ސައުދީ ސަރުކާރުގެ ނުފޫޒެއް ނިއުކާސަލަށް ނުކުރާނެ

ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން އިނގިރޭސި ކުލަބު ނިއުކާސަލް ޔުނައިޓެޑް ގަތް ނަމަވެސް، އެ ޓީމުގެ ކަންކަމުގައި ސައުދީ ސަރުކާރުން ނުފޫޒުނުފޯރުވާނެ ކަމުގެ ޔަގީންކަން އެބައޮތް ކަމަށް އިނގިރޭސި ޕްރިމިއާ ލީގުން ބުނެފިއެވެ.

ސައުދީ ސަރުކާރުން އިސްވެ، ނިއުކާސަލް ގަތީ އުސޫލުތަކާ ޚިލާފަށް ކަމަށް ބުނެ މީގެ ކުރިން ޕްރިމިއާ ލީގު ބޯޑަށް ފާޑުކިޔުންތަކެއްވެސް ވަނީ އަމާޒުވެފައެވެ. އެ ޑީލާ ހެދި ކުލަބުތަކާއި ސިޔާސީ ފަރާތްތަކުގެ ފަރާތުން ކުރިމަތިވި ޕްރެޝަރުތަކާއެކު ޕްރިމިއާ ލީގުގެ ޗެއާމަން ގެރީ ހޮފްމަން އިސްތިއުފާ ދެއްވަން ނިންމެވި ކަމަށް ރިޕޯޓުތައް ބުނެއެވެ.

ދާދި ފަހުން ދެއްވި އިންޓަވިއުއެއްގައި ޕްރިމިއާ ލީގުގެ ޗީފް އެގްޒެކެޓިވް ރިޗާޑް މާސްޓާސް ވިދާޅުވީ އިނގިރޭސި ކުލަބުތަކުން ކަންބޮޑުވާ ފަދަ ކަންތައްތަކެއް ނިއުކާސަލް މެދުވެރިކޮށް ކުރިއަށް ނުގެންދެވޭނެ ކަމަށެވެ. އަދި ނިއުކާސަލް ގަންނަން ސައުދީގެ ޕީއައިއެފް އާއި ވިޔަފާރިވެރިޔާ އަމަންޑާ ސްޓަވީލިސް ކުންފުނިން ކަންތައްތައް ގެންދިޔިޔައީ އޮންނަ އުސޫލުތަކުގެ ތެރެއިން ކަމަށް މާސްޓާސް ވިދާޅުވިއެވެ.

ނިއުކާސަލް ގަންނަން ޕީއައިއެފް އާއި އަމަަންޑާ ސްޓަވީލީސްގެ ޕާޓްނަޝިޕުން ޖުމްލަ 408 މިލިއަން ޑޮލަރު ހޭދަކުރިއެވެ. ނިއުކާސަލުގެ މެޖޯރިޓީ ހިއްސާ މިހާރު އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓްބޯޅަ ކުލަބެއް ހިންގާ ބައެއްގެ އެންމެ ބޮޑު މިލްކިއްޔާތެވެ. ދެން އެ ޓީމާ އެންމެ ކައިރި ކުރަނީ މެންޗެސްޓާ ސިޓީ ހިންގަމުން އަންނަ ސިޓީ ފުޓްބޯލް ގްރޫޕުގެ ވެރިޔާ ޔޫއޭއީގެ ޝެއިހް މަންސޫރެވެ. އޭނާގެ މިލްކިއްޔާތުގައި ހުރީ 32 ބިލިއަން ޑޮލަރެވެ.

ޕީއައިއެފްއިން ނިއުކާސަލް ގަތުމަށް މިދިޔަ އަހަރުވެސް މަސައްކަތް ކުރިއެވެ. އެކަމަކު އެ ޑީލާއި ދެކޮޅަށް އިންސާނީ ހައްގުތަކަށް މަސައްކަތްކުރާ ޖަމިއްޔާ އެމްނެސްޓީ އިންޓަނޭޝަނަލުން ވަނީ އިންޒާރުވެސް ދީފައެވެ.