ބައިޑެންގެ ޑިމޮކްރަސީ ސަމިޓުގެ ދައުވަތު 110 ގައުމަކަށް!
24 ނޮވެމްބަރު 2021 | ބުދަ 11:52ސަމިޓަށް ގައުމުތައް ހޮވާފައިވާ ގޮތުން އެމެރިކާއަށް ފާޑުކިޔުން އަމާޒުވާނެ
އެމެރިކާގެ ރައީސް ޖޯ ބައިޑަން
އެމެރިކާގެ ރައީސް ޖޯ ބައިޑެންގެ ވަރޗުއަލް ޑިމޮކްރަސީ ސަމިޓުގެ ދައުވަތު 110 ގައުމަކަށް ދެއްވައިފިއެވެ.
މި ސަމިޓުގެ ދައުވަތު 110 ގައުމަކަށް ދެއްވާފައިވާއިރު، އޭގެ ތެރޭގައި ޗައިނާގެ ވާދަވެރި ޓައިވާންވެސް ހިމެނެއެވެ. އެހެންނަމަވެސް މި ސަމިޓުގެ ދައުވަތު ޗައިނާއަށް ދެއްވާފައެއް ނުވެއެވެ. އެހެންކަމުން ތަޖުރިބާކާރުން ބުނަނީ، ޓައިވާނަކީ ޗައިނާގެ ބައެއްގެ ގޮތުގައި ދެކޭ ޗައިނާގެ ސަރުކާރުގެ ނުރުހުން މި ސަމިޓަށް އަމާޒުވާނެ ކަމަށް ބެލެވޭ ކަމަށެވެ.
މި ސަމިޓަކީ ބައިޑެންގެ ރިޔާސީ ވައުދެކެވެ. ބައިޑެންގެ ޚާރިޖީ ސިޔާސަތުގައި އިސްކަން ދެއްވާފައިވާ އެއް ކަމަކީ ޚުދުމުޚުތާރު ވެރިކަންތަކާ ދެކޮޅުވެ، ގައުމުތައް އެކުވެ ޑިމޮކްރަސީ ކުރިއެރުވުމެވެ.
މި ސަމިޓް ކުރިޔަށްދާނީ ޑިސެމްބަރު މަހުގެ 9 ވަނަ ދުވަހުން ފެށިގެން 10 ވަނަ ދުވަހުގެ ނިޔަލަށެވެ. މި ސަމިޓުގެ ފުރަތަމަ ބައްދަލުވުން ވަރޗުއަލްކޮށް ބޭއްވުނު ނަމަވެސް ދެވަނަ ބައްދަލުވުން ކުރިޔަށްދާނީ އަންނަ އަހަރު ހުރިހާ ލީޑަރުން އެއްތަންވެގެންނެވެ.
މި ސަމިޓަށް ދައުވަތު ދެއްވި ލިސްޓުގައި ޗައިނާއާއި ރަޝިޔާ ނުހިމެނޭތީ އެކަމާ ފާޑުކިޔުން ވަނީ އަމާޒުވެފައެވެ. އެހެން ނަމަވެސް މި ސަމިޓުގެ ދައުވަތު އިންޑިއާއާއި ޕާކިސްތާނަށް ވެސް ވަނީ ދެއްވާފައެވެ.
މެދުއިރުމަތީ ގައުމުތަކުގެ ތެރެއިން ދައުމަތު ދެއްވީ ހަމައެކަނި އިޒްރާއީލަށާއި، އިރާގަށެވެ. އެހެންކަމުން ދައުވަތު ލިސްޓުން، އެމެރިކާއަށް ވާގިވެރިވާ ސައުދީ އަރަބިއްޔާ، މިސްރު، އުރުދުން، ގަތަރު އަދި ޔޫއޭއީއަށް ވެސް ލިސްޓުން ފުރުސަތު ލިބިފައެއް ނުވެއެވެ.
