މީހުންނަށް ވެސް އުމުރާވުމުގެ ހުއްދަ ސައުދީން ދީފި

ބޭރުގައުމުތަކުން އުމުރާއަށް ސައުދީއަށް އާދެވޭ މީހުންނަކީ ވަކި އުމުރެއްގެ ބައެއްކަމަށް ކަނޑައަޅާފައިވާ ކަނޑައެޅުން ނިމުމަކަށް ގެނެސް 18 އަހަރުން މަތީގެ ކޮންމެ މީހަކަށް ވެސް އުމުރާއަށް އާދެވޭގޮތަށް ސައުދީން ނިންމައިފިއެވެ.

ސައުދީ ގެޒެޓުގައި ބުނެފައިވަނީ ސައުދީގެ މިނިސްޓްރީ އޮފް ހައްޖު އެންޑް އުމުރާއިން މި ނިންމުން ނިންމާ، 50 އަހަރުން މަތީގެ މީހުންނަށް ވެސް އުމުރާވުމުގެ ފުރުސަތު ދިނުމަށް ނިންމާފައިވާކަމަށް އިތުބާރު ހުރި ފަރާތަކުން މައުލޫމާތު ދީފައިވާ ކަމަށެވެ.

މީގެ ކުރިން އުމުރާ ކަންތައްތަކާއި ބެހޭ މިނިސްޓްރީން ނިންމާފައިވަނީ އުމުރާވެވޭ އެންމެ ހަގު އުމުރެއްގެ ގޮތުގައި 18 އަހަރު އަދި އެންމެ ދޮށީ އުމުރެއްގެ މީހުންގެ ގޮތުގައި 50 އަހަރު ކަމުގައި ކަނޑައަޅާފައެވެ. މި ނިންމުމުގެ ދަށުން މީގެ ކުރިން އުމުރާ ކުރުމުގެ އިތުރުން ހަރަމްފުޅާއި، ރަސޫލާގެ މިސްކިތުގެ ރައުޟާ ސަރީފްގައި ނަމާދު ކުރުމާއި، ރަސޫލާގެ މަހާނަފުޅަށް ޒިޔާރަތް ކުރެވޭނީ ވެސް 18 އަހަރާއި 50 އަހަރުގެ މީހުންނަށެވެ. މި ނިންމުން ނިންމީ ކޮވިޑްގެ ހާލަތާއި ގުޅިގެން އެޅި ރައްކާތެރިކަމުގެ ފިޔަވަޅެއްގެ ގޮތުގައެވެ.

އަލަށް އެކުލަވާލި ގަވާއިދުގެ ދަށުން ރައްކާތެރިކަމުގެ ފިޔަވަޅުތަކާއި، ރައްކާތެރިކަމުގެ ގޮތުން އަޅާފައިވާ ޕްރޮޓޮކޯލާއި އެއްގޮތަށް އުމުރުން ދުވަސްވީ މީހުންނަށް އުމުރާކުރުމުގެ ފުރުސަތު ލިބިގެންދާނެއެވެ. ނަމަވެސް 18 އަހަރުން ދަށުގެ ކުދިންނަށް އުމުރާވުމުގެ ހުއްދައެއް ނުދެއެވެ. ސައުދީން ބޭރުން އަންނަ މީހުން މިގޮތަށް އަމަލުކުރަން ޖެހުނު ނަމަވެސް، ސައުދީގައި އުޅޭ ފަރާތްތަކުގެ ތެރެއިން 12 އަހަރުން މަތީގެ ހުރިހާ އެންމެނަށް އުމްރާވުމުގެ ފުރުސަތު ލިބިގެންދާނެއެވެ.

މިގޮތަށް ނިންމާފައިވީ ނަމަވެސް، އުމުރާކޮށް ދެ ހަރަމަށް ޒިޔާރަތްކުރެވޭނީ ދެ ޑޯޒްގެ ކޮވިޑް ވެކްސިން ޖަހާފައިވާކަމުގެ ލިޔުން ދެއްކުމުންނެވެ.