އޮރިޔާންކާޑު ބޭނުންކޮށްގެން ފްރާންސްގެ މިޑްފީލްޑަރު މެތިއު ވަލްބުއޭނާއަށް ބިރުދައްކަން މަސައްކަތްކުރި މައްސަލައިގައި ރެއާލް މެޑްރިޑަށް ކުޅެމުން އަންނަ ފްރާންސްގެ ފޯވާޑް ކަރީމް ބެންޒެމާއަށް އެއް އަހަރުގެ ޖަލު ހުކުމެއް އިއްވައިފިއެވެ.

އުމުރުން 33 އަހަރުގެ ބެންޒެމާ އާއި އަންހެނަކު ގުޅިގެން ވަލްބުއޭނާގެ ވީޑިއޯއެއް ބޭނުންކޮށްގެން އޭނާއަށް ބިރުދައްކައި، ލާރި ހޯދަން މަސައްކަތްކޮށްފައިވަނީ 2015 ވަނަ އަހަރު ފްރާންސުން އަރްމީނިއާއާ ދެކޮޅަށް ކުޅުނު މެޗެއްގެ ކުރިންނެވެ. މި މައްސަލައިގައި 2015 ވަނަ އަހަރު ބެންޒެމާ ހައްޔަރުކުރި ނަމަވެސް، ރަސްމީ ހައިސިއްޔަތަކުން މައްސަލަ ބަލާފައެއް ނުވެއެވެ. އެކަމަކު އެ ފަހަރު މި މައްސަލައިގައި ފްރާންސްގެ ގައުމީ ފުޓްބޯޅަ ޓީމުން ބެންޒެމާ ބޭރުކުރިއެވެ.

ފަސް އަހަރު ފަހުން ބެންޒެމާގެ މައްސަލައިގެ އަޑުއެހުންތައް ކުރިއަށްދިޔައިރު، ބުދަ ދުވަހު ފްރާންސްގެ ކޯޓަކުން ވަނީ ބެންޒެމާއަށް އެއް އަހަރުގެ ޖަލު ހުކުމެއް އިއްވާފައެވެ. އެކަމަކު އެ ޖަލު ހުކުމަކީ ސަސްޕެންޑެޑް ހުކުމަކަށްވާތީ، އެ ހުކުމް ތަންފީޒުކުރަން ޖެހޭނީ އެކަން ތަކުރާރުކޮށްފިނަމައެވެ.

މި މައްސަލައިގެ އަޑުއެހުން ކުރިއަށްދިޔައިރު، ބެންޒެމާ އާއި ވަލްބުއޭނާވެސް ކޯޓަށް ހާޒިރުވެފައެއް ނުވެއެވެ. ކޯޓުގައި ކުރިއަށްދިޔަ އަޑުއެހުމަށްފަހު މީޑިއާތަކަށް ދިން އިންޓަވިއުއެއްގައި ބެންޒެމާގެ ވަކީލު ވަނީ ކޯޓުގެ ހުކުމް އިސްތިއުނާފުކުރާނެ ކަމަށް ވިދާޅުވެފައެވެ.

ންޒެމާގެ އިތުރުން ހަތަރު މީހަކަށް މި މައްސަލައިގެ ތުހުމަތުކުރެވޭއިރު، ފްރާންސްގެ ޕްރޮސެކިއުޓަރުން ތުހުމަތުކުރާ ގޮތުން ބެންޒެމާ ވަނީ ވަލްބުއޭނާގެ ވީޑިއޯއެއް ބޭނުންކޮށްގެން ބެލްކްމެއިލް ކުރާ މީހާ ލައްވައި ވަލްބުއޭނާއަށް ގުޅައި، ބިރު ދެއްކުމުގެ އިތުރުން، އެކަން ރޭވުމުގައި އިސްކޮށް ހަރަކާތްތެރިވެފައެވެ.

މިކަންތައްތައް ހިނގާދިޔައިރު ބެންޒެމާ އާއި ވަލްބުއޭނާއަކީ ބްރެޒިލުގައި 2014 ވަނަ އަހަރު ކުރިއަށްދިޔަ ފީފާ ވޯލްޑް ކަޕުގައި ކުޅުނު ފްރާންސް ޓީމުގެ ދެ ކުޅުންތެރިންނެވެ. މި މައްސަލަ ފެންމަތިވުމަށްފަހު 2015 ވަނަ އަހަރުގެ ފަހުން މި ކުޅުންތެރިންނަށް ފްރާންސް ސްކޮޑުން ފުރުސަތު ދީފައި ނުވި ނަމަވެސް، މި އަހަރުގެ ހޫނު މޫސުމުގައި ކުރިއަށްދިޔަ ޔޫރޯ ފުޓްބޯޅަ މުބާރާތުގައި ބެންޒެމާ ވަނީ އަލުން ފްރާންސްގެ ސްކޮޑަށް ނަގާފައެވެ.