ސަރުކާރާ އިދިކޮޅު ފަރާތްތަކުން ދޭތެރެއަކުން ނިއުސް ކޮންފަރެންސާއި ހިނގާލުންތައް ބާއްވަައި "އިންޑިއާ އައުޓް" ހަރު އަޑުން ގޮވައެވެ. އަބަދުވެސް ރާއްޖެއާ ގާތް ގުޅުމެއް ބާއްވާ ގައުމަކާ ދެކޮޅަށް ބަޔަކު ނުކުންނަންވީ ސަބަބެއް ނުވިސްނެއެވެ. އިންޑިއާއަކީ އަބަދުވެސް ދިވެހިންނަށް ކަމެއް ދިމާވާ ވަގުތު އެންމެ އަވަހަށް އެހީތެރިވާ ގައުމެވެ.
ޒަމާނުއްސުރެ އޮތް މި ގުޅުމަށް ކިޔިޔާވެސް ހީނަރުކަމެއް އައީ, މިއަދު އިންޑިއާ އައުޓް ގޮވުމުގައި އުޅުއްވާ ބޭފުޅުން ސަރުކާރުގެ އިސް މަގާމުތަކުގައި ތިއްބެވި އިރެވެ. އޭރު ވަކި ގައުމަކަށް ބަރޯސާވެގެން ހުރިހާ ކަމެއްގައި އެގައުމެއްގެ ބަސް އިސްކުރަން ފެށުމުންނެވެ. ރާއްޖޭގައި ހިންގި ހުރިހާ މަޝްރޫއަކާއި ނެގި ހުރިހާ ލޯނެއްވެސް ނެގީ ހަމަ އެ ގައުމުންނެވެ.
އޭރު ހީނަރުވި ގުޅުން މި ސަރުކާރުން ބަދަހި ކުރިއެވެ. އެހެންނަމަވެސް މި ބައިމީހުން މި ގޮވާ ގޮވެލިފަތީގައި ބުނާހެން އިންޑިއާއިން ރާއްޖެއަށް އަތްގަދަ ކުރާކަށް ނޫޅެއެވެ. އުޅެންވީ ސަބަބެއްވެސް ނެތެވެ. މިލިޓަރީ ބޭސް ހަދައި, ރާއްޖެ ހިފާކަށްވެސް ނުއުޅެއެވެ. އެ ފުރުސަތު ދިވެހި ސަރުކާރުން ނުދޭނެކަން ޔަގީނެވެ.
އިންޑިއާއަކީ އަބަދުވެސް ރާއްޖޭގެ އަސްކަރިއްޔާ ވަރުގަދަ ކުރުމަށް އެހީތެރިވަމުން އަންނަ ގައުމެވެ. މި ސަރުކާރުން ގާއިމްކުރި ހަރުދަނާ ޚާރިޖީ ސިޔާސަތުގެ ސަބަބުން ރާއްޖެއާ އިންޑިއާ އާއި އޮންނަނީ ގާތް އެކުވެރި ގުޅުމެކެވެ. ހަމަ މިގޮތަށް އެހެން ގައުމުތަކާވެސް އޮންނަނީ މިފަދަ ގާތް ގުޅުމެކެވެ. ޗައިނާއާވެސް ގުޅުން އޮވެއެވެ. ސައުދީ އަރަބިއާ އަދި އެމެރިކާފަދަ ގައުމުތަކާވެސް ގުޅުން ރަނގަޅެވެ. ގައުމުުތަކާއި ގުޅުން ބަދަހިކުރަން މި ސަރުކާރުން ކުރި މަސައްކަތުގެ ނަަތީޖާވެސް އެހާ ފުރިހަމައެވެ. ބައިނަލްއަގުއާމީ ޖަމްއިއްޔާ ޖަމާއަތްތަކުންވެސް ރާއްޖެ ބަލައިގަނެއެވެ.
އެހެންކަމުން ރާއްޖެއާ އެންމެ ގާތް ގައުމަކަށް އަމާޒުކޮށް އިދިކޮޅުން މި ގޮވާ"އިންޑިއާ އަައުޓް"ގެ މަގްސަދާމެދު ސުވާލު އުފެދެއެވެ. މިހެން ގޮވާ ބާއްވާ ނިއުސް ކޮންފަރެންސް ތަކާއި, ޓީވީ ޕްރޮގްރާމްތަކާއި, ހިނގާލުން ތަކުން އިވެނީ މުޅިން އެހެން އަޑެކެވެ. އެ ބޭފުޅެއްގެ މައްޗަށް ކުށް ސާބިތުވެ ޖަލު ހުކުމެއްގައި އޮންނެވި ރައީސް ޔާމީން މިނިވަން ކުރޭ, މިހެން ގޮވާ އަޑެވެ. މިއީ މަގްސަދާ މެދު ސުވާލު އުފެދޭ ހިސާބެވެ. ހަގީގަތުގައި ގޮވަން ބޭނުންވަނީ "ދައުވާ އައުޓް" ކަމަށްވުން އެކަށީގެންވެއެވެ. ރައީސް ޔާމީންގެ މައްޗަށް އަނެއްކާވެސް އިތުރު ދެ ދައުވާ މިހާރު ވަނީ އުފުލާފައެވެ. އެހެންކަމުން އަނެއްކާވެސް މިކިޔާ ލަވަޔަށް އިތުރު ބާރެއް ލާން ޖެހުނީއެވެ.
އިންޑިއާ އައުޓް ގޮވަމުން އިދިކޮޅުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ވެއްދި މައްސަލަ ދިރާސާކޮށް ނިންމައި, ރިޕޯޓް ފާސްކުރި ދުވަހުވެސް ކޮމިޓީގައި ތިއްބަވާ އިދިކޮޅު މެމްބަރުން ކޮމިޓީއަށް ހާޒިރެއް ނުވެއެވެ. އެ ބޭފުޅުން އުޅުއްވީ, ވަކި މަގްސަދެއް ނޭގޭ މި ކެމްޕޭނުގައެވެ. ހަގީގަތުގައި އިންޑިއާ އައުޓް އެއީ މަގްސަދު ކަމުގައިވާނަމަ މިފަދަ މުހިއްމު ދުވަސް ދުވަހު ވަޑައިގަންނަވާނެއެވެ. އެހެންކަމުން ބުނެވެން އޮތީ އައުޓް ވާންވީ ދައުވާ ކަމެއް އިންޑިއާކަމެއް ޚުދު އެ ބޭފުޅުންނަށްވެސް އެނގުމެއް ނެތް ކަމުގައެވެ.
