މިފްކޯއަކީ ޒޮންބީ ކުންފުންޏެއް: ޒަރިޔަންދު
މިފްކޯއަކީ މަސައްކަތްތެރިންގެ މާހައުލެއް ބަލަހައްޓަންޖެހޭ ޒިންމާ އެޅިފައިވާ ދައުލަތުގެ ކުންފުންޏެއް
ރާއްޖެޓީވީގެ ''ޓީވީޓޯކް'' ޕްރޮގްރާމްގައި މާލީ ކަންތައްތައް ދިރާސާކުރައްވާ ބޭފުޅެއް ކަމުގައިވާ އިސްމާއިލް ޒަރިޔަންދު ވާހަކަދައްކަވަނީ
މިފްކޯއަކީ ޒޮންބީ ކުންފުންޏެއް ކަމަށާއި، އެއީ ފައިސާ ގެންގުޅޭ ކުންފުންޏެއް ނޫން ކަމަށް މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއިލް ޒަރިޔަންދު ވިދާޅުވެއްޖެއެވެ.
ރާއްޖެޓީވީގެ ''ޓީވީޓޯކް'' ޕްރޮގްރާމްގައި ޒަރިޔަންދު ވަނީ އެންސިސް ފިޝަރީޒް އިން ގާތްގަނޑަކަށް 25 މިލިއަން ޑޮލަރު ޚަރަދުކޮށްގެން ހުޅުމާލޭގައި ހިންގި ކޭނަރީ ގަތުމަށް މަޝްވަރާތަކެއް ކުރަމުން އަންނަ މިފްކޯއިން ބުނެފައިވަތީ އެކަމަށް ފާޑު ވިދާޅުވެފައެވެ.
ޒަރިޔަންދު ވިދާޅުވީ މިފްކޯ އަކީ ފައިސާ ގެންގުޅޭ ކުންފުންޏެއް ނޫން ކަމަށާއި، އެއީ ޒޮންބީ ކުންފުންޏެއް ކަމަށެވެ. މިފްކޯއަކީ ރާއްޖޭގެ އިގްތިސާދުގެ ވަރަށް މުހިންމު މަސައްކަތްތެރިންގެ މާހައުލެއް ބަލަހައްޓަންޖެހޭ ޒިންމާ އެޅިފައިވާ ދައުލަތުގެ ކުންފުންޏެއް ކަމަށްވާއިރު، ވިޔަފާރީގެ ތެރެއަށް ވަނުމުގައި އިތުރަށް ވިސްނަންޖެހޭ ކަމަށް އޭނާ ވިދާޅުވިއެވެ.
މިފްކޯއަކީ ރުފިޔާ ގެންގުޅޭ ބައެއް ނޫން. އެމީހުންނަކީ އަސްލުގައި ޒޮންބީ ކުންފުންޏެއް. ޒޮންބީ ކުންފުނީގެ ތިޔައަރީގައި މިކިޔަނީ ސަރުކާރުން މުޅިން ފައިސާ ދީގެން ހިންގާތަނެއް. ދެން އަނެއް ކަމަކީ މިފްކޯއަކީ ރާއްޖޭގެ އިގްތިސާދުގެ ވަރަށް މުހިންމު މަސައްކަތްތެރިންގެ މާހައުލެއް ބަލަހައްޓަންޖެހޭ ޒިންމާ އެޅިފައިވާ ދައުލަތުގެ ކުންފުންޏެއް. އެހެންވީމަ އަތުގައި ރުފިޔާ ނެތިސް އެހާ ބޮޑު ގައުމީ ޒިންމާއެއް އޮވެމެ ދެން އިތުރު ކަމަކަށް ދާއިރުގައި އިތުރު ވިޔަފާރިއެއް އަދި ބޮޑު އަގުގައި ގަންނަން ކަމަށްވެއްޖެއްޔާ އެ ރުފިޔާ އެއް ހޯދާނެ ގޮތެއް އޮންނަން ޖެހޭނެ އަދި މާލީ ހާލަތެއް ވެސް ކަށަވަރު ވާންޖެހޭނެ.އިސްމާއިލް ޒަރިޔަންދު
މިފްކޯ އަކީ މިހާރު ވެސް ދަރަނިވެރިވެފައިވާ ކުންފުންޏެއްކަން ފާހަގަ ކުރައްވައި ޒަރިޔަންދު ވިދާޅުވީ މިފްކޯގެ މިހާރުގެ ކޭޝް ބެލެންސް އަށް ބަލާއިރު، 500 މިލިއަން ރުފިޔާ އޯވަރ ޑްރާފްޓް ކޮށްފައިވާ ކަމަށެވެ. އަދި މިފްކޯގެ އަތުގައި އަމިއްލަ ވިޔަފާރިން ކަމެއް ކުރުމުގެ ގާބިލުކަމުގެ އެއްވެސް މާލީ ހާލަތެއް ނެތް ކަމަށް އޭނާ ވިދާޅުވިއެވެ.
މިފްކޯ ދަރަނިވެރި ވުމުން އެކަމުގެ ދަތިކަމާއި، ގެއްލުން މަސްވެރިންނާ، ގައުމަށް ކުރާނެ ކަމަށް ޒަރިޔަންދު ވިދާޅުވިއެވެ. އަދި ވިދާޅުވީ މިހާރު އެ ނިންމާ ނިންމުންތަކުގެ ސަބަބުން ވެސް ގެއްލުން ވަރަށް ބޮޑު ކަމަށެވެ.
