ހުޅުމާލޭގައި ގިނަ އަދަދެއްގެ ރައްޔިތުން އާބާދުވަމުންދާ މިދަނޑިވަޅުގައި ވެމްކޯގެ ޚިދުމަތްތައް އިތުރަށް ބައްޓަންކުރުމަށާއި، މަސައްކަތްތައް ރުކުރުވާލުމަށްޓަކައި، ހުޅުމާލެ ފުރަތަމަ ފިޔަވަހީގެ ގޭބިސީތަކުން ކުނި ނަގާ ވަގުތު ބަދަލުކުރުމަށް ނިންމާފައިވާކަމަށް އެކުންފުނިން ބުނެފިއެވެ.

ވެމްކޯއިން ބުނީ 1 ޑިސެމްބަރުން ފެށިގެން މިސަރަހައްދުގެ ގޭބިސީތަކަށް ޚިދުމަތް ދިނުމަށް ހަމަޖެހިފައި ވަނީ ކޮންމެ ދުވަހެއްގެ 18:00އިން 23:00އާ ދެމެދުކަމަށެވެ. އަދި ހަވީރު 17:00އިން ފެށިގެން، ކުނި ކޮތަޅު ނެގޭނެ ފަދަ އިންތިޒާމެއް ހަމަޖެއްސުމަށް ވެމްކޯއިން ވަނީ އެދިފައެވެ.

މީގެއިތުރުން ވެމްކޯއިން ބުނީ, ކުނި ނެގުމުގެ ޚިދުމަތްތަކަކީ ރެޖިސްޓަރ ކޮށްފައިވާ އަދި ބިލަށް ފައިސާ ދައްކާ ފަރާތްތަކަށް ދޭ ޚިދުމަތްތަކެއްކަމަށެވެ. އެހެންކަމުން، ވެމްކޯގެ ޚިދުމަތާ ނުގުޅި ތިބި ހުރިހާ ކަސްޓަމަރުން، ވީ އެންމެ އަވަހަކަށް ކުނި އުކާލުމުގެ ޚިދުމަތަށް ރެޖިސްޓަރ ކުރުމަށް ވެމްކޯއިން ވަނީ އިލްތިމާސްކޮށްފައެވެ. ޚިދުމަތަށް ރަޖިސްޓަރ ކުރުމަށް އެދޭ ކަސްޓަމަރުން ވެމްކޯގެ ވެބްސައިޓް www.wamco.com/online އަށް ޒިޔާރާތްކުރުމަށް ފަހު ޚިދުމަތަށް އެދެވޭނެއެވެ.

މާލެ ސަރަހައްދުގެ ގޭބިސީތަކުން ކުނި އުކާލުމުގެ ޚިދުމަތްތަކަށް ވަނީ 15 ސެޕްޓެމްބަރއިން ފެށިގެން ބޮޑެތި ބަދަލުތަކެއް ގެނެސްފައެވެ. މިގޮތުން ހުޅުމާލޭގެ އަވަށްތައް ހިމެނޭގޮތަށް، އިމާރާތުގެ އެތެރެއިން ވަކި ފަންގިފިލާތަކުން ކުނި ނެގުމުގެ ޚިދުމަތް ވެމްކޯއިން ވަނީ ދޭންފަށާފައެވެ.

ކޮވިޑްގެ ހާލަތާއެކު، ވެމްކޯއިން ކުނި ނަގަމުންދިޔައީ ކޮންމެ ގެއެއްގެ ވެސް ބޭރުންނެވެ. ވަކިވަކި ފަންގިފިލާތަކުން ކުރިން ކުނިނަގަމުން އައި އައުން ބަދަލުކޮށް މަގުމައްޗަށް ކުނި ކޮތަޅު ނެރުމަށް އޭރު ވެމްކޯއިން އެދުނެވެ. ނަމަވެސް ކޮވިޑްގެ ހާލަތު ރަނގަޅުވެ އާންމު ހާލަތަށް ރުޖޫއަވުމާއެކު ވެމްކޯއިން ވަނީ، 15 ސެޕްޓެމްބަރުން ފެށިގެން ވަކިވަކި ފަންގިފިލާތަކުން ކުނި ނަގަން ފަށާފައެވެ.