5 އަހަރާ 11 އަހަރާ ދެމެދުގެ ކުދިންނަށް ފައިޒަރ ވެކްސިން ޖެހުމުގެ ހުއްދަ އީޔޫއިން ދީފި
25 ނޮވެމްބަރު 2021 | ބުރާސްފަތި 16:59އީޔޫގައި، މެއި މަހުން ފެށިގެން، އުމުރުން 12 އަހަރާ 17 އަހަރާ ދެމެދުގެ ކުދިންނަށް އަންނަނީ ވެކްސިން ދެމުން
ސްޕެއިންގައި ސިއްހީ މަސައްކަތެރިއެއްގެ ގަޔަށް ކޮވިޑް-19 ވެކްސިން ޖަހަނީ
އުމުރުން 5 އަހަރާ 11 އަހަރާ ދެމެދުގެ ކުޑަކުދިންނަށް ފައިޒަރއާއި ބައޯއެންޓެކުން އުފައްދާފައިވާ ފައިޒަރ ވެކްސިން ޖެހުމުގެ ހުއްދަ ޔޫރަޕިއަން ޔޫނިއަން (އީޔޫ)ގެ ޑްރަގް ރެގިޔުލޭޓަރއިން ދީފިއެވެ.
ޔޫރަޕްގައި ކޮވިޑްގެ ހާލަތު ގޯސްވެފައިވާއިރު، މިއީ އެސަރަހައްދުގައި މިއުމުރުފުރާގެ ކުދިންނަށް ވެކްސިން ޖަހާ ފުރަތަމަ ފަހަރެވެ. ޔޫރަޕިއަން މެޑިސިން އެޖެންސީ (އީއެމްއޭ)ން ވަނީ، އުމުރުން 12 އަހަރާ 17 އަހަރާ ދެމެދުގެ ކުދިންނަށް ފައިޒަރ ވެކްސިން ޖެހުމަށް މީގެ ކުރިން ހުއްދަދީފައެވެ. މެއި މަހު އީޔޫއިން މިއުމުރުފުރާގެ ކުދިންނަށް ވެކްސިން ދޭންފަށާފައިވާއިރު، އެއުމުރުފުރާގެ ކުދިންނަށް ދެމުން އަންނަނީ ވެކްސިން ޑޯޒްގެ 10 މައިކްރޯ ގްރާމް ދެ ޑޯޒްގެ ދެމެދުގައި 3 ހަފްތާގެ މުއްދަތެއް ދީގެންނެވެ. ބޮޑެތި މީހުންނަށް ދެމުން އަންނަނީ 30 މައިކްރޯގްރާމެވެ.
ކުޑަކުދިންނަކީ ކޮވިޑް ޖެހިފައިވާ މީހުންގެ ތެރެއިން ގިނަ އަދަދެއް ހިއްސާކުރަމުން އަންނަ ބައެކެވެ. އެގޮތުން މިހާރުވެސް ޖަރމަނީއާއި ނެދަރލެންޑްސްގައި ކޮވިޑް ޖެހިފައިވާ މީހުންގެ ތެރެއިން އެންމެ ގިނަ އަދަދަކަށް ކޮވިޑް ޖެހިފައިވަނީ ކުޑަކުދިންނަށެވެ. އެހެންކަމުން އުމުރުން 17 އަހަރުން ދަށުގެ ކުދިންނަށް ވެކްސިން ޖެހުމަކީ މުހިންމު ކަމަކަށް ވަނީ ވެފައެވެ.
ފައިޒަރ އެންޑް ބައޯއެންޓެކުން ބުނެފައިވަނީ، އުމުރުން 5 އަހަރާ 11 އަހަރާ ދެމެދުގެ ކުދިންނަށް ކުރިޔަށްގެންދެވުނު ކްލިނިކަލް ޓްރެއަލްތަކުގައި، ވެކްސިނުން އަސަރުކުރާ މިންވަރު ހުރީ 90.7 އިންސައްތައިގައެވެ.
އުމުރުން 5 އަހަރާ 11 އަހަރާ ދެމެދުގެ ކުދިންނަށް ވެކްސިން ދިނުމުގެ ހުއްދަ އީޔޫގެ ޑްރަގް ރެގިޔުލޭޓަރއިން ދީފައިވީނަމަވެސް، އެކަމުގެ ފަހުބަސް ބުނާނީ ޔޫރަޕިއަން ކޮމިޝަނުންނެވެ. ރޮއިޓަރސްއިން ބުނެފައިވަނީ ހުކުރު ދުވަހު ޔޫރަޕިއަން ކޮމިޝަނުން މިކަމަށް ހުއްދަދޭނެކަމަށެވެ.
ހުއްދަ ދިން ނަމަވެސް ގައުމުތަކަށް ވެކްސިން ފޯރުކޮށްދެވޭވަރުވާނީ އަންނަ ޑިސެމްބަރ މަހުއެވެ. ބައޯއެންޓެކުގެ ސްޕޯކްސްމަން ބުނެފައިވަނީ، ކުޑަކުދިންނަށް ޖަހާ ވެކްސިންގެ ޑޯޒްތައް ގައުމުތަކަށް ފޯރުކޮށްދެވޭވަރުވާނީ ޑިސެމްބަރ މަހުގެ 20 ވަނަ ދުވަހު ކަމަށެވެ.
އީޔޫން އުމުރުން 5 އަހަރާއި 11 އަހަރާ ދެމެދުގެ ކުދިންނަށް ވެކްސިން ޖެހުމުގެ ހުއްދަދިން އިރު، މިހާރު މިއުމުރުފުރާގެ ކުދިންނަށް ވެކްސިން ޖަހަމުން އަންނަނީ އެމެރިކާ، ކެނެޑާ، އިސްރާއީލް، ޗައިނާ އަދި ސައުދީ އަރަބިއްޔާގައެވެ.
