"ފެލިވަރު ކޭނަރީ ވަގުތީ ގޮތުން ބަންދު ކުރީ މެއިންޓެނެންސް އަށް ކަމަށް ބުނެ ސަރުކާރުން ހަދަނީ ދޮގެއް"
ފެލިވަރު ކޭނަރީ ވަގުތީ ގޮތުން ބަންދުކުރީ މެއިންޓެނެންސްއަށް ކަމަށް ބުނެ ސަރުކާރުން ދޮގު މައުލޫމާތު ދީފައިވާ ކަމަށް ވިދާޅުވެއްޖެ
މިފްކޯއިން ހިންގާ ފެލިވަރު ފިޝަރީޒް ކޮމްޕްލެކްސް
ފެލިވަރު ކޭނަރީ ވަގުތީ ގޮތުން ބަންދު ކުރީ މެއިންޓެނެންސް އަށް ކަމަށް ބުނެ ސަރުކާރުން ހަދަނީ ދޮގެއް ކަމަށް އިތުބާރު ހުރި ފަރާތަކުން ރާއްޖެ ޓީވީ އަށް މައުލޫމާތު ދީފިއެވެ.
ފެލިވަރުގައި މަސައްކަތް ކުރާ ފަރާތަކުން ނަން ހާމަ ނުކުރުމަށް ޝަރުތުކޮށް ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ ކޭނަރީގެ މަސައްކަތް ބަންދު ކުރީ މެއިންޓެންސް އަށް ކަމަށް ސަރުކާރުން ބުނި ނަމަވެސް އެއީ ކަމުގެ ހަގީގަތް އޮތް ގޮތެއް ނޫން ކަމަށެވެ. ކޭނަރީ ވަގުތީ ގޮތުން ބަންދު ކުރާ ސަބަބަކީ މަސްދަޅު އުފެއްދުމުގައި ބޭނުން ކުރާ ތެލުގެ ސްޓޮކް ދަށްވެ، މަސްދަޅު އުފައްދަން އެކަށީގެންވާ ވަރަށް ތެޔޮ ނެތުން ކަމަށް ވެސް އޭނާ ވަނީ ވިދާޅުވެފައެވެ.
9 އޮގަސްޓް 2025 ގައި މިފްކޯ އިން ކުރި އިއުލާނެއްގައި ބުނެފައި ވަނީ އެ ކޮމްޕްލެކްސް އާއި ކޭނަރީގެ މެއިންޓެނަންސް މަސައްކަތްތަކެއް ކުރުމަށްޓަކަ 12 އޮގަސްޓް 2025 އިން 18 އޮގަސްޓް 2025 އަށް ޕްރޮޑަކްޝަން މަސައްކަތްތައް ކުރުން މެދުކަނޑާލެވޭނެ ކަމަށެވެ.
މި ދުވަސްތަކުގައި ޕްރޮޑަކްޝަން މަސައްކަތްތައް ނެތް ކަމުގައި ވީ ނަމަވެސް ޕްރޮޑަކްޝަން ޑީޕާޓްމަންޓުގެ ސެކްޝަންތަކުގައި މަސައްކަތްކުރާ މުވައްޒަފުން ހާޒިރުވުމަށް ސެކްޝަންތަކުން އަންގާ ގޮތެއްގެ މަތިން މުވައްޒަފުން މަސައްކަތަށް ހާޒިރުވާން ވާނެ ކަމަށް އެ އިއުލާންގައި ބުނެފައިވެއެވެ. އަދި އެހެނިހެން ދާއިރާތަކުގެ މަސައްކަތްތައް މިހާރު ވެސް ކުރަމުންދާ އުސޫލުން މި ދުވަސްތަކުގައި އޮންނާނެ ކަަމަށް އެ އިއުލާންގައި ބުނެފައިވެއެވެ.
މިފްކޯ އިން މިފަދައިން ބުނި ނަމަވެސް ރާއްޖެ އެމްވީ އަށް މައުލޫމާތު ދިން މީހާ ބުނީ މިފަދައިން ސަރުކާރުން މައުލޫމާތު ހާމަކޮށްފައި ވަނީ އާއްމުންނަށް ހަގީގަތް ސިއްރުކުރުމަށް ކަމަށެވެ.
