ހޯރަފުއްޓާއި، ގާފަރުގައި ގާއިމްކުރާ އައިސް ޕްލާންޓު މަސްވެރިންގެ ދުވަހު ހުޅުވަނީ
25 ނޮވެމްބަރު 2021 | ބުރާސްފަތި 04:26މިވަގުތު 17 އައިސް ޕްލާންޓެއްގެ ޚިދުމަތް ދަނީ ދެމުން
ފެލިވަރު އައިސްޕްލާންޓުން ދޯންޏަކަށް އައިސް ނަގަނީ
ޑިސެމްބަރު 10 ވަނަ ދުވަހު ފާހަގަކުރާ މަސްވެރިންގެ ދުވަހު ދެ ރަށެއްގެ އައިސް ޕްލާންޓު ހުޅުވައި، ޚިދުމަތް ދޭނެ ފަށަން ނިންމާފައިވާކަމަށް މިފްކޯގެ މެނޭޖިން ޑިރެކްޓަރ އިސްމާއިލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ފައުޒީ ވިދާޅުވީ މިވަގުތު މިފްކޯގައި 20 އައިސް ޕްލާންޓު އެބަހުރި ކަމަށެވެ. މީގެ ތެރެއިން 2 އައިސް ޕްލާންޓެއް ޚިދުމަތަށް ނެރުމުގެ މަސައްކަތް ކުރަމުންދާކަމަށް ފައުޒީ ވިދާޅުވިއެވެ. އެއީ ހއ. ހޯރަފުށި އަދި ކ. ގާފަރުގައި ގާއިމްކުރަމުންދާ އައިސް ޕްލާންޓު ކަމަށް ފައުޒީ ވިދާޅުވިއެވެ. ޑިސެމްބަރު 10 ވަނަ ދުވަހު ފާހަގަކުރާ މަސްވެރިންގެ ދުވަހު މި ދެ އައިސް ޕްލާންޓުވެސް ޚިދުމަތަށް ނެރެވޭނެ ކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ އަތޮޅުތެރޭގެ ރަށްރަށުގައި މިވަގުތު އޮޕަރޭޓްކުރަމުންދަނީ 17 އައިސް ޕްލާންޓެއް ކަމަށެވެ. މި ތަންތަނުގައި 730 ޓަނުގެ ކެޕޭސިޓީ އެބަހުރި ކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ ކުރިއަށްއޮތްތަނުގައިވެސް މަސްވެރިންނާ ގުޅުންހުރި ވަރަށް ގިނަ ޕްރޮޖެކްޓުތަކެއް ކުރިއަށްގެންދަން ނިންމާފައިވާކަމަށެވެ. އެގޮތުން އިތުރު 13 އައިސްޕްލާންޓެއް ތަރައްގީކުރުމަށް މިނިސްޓްރީން ނިންމާފައިވާކަމަށް ފައުޒީ ވިދާޅުވިއެވެ.
އައިސް ޕްލާންޓް އެޅުމަށް މިނިސްޓްރީން ކަނޑައަޅާފައިވާ 13 ރަށަކީ ހއ. ދިއްދޫ، ހއ. ހޯރަފުށި، ށ.ކޮމަންޑޫ، ރ.މަޑުއްވަރީ، ކ.ގާފަރު، ފ.ފީއަލި، މ.މުލައް، ދ.ކުޑަހުވަދޫ، ގއ.ގެމަނަފުށި، ލ.މާމެންދޫ، އދ.މަހިބަދޫ، އއ.ރަސްދޫ އަދި ގދ.ފިޔޯރީއެވެ. ގެމަނަފުށީގައި ގާއިމްކުރަން ނިންމާފައިވަނީ 50 މެޓްރިކް ޓަނުގެ އައިސް ޕްލާންޓެކެވެ. ބާކީ ރަށްތަކުގައި ގާއިމްކުރަނީ 25 މެޓްރިކް ޓަނުގެ އައިސް ޕްލާންޓުތަކެކެވެ.
