ރޮހިންޖާ ކުދިންނަށް ޔުނިސެފުން 1300 ސްކޫލް ތައްޔާރުކުރަނީ

ހާލުގައި ޖެހި، އަމިއްލަ ވަޒަނުން ފިލުމަށް މަޖުބޫރުވެ، ރެފިއުޖީންނަށް ވެފައިވާ ރޮހިންޖާ ދަރިކޮޅުގެ ކުދިންނަށް ތަޢުލީމު ފޯރުކޮށްދިނުމަށް 1300 އަށް ވުރެ ގިނަ ސްކޫލް ޤާއިމް ކުރުމަށް ޔުނިސެފުން ނިންމައިފިއެވެ.

ޔުނިސެފުން މިހާރު ވެސް ދަނީ ބަނގާޅުގެ ކޮކްސަސް ބާޒާރުގައިވާ ރެފިއުޖީ ކޭމްޕްތަކުގައި 182 ތަޢުލީމީ ސެންޓަރު ހިންގަމުންނެވެ. މި ސެންޓަރުތަކުގައި މިހާރު 15،000 ކުދިން ތަޢުލީމު ހާސިލް ކުރާއިރު، ތަޢުލީމު ބޭނުންވާ ގިނަ އަދަދެއްގެ ކުދިން އަދިވެސް ތިބި ކަމަށް ކަމާއި ބެހޭ ޖަމުޢިއްޔާތަކުން ބުނެއެވެ.

ބަންގާޅުގައި ހުންނަވާ ޔުނިސެފްގެ ރެޕްރެޒެންޓޭޓިވް އެޑުއާޑް ބެއިބެޑަރ ވިދާޅުވީ، ހިތްދަތި ހާލަތްތަކެއް ދިމާވެފައިވާ ރޮހިންޖާ ދަރިކޮޅުގެ ކުދިންނަށް ރަނގަޅު ތަޢުލީމެއް ފޯރުކޮށްދިނުމަކީ މުހިއްމު ކަމެއް ކަމަށާ، އެކަމަށް ޔުނިސެފުން މަސައްކަތް ކުރަމުންދާ ކަމަށެވެ.

މިހާރު ޤާއިމްކޮށްފައިވާ ތަޢުލީމީ ސެންޓަރުތަކުގައި އުމުރުން ހަތަރު އަހަރާއި ހަ އަހަރާއި ދެމެދުގެ ކުދިންނަށް ފަށާ ތަޢުލީމު ފޯރުކޮށްދެމުންދާއިރު، ހަ އަހަރާއި ސާދަ އަހަރާއި ދެމެދުގެ ކުދިންނަށް ދަނީ އަސާސީ ތަޢުލީމު ފޯރުކޮށްދެމުންނެވެ.

އެގޮތުން މި ދަރިވަރުންނަށް ޔުނިސެފުން ދަނީ ބެންގާލީ ބަހާއި، އިނގެރޭސި ބަހާއި، ބަރުމާ ބަހުގެ އިތުރުން ހިސާބާއި އާޓްސް އަދި ސައިންސް ކިޔަވައިދެމުންނެވެ.

މީގެ އިތުރުން ރޮހިންޖާ ދަރިކޮޅުގެ ކުދިންނަށް ދިމާވެފައިވާ ނަފްސާނީ ބިރުވެރިކަމުން އެކުދިން ސަލާމަތް ކޮށްދިނުމަށް ކައުންސިލިންގ ދީ، ސާފްތާހިރުކަމާއި، ދިރިއުޅުމަށް ބޭނުންވާ މައިގަނޑު ހުނަރުތައް މި ސެންޓަރުތަކުގައި އެކުދިންނަށް ދަނީ ކިޔަވައިދެމުންނެވެ.

ޔުނިސެފުން ބުނީ އެކުދިންގެ ކިޔެވުމުގެ ހުރިހާ ޚަރަދެއް އެ ޖަމުޢިއްޔާއިން ބަލަހައްޓަމުންދާ ކަމަށެވެ.