ހިޔާ ފްލެޓަށް ބަދަލުވާ ކުދިންނަށް މިނީ ބަހުގައި މާލޭގެ ސްކޫލްތަކަށް އާދެވޭނެ ގޮތް ހަމަޖައްސާނަން: މިނިސްޓަރ
26 ނޮވެމްބަރު 2021 | ހުކުރު 21:21އަންނަ ޓާމުން ފެށިގެން ހުރަވީ ސްކޫލް ދެ ދަންފަޅިއަށް ބަދަލުކުރަން ހަމަޖެހިފައިވޭ
ހިޔާ މަޝްރޫއުގެ ދަށުން އަޅާފައިވާ ފްލެޓްތައް
ހުޅުމާލެ ދެ ވަނަ ފޭސްގައި އިމާރާތްކޮށްފައިވާ ހިޔާ ފްލެޓްތަކަށް ބަދަލުވާ ދަރިވަރުންގެ ތެރެއިން ހުޅުމާލޭގައި ހުރި ސްކޫލްތަކުން އެވަގުތަށް ޖާގަ ނުލިބޭ ދަރިވަރުންނަށް މިނީ ބަހުގެ ޒަރީއާއިން އެކުދިން މިހާރު މާލޭގައި އުޅޭ ސްކޫލްތަކަށް އައުމުގެ އިންތިޒާމު ހަމަޖައްސާނެކަމަށް އެޑިޔުކޭޝަން މިނިސްޓަރ ޑރ އައިޝަތު އަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖަލްސާގައި ހުޅުމާލެ ދާއިރާގެ މެމްބަރ އަލީ ނިޔާޒު ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ މިހާރު ހުޅުމާލޭގައި ހުރި ސްކޫލްތަކުގައި ޖާގަ ހުރިވަރަށް ކުދިން އެސްކޫލްތަކަށް ވައްދާނެކަމަށެވެ. މީގެއިތުރުން އަންނަ ޓާމުން ފެށިގެން ހުރަވީ ސްކޫލް ދެ ދަންފަޅިއަށް ބަދަލުކުރަން ހަމަޖެހިފައިވާކަމަށް މިނިސްޓަރ ވިދާޅުވިއެވެ.
އޭރުން ގާތްގަނޑަކަށް ފަނަރަސަތޭކަ ކުދިންގެ ޖާގަ ހުޅުމާލެއިން ހަމަޖެއްސޭނެކަމަށް މިނިސްޓަރ ވިދާޅުވިއެވެ. އަދި މިހާރު ހުޅުމާލޭގައި އަޅަމުންދާ ސްކޫލްތައް ނިމެންދެން ހިޔާ ފްލެޓްތަކަށް ބަދަލުވާ ކުދިންނަށް މާލޭގެ ސްކޫލްތަކުން ކިޔެވޭނެކަމަށް މިނިސްޓަރ ވިދާޅުވިއެވެ.
ހުޅުމާލޭގައި މިހާރު އެހެން ސްކޫލްތައް އެޅުމުގެ މަސައްކަތްތައް ކުރިޔަށްދާ ކަމަށް މިނިސްޓަރ ވިދާޅުވިއެވެ. އެގޮތުން މިހާރު ސަލާހުއްދީން ސްކޫލްގެ މަސައްކަތް އަމީން ކޮންސްޓްރަކްޝަނާއި ހަވާލުކޮށްގެން ކުރިޔަށްދާކަމަށް މިނިސްޓަރ ވިދާޅުވިއެވެ.
މީގެއިތުރުން އާރުސީސީއާ ހަވާލުކޮށްގެން ކޮންޓްރެކްޓް ފައިނޭންސިން އުސޫލުން ސްކޫލެއް ބިނާކުރުމުގެ މަސައްކަތްވެސް ކުރިޔަށްދާކަމަށް މިނިސްޓަރ ވިދާޅުވިއެވެ. އަދި 2 ސްކޫލެއް އެޅުމަށް މިހާރު ވާނީ ކޮންޓްރެކްޓަރ ފައިނޭންސިން އަށް އިއުލާންކޮށްފައިކަމަށް ވިދާޅުވިއެވެ.
ހުޅުމާލެ ދެ ވަނަ ފިޔަވަހީގައި އަޅާފައިވާ ހިޔާ ފްލެޓްތަކަކީ ގާތްގަނޑަކަށް 30،000 މީހުންގެ އާބާދީއަކަށް ހަދާފައިވާ ފްލެޓްތަކެކެވެ.
